ITUKUTUKU NI VEILIUTAKI NI IWASEWASE

Lako vata kei na Kalou ena Salatu ni Veiyalayalati

Mai vei Elder Paul N Lekias

IWasewase 70

Ena itekivu ni yabaki, a totoka sara vei au na vulica na Lako Mai, Mo Muri Au ni da raica matua kina na malanivosa ‘Lako vata kei na Kalou’.

Ena osooso ni noda bula, eda rawa ni vakatauvatana nona a vakila o Inoki ni sa kacivi koya na Turaga me vunautaka na veivutuni vei ira na Luvena¹. A kaya o Inoki, “A cava au sa kune loloma kina e matamuni, ia au sa tamata gone ga, ka ra sa cudruvi au kecega na tamata; niu sa dau vosa malua; na cava beka au nomuni tamata kina?”²

Kevaka meda qai nanuma vaka o ya, eda sa qai vakaitokani vinaka kina. Eda kalougata, ni sega ni gadrevi meda tiko veilecayaki, ni sala sara ga oqo a sauma kina na Turaga na taro nei Inoki:

“Mo lako yani ka kitaka na ka au sa vakarota vei iko, ena sega ni dua na tamata e cokai iko. Mo dolava na gusumu, ka na qai vakasinaiti, kau na tukuna vei iko na vosa mo cavuta, niu sa lewa na tamata kecega, kau na kitaka ga na ka e vinaka vei au . . .

“ko na tu vei au, ka’u na tu vei iko; o koya mo lako kina vata kei au.”³

Ena iDusidusi ni Ulutaga ki na ivolanikalou taucoko, eda raica kina e 100 na veitikina ki na malanivosa, Lako vata kei na Kalou. O Atama a lako vata kei na Kalou ena were o Iteni⁴; O Inoki a lako vata kei na Kalou⁵; O Noa a lako vata kei na Kalou⁶; O Eparama a lako vata kei na Kalou vakakina o Aisake a lako vata kei na Kalou⁷.

Na veisureti ni lako vata kei na Kalou sa dei tikoga ena siga nikua, sa dina sara, “Ka sa sureti ira kecega me ra lako mai Vua ka vakaivotavota ena Nona vinaka,”⁸ sa kena ibalebale talega, na lako vata kei Koya.

Na lako vata kei na Tamada Vakalomalagi kei na Luvena o Jisu Karisito ena gadrevi taumada meda kila o cei mada oi rau. Eda na qai kilai rau ni da sa qaravi rau⁹ ka maroroya na nodrau ivakaro.

Eda lako vata kei na Kalou ni da sa lomana na wekada¹⁰ ka veiqaravi ena sala e ‘cecere ka vakalou cake’. Eda lako vata kei na Kalou ni da sa vakaituvaki ena Nona ivakaraitaki ka sa yaco vei keda e dua na veisau levu ni yaloda¹¹. Eda lako vata kei na Kalou ni da tu yani ka meda Nona ivakadinadina, veilaveti cake vakai keda, vukei ira sa tiko leqa ka raica me kakua ni dua e tiko dravudravua ena keda maliwa¹².

Ena veiyabaki sa oti, a vakamacalataka vakavinaka kina o Peresitedi Russell M. Nelson na cava na irairai dina ni ‘Lako vata kei na Kalou’ ena nona kaya:

“Ia oqo, meu kaya ki na lewe yadua ni Lotu, mo dei tikoga ena salatu ni veiyalayalati. Na nomu dinata mo muria na iVakabula ena nomu cakava na nomu veiyalayalati kei Koya ka qai maroroya na veiyalayalati oqori ena dolava kina na katuba ki na veivakalougatataki vakayalo yadua kei na veimadigi sa vakarautaki tu vei ira na tagane, yalewa, kei ira na gone ena veivanua kecega.

“Oi keitou na Mataveiliutaki vou, keitou vinakata me nanumi tiko na kena icavacava. Ena vuku ni ka oqo, keitou sa vosa tiko kina oqo mai na dua na valetabu. Na kena icavacava o ya vei keda yadua meda vakaedaumeni ena kaukauwa ena loma ni dua na vale ni Turaga, vauci vakamatavuvale, dinata tiko na veiyalayalati a vakayacori ena valetabu me vakadeitaki keda ki na isolisoli cecere duadua ni Kalou—o ya na bula tawamudu. Na cakacaka vakalotu ni valetabu kei na veiyalayalati o a cakava e kea sa idola ni kena vaqaqacotaki na nomu bula, na nomu bula vakamau kei na matavuvale, kei na nomu rawa ni vorata na ravuravu ni vunimeca. Na nomu sokalou e valetabu kei na nomu veiqaravi e kea baleti ira na nomu qase e liu o na vakalougatataki ena kena vakalevutaki vei iko na ivakatakila kei na vakacegu ka na vakaukauwataka na nomu yalayala mo dei tikoga ena salatu ni veiyalayalati.

“Ia oqo, kevaka o sa kalawa tani mai na salatu, au sureti iko ena vakanuinui taucoko ni yaloqu mo yalovinaka mo lesu mai. Se cava sara na veika o leqataka tiko, se cava sara na ibolebole, sa tiko na nomu tikina eke, ena Lotu ni Turaga. O iko kei na itabatamata era na qai sucu mai era na kalougata ena vuku ni nomu cakacaka ena gauna oqo mo lesu ki na salatu ni veiyalayalati. Na Tamada mai Lomalagi sa dau vakamareqeti ira na Luvena, ka sa vinakata o Koya vei keda yadua meda lesu yani i vale ki Vua. Sai koya oqo na inaki cecere duadua ni Lotu i Jisu Karisito ni Yalododonu Edaidai—me vukei keda vakayadua meda lesu i vale.”¹³

Oi keda na lewe ni Lotu i Jisu Karisito ni Yalododonu Edaidai meda sa cakava na noda kaukauwa taucoko meda muria na nodra ivakaraitaki totoka na noda parofita ena noda lako vata kei na Kalou ena salatu ni veiyalayalati me qai yaco mai na veisiga ni mataka ena vakatokai keda na Turaga me ko Saioni ka ciqomi keda meda sa Nona sara¹⁴.