Noda Tabana

Na Ukuuku me iSosomi ni Dravusa

Mai vei Yvette Barnes

Ena tekivu ni 2019, a tekivutaka o Sister Setaita na nona kaulotu ena Tabana ni Kaulotu e Joao Pessoa mai na Tokalauvualiku kei Brazil. Ni oti toka e vica na vula, a mavoa vakaca sara na duruna ka gadrevi me sa lesu tale ki Ositerelia me laki qaravi cake kina vakavuniwai.

Ni se yalona tikoga me vakacavara na nona kaulotu, a soli na veivakadonui vei Sister Ata me laki kaulotu tale ni oti e dua na yabaki ka qai lesi sara ki na Tabana ni Kaulotu e Melbourne Ositerelia. Ia ena Okotova ni 2020, a sotava tale e dua na mate veitauvi veibolei: eso na mosi ni ulu bibi sara.

Ni sotava tiko na mosi, sa nanuma talega ni sa mai vakavuna me vakataotaki ira nona itokani me taucoko na nodra cakacaka. Ni mai vakasamataka vakabibi tu oqo, sa dau dredre vei Sister Ata me vosa vei nona peresitedi ni kaulotu, ni rerevaka de na biuta vakatotolo na ilesilesi vaka-daukaulotu.

Vakasamataka mada na nona marau ni sa kila ni sa rawa me qarava tale na Turaga—ni nona qaravi vakavuniwai ena rawa me vakarautaki ena gauna sa vakacavara tiko kina na vo ni nona kaulotu. Ni sa vakamacalataka o Peresitedi Houghton ni sa rawa me lesi ki na Kaulotu Veiqaravi, a ciqoma sara vakatotolo o Sister Ata, ni bera mada ga me kila na ivakarau ni kena cakacaka. Ena siga vata ga o ya a veivosaki vata kei koya ena Zoom o Elder kei Sister Nicholls, oi rau na iLiuliu ni Kaulotu Veiqaravi raraba e Ositerelia, me vakatarogi koya ka vakamacalataka vua na kena ivakarau.

Ni dua na Daukaulotu Veiqaravi, ena rawa vei Sister Ata me lesu i vale me tomani na nona qaravi vakavuniwai, ia ena gadrevi me vakayacora tikoga na nona ituvatuva vaka-daukaulotu o ya na masu e veisiga, vuli ivolanikalou, kei na vakaukauwa yago. Rau dau ciqoma ena masumasu o Elder kei Sister Nicholls na kaukauwa qaqa nei Sister Ata me raici kina na sala vinaka duadua me cau kina o koya ki na nodra sokumuni o Isireli.

Ni gauna me ratou sota tale kina me tuvai na ivakarau vou ni nona veiqaravi vakaulotu, rau a raica na Nicholl ni sa vakalougatataki tu o Sister Ata ena dua na taledi totoka me baleta na iyaloyalo droinitaki, ni sa dau yalololoma sara ka dauyalomalua qaqa. A vakaraitaka o Sister Ata na nona gagadre me laki veiqaravi e valetabu, ni qai oti na veivosaki, kei na masumasu ni yalodratou sa tuvanaki kina e dua na nona ilesilesi vou:

Veiliutaki ena Tikina: Me na qai veiqaravi o Sister Ata me nodra iliuliu na daukaulotu veiqaravi ena nona tikina.
Veiqaravi ena Droini: Ena dau bulia na veitiki ni droini e vakauqeta na vakabauti Jisu Karisito kei na Nona kosipeli.
Veiqaravi ni Valetabu: Ena dau cakacaka ena valenivolavola ni Valetabu e Ositerelia Melbourne ena gauna sa vakadonui me cakacaka kina ena veimacawa.

A tekivu vakatovolei mada e Amerika kei Kenada ena 2018, na Kaulotu Veiqaravi sa dua na sala vei ira na itabagone era a sega ni rawa ni veiqaravi vaka-daukaulotu tudei mera “laki veiqaravi ena dua na ituvaki ni itikotiko e veirauti vinaka ki vua se nona taledi, kila-ka, kei na isolisoli.”¹ A tekivu na Kaulotu Veiqaravi mai Ositerelia ena 2020, ena gauna rau a vakacavara kina o Elder kei Sister Nicholls na nodrau vuli ni veiliutaki.

“Era sa vagalalataki kece na veika lelevu!” e vakamacalataka o Elder Nicholls, “Na daukaulotu veiqaravi era sega ni tiko vata kei na dua na itokani; era sega ni tiko ena dua na vanua sa lesi vakatabakidua ena kena iyalayala digitaki; era na dara na nodra beji ni ra laki qarava na nodra ilesilesi ni kaulotu.”

Ni ra sa daukaulotu veiqaravi era na veiliutaki, ni nodrau ilesilesi o Elder kei Sister Nicholl sa duatani toka. E rau tiko ga ena nodrau vale e Gold Coast e Queensland ka qaravi ira na daukaulotu era vakaitikotiko vakayawa sara maivei ira yadudua. Rau dau dikeva na madigi ni veiqaravi—ena loma ni Lotu vakakina ena itikotiko raraba—ka dau vakasamataka vakavinaka ‘na veika raraba’ mera semati na nodra dui kaukauwa kei na taledi na daukaulotu yadua baleta na gagadre bibi eso.

“Au sa kila ni tiko vei au e dua na taledi ni maqosa ni droini” a kaya o Sister Ata, “ia sa dede sara noqu sega tu ni vakayagataka. Au sa qai kila oqo ni vinakata na Tamaqu Vakalomalagi meu vakayagataka na maqosa ni droini meu qaravi ira eso.”

Ni vakasamataka na gauna ni nona tauvimate ka a tarova na nona kaulotu ena ivakatekivu, a sega ni rawa vei Sister Ata me digitaka na ibolebole o ya me nona ga, ia sa kila o koya ni sa mai ciqoma tiko ena gauna oqo na ‘iukuuku totoka me isosomi ni dravusa’.²

“Ke dua na ka, na noqu lesi ki na kaulotu veiqaravi a vukei au [meu] kila rawa na veika sa solia mai na Tamada Vakalomalagi,” a kuria. “E dua na tiki levu ni noqu kaulotu veiqaravi o ya na cakava na loma ni Turaga kei na vakatarogi Koya tikoga. E lesu ki na dua na lesoni ena Lako Mai, Mo Muri Au: kevaka o gadreva mo veiqaravi mo na taroga ga na Turaga ena qai dusimaki iko o Koya mo kila na ka mo cakava kei na sala mo veiqaravi kina.”