TE MAU ’API NŌ PĀTIFITA
Nāhea te ha’api’ira’a ’evanelia i te tauturu iā’u ’ia manuia i roto i te ha’api’ira’a
Mai te mau feiā ’āpī ato’a i roto i te ’Ēkālesia a Iesu Mesia i te Feiā Mo’a i te mau Mahana Hope’a nei, ’ua haere au i te ha’api’ira’a ’evanelia nō te roara’a e maha matahiti. Te aura’a ra, e rave rahi hora ha’api’ira’a i te ’evanelia, ta’a ’ē atu i tō te mau hora ha’api’ira’a i te sābati ’e i te ’utuāfare. ’Ua riro te reira ’ei ’ohipa teimaha ’e te fifi i te tahi taime.
’Ua ha’amata vau i te ha’api’ira’a ’evanelia i te matahiti 2017 i roto i tā mātou pāroita ’o Pare, nō te titi nō ’Ārue Tahiti. Tei roto vau i te ha’api’ira’a tuarua piha toru i taua taime ra, ’e e hina’aro rahi tō’u ’ia riro ’ei melo nō teie pupu feiā ’āpī.
I roto i tā’u matahiti mātāmua, ’ua ti’a vau i te hora 5:00 i te po’ipo’i i te mau mahana ato’a nō te tae i te ha’api’ira’a ’evanelia i te hora ti’a. ’Ua ha’apa’o vau i tā’u mau tai’ora’a, ’e e mea ha’apa’o maita’i au i roto i te piha ha’api’ira’a. ’Ua ’ite a’era vau ē, ’ua tauturu te ha’api’ira’a ’evanelia iā’u ’ia fa’ahōhonu i tō’u tā’amura’a i te Atua. ’Āhiri ē, ’aita ’oia, ’aita ïa vau e manuia i tā’u parau tū’ite i te hope’a o te piha toru.
I roto i nā matahiti e piti i muri iho, ’ua ha’amata vau i te ha’apa’o ’ore i tā’u mau ’ohipa, ’aita e tae i te séminaire i te tahi taime, ’aore rā e mea pinepine ’ia tae nā muri a’e i te hora. ’Ua ’ore tō’u hina’aro ’ia haere i te séminaire, nō reira ’ua iti mai tā’u mau tauto’ora’a tāmau.
Nō reira, ’ua fifi roa vau i tā’u ha’api’ira’a i roto i te piha piti, terā rā, i tāua taime ra, ’aita vau i ’ite ē, nāhea te reira i te tū’ati i ni’a i tā’u mau ’ohipa i rave i roto i te séminaire.
I roto i te piha hō’ē, ’ua ha’amata vau i te haere nā muri iho i te mau hoa o te piha ha’api’ira’a ’o tē rave ra i te mau ’ohipa ’aita e fāri’ihia e tā tātou ’Ēkālesia, mai te ’ava ’e te ’ava’ava. ’Ua tupu ri’i tō’u ha’amā nō te ’orera’a e riro mai terā mau hoa, ’e te ’orera’a e haere e ori nā muri iho ia rātou.
Nō reira, ’ua topa roa tā’u mau nota i te roara’a o te matahiti, ’e ’āhiri au i haere i te hi’opo’ara’a nō te baccalauréat i taua matahiti ra, ’aita i pāpū ē, e manuia ānei au.
I muri iho, ’ua taui te ma’i pe’e Covid i tō tātou orara’a i te mau mahana ato’a, ’e tē ha’amāuruuru nei au i te Atua nō te reira. I te ha’amatara’a i te ha’api’ira’a séminaire i ni’a i te niuniu ’āfa’ifa’i, mai te huru ra ē, ’ua riro te reira ’ei ’arora’a i te ’ino e vai ato’a ra.
Noa atu ē, tē vai ri’i noa ra ā te tahi mau taime paruparu, ’ua fa’aoti au ’ia tāpe’a ’e ’ua tāmata vau ’ia ha’apa’o māite mau i te mau ha’api’ira’a o te séminaire, nō te fāri’i i te tauturu a te Atua i roto i tā’u ha’api’ira’a.
Tō’u tūtau nō te ora
Tē māuruuru nei au nō tō’u nā metua. ’Āhiri ’aita rāua, ’ua fa’aru’e au i te séminaire ’e ’a pe’e ai i te haere’a o tō’u mau hoa melo ’ore. ’Ei nā ’orometua ha’api’i ’evanelia au-rahi-hia e au, ’ua ara rāua i ni’a iā’u ma te ha’apāpū ’ia vai tā’amu noa vau i te Atua.
I muri iho, ’ua riro mai te mau auta’atira’a maita’i ’e te feiā ’āpī o te pāroita ’ei ’ahu poito nō’u. ’Ua riro tā mātou mau ’ohipara’a ’āmui ’ei fa’a’āpīra’a iā’u i te mau taime ato’a e ’ere au i te mea ’ana’anatae. I rotopū i teie mau hoa, te vai ra ’o Corail Sommers, ’aita roa atu ’oia i ha’avā iā’u, ’ua fa’aro’o rā ’oia i te mau taime ato’a ’e ’ua fa’aitoito ’e ’ua fa’ati’a iā’u i ni’a nā roto i tōna hi’ora’a.
’Ua tauturu rātou tāta’itahi, ’ia au i to rātou huru, ’ia vai te hau i roto iā’u.
E ha’amāuruuruhia te mau tauto’ora’a i te mau taime ato’a
’Ua hōro’a mai te ’ohipa tomora’a i roto i te mau pāpa’ira’a mo’a i te mau mahana ato’a i te mau hotu i roto i te matahiti hope’a ’o tā’u ha’api’ira’a séminaire, ’e ’o te matahiti hope’a ato’a ho’i nō tā’u ha’api’ira’a.
’Ua tauturu tā’u mau peu ha’api’ira’a séminaire iā’u ’ia vai nahonaho maita’i a’e. Noa atu ē, e ’ere au i te ta’ata au i te ’ohipa tai’o parau, ’ua fa’aitoito vau i te tai’o i te mau mahana ato’a. Nā terā i tauturu iā’u ’ia tāpe’a noa i tō’u tā’amura’a i tō’u Metua i te ao ra, noa atu ē, e ’ere i te mea pa’ari roa.
I taua matahiti ra, ’ua manuia vau i tā’u baccalauréat ma te nota maita’i roa. ’Ua noa’a tā’u parau fa’ati’a nō te fa’ahoro i te pere’o’o i te taime mātāmua iho. ’Ua fāri’i au i tō’u pi’ira’a nō te tāvini ei misiōnare i Paris. ’Ei ha’apotora’a, ’ua vai te rima o te Atua i roto i tō’u orara’a i te mau taime ato’a i roto i te séminaire ’e i te ha’api’ira’a.
’Ia hi’o ana’e au i muri, tē fa’a’ite pāpū nei au ē, e tauturu mai te Atua ia tātou i te mau taime ato’a nō te mea ’ua here ’oia ia tātou.
’Ua riro te séminaire ’ei ’ohipa mau nō tātou te feiā ’āpī nō te tauturu ia tātou ’ia ti’aturi i te Atua ’e ’ia vaiiho iāna ’ia upo’oti’a i roto i tō tātou orara’a. ’Ua ti’aturi ’oia iā’u i te mau taime ato’a.