TE MAU ’API NŌ PĀTIFITA
E Noela e fa’aherehere
I te mau matahiti ato’a, māua tā’u tāne ’e tō māua ’utuāfare fēti’i, e haere mātou i te hō’ē vāhi pūhapara’a nō te fa’ahanahana i te mau ta’urua hope’a matahiti. E mā’iti mātou i te hō’ē vāhi e ō mātou pā’āto’a ’e e pūhapa mātou i reira mai te mahana hou te noela, ē, tae roa atu i muri iho noa i te mahana matahiti ’āpī.
Teie mau pūhapara’a, e mau taime nehenehe ïa nō mātou nō te ha’apa’ari i tō mātou tā’amura’a fēti’i. Nō te mea ho’i ē, te rahira’a ’o mātou e mau melo nō te ’Ēkālesia a Iesu Mesia i te Feiā Mo’a i te mau Mahana Hope’a nei, e ha’apūai ato’a teie mau pūhapara’a i tō mātou ’itera’a pāpū nō ni’a i te Mesia ’e tāna ’Ēkālesia a fa’ahanahana ai mātou i tōna fānaura’a.
I te hope’a o te matahiti 2020, ’ua ’itehia ia mātou te hō’ē vāhi i roto i te mata’eina’a nō Bikenibeu, Tarawa, tē vai ra hō’ē mwaneaba rahi (e fare putuputura’a tahito) e nehenehe tō mātou ’utuāfare tā’āto’a e ta’oto i reira. Mai tei mātarohia, ’ua ’āmui ato’a mai tō’u tuahine ho’ovai here, ’o Meteta, i roto i te mau fa’a’oa’oara’a o te pūhapara’a.
’Ua ora ’o Meteta i pīha’i iho ia māua ’o tā’u tāne, ’e, i te 71 o te matahiti, e au ’oia mai te hō’ē metua vahine nō māua. E mea maita’i noa ā tōna tino ’e tē itoito ho’i, terā rā, e fa’a’ohipa ’oia i te hō’ē turuto’oto’o nō te haere, i muri a’e i te hō’ē tāpūra’a tei ravehia i ni’a iāna e 20 matahiti nā mua atu. ’Ua auroa ’o Meteta i tō mātou mau tere pūhapara’a nō te noela, ’e ’ua ’āmui mai ’oia ma te ’oa’oa i roto i tā mātou mau ha’uti ’e te mau ’ohipara’a ’utuāfare.
I te 31 nō Tītema, tau hora ri’i nā mua a’e i te fa’ahanahanara’a i te matahiti ’āpī, e ’oa’oa rahi tō Meteta. ’Ua hapu ’oi’oi ’oia i te pape, ’ua fa’anehenehe iāna, ’e ’ua pārahi i roto i te mwaneaba, ’ua ineine nō te ’oa’oa i te reira pō. ’Ua rū te mau ta’ata ato’a nō te fa’aineine ato’a.
’E i roto i te reira mau fa’aineinera’a ato’a, ’ua parau marū maira ’o Meteta iā’u, « E māuiui pūai tā’u e ’ite ra i roto i tō’u ouma ». ’Ua vaiiho a’era vau i te mau mea ato’a tā’u e rave ra, ’ua tuō atura vau i tā’u tāne ’e i te tahi atu tuahine ho’ovai, ’e ’aita i maoro, e rave rahi mātou i te tāmatara’a i te tauturu iāna.
E mea vitiviti roa te ’ohipa i tupu. Fātata ’ahuru ma pae minuti i muri a’e, ’ua ha’amata ’o Meteta i te pu’unena. ’Ua hōro’a atura tā’u tāne ’e te tamaiti i te hō’ē ha’amaita’ira’a autahu’ara’a ’a tīa’i noa ai mātou i te pere’o’o ma’i. Te mea pe’ape’a, ’aita i ti’a i te mau taote ’ia rave i te hō’ē ’ohipa nōna. I tō mātou taera’a i te fare ma’i, ’ua reva tō mātou Meteta.
I tāua pō ra, ’ua mau te ao nei nō mātou. ’A ho’i marū noa ai mātou i te pūhapara’a—nō te fa’a’ite i te parau ’āpī pe’ape’a ’e ’ia fa’aara i te tā’āto’ara’a ’ia tātara i te pūhapara’a—’ua feruri noa māua ’o tā’u tāne i te mau taime hope’a ’o Meteta. ’Ua ’imi te mau taote i te mau rāve’a ato’a nō te fa’aora fa’ahou iāna, ’e ’ua tāmata ato’a te mau ta’ata e hā’ati ra ia mātou ’ia hōro’a mai ia mātou i te ti’aturi, terā rā, te mea tā mātou e ’ite ra, ’o te hō’ē ïa hau ta’a’ē roa ’o tē parau maira ia mātou ē, ’ua tae i te taime nō Meteta ’ia reva.
’Ua tauturu ato’a tō mātou fa’aro’o ia Iesu Mesia ’e tō mātou ’itera’a pāpū i tāna ’evanelia i te toe’a o tō mātou ’utuāfare ’ia fāri’i i te ’ohipa i tupu. Nō hope noa atura hō’ē hepetoma fa’a’oa’oara’a nā mātou i te pae tino ’e i te pae vārua, terā rā ’a riro ai tō mātou pūhapara’a nō te tau fa’afa’aeara’a ’ei vāhi hunara’a ma’i, ’ua ta’a ’ē roa mātou i te ao nei.
’Ua heva mātou i te fa’aru’era’a mai tō mātou Meteta here—’ua riro ’oia ’ei tumu nō te ’āueue ’ore i roto i tō mātou ’utuāfare, ’e ’ua tītauhia ia mātou ’ia rave i te tahi mau fa’atanotanora’a ma te tai’o ’ore iāna—terā rā i muri a’e i tōna pohera’a, ’ua rahi a’e tā mātou ’āparaura’a i ni’a i te aura’a o tō mātou iho orara’a.
’Ua fa’atumu mātou ia mātou i ni’a i tō tātou Fa’aora ’e i tāna hōro’a hanahana nō te fa’ateiteira’a. ’Ua fa’a’ite mātou i tō mātou māuruuru rahi nō tāna tusia tāra’ehara ’e tāna rē i ni’a i te mēnema. ’Ua riro ïa ’ei taime nō te fa’a’āpīra’a i te pae vārua nō mātou pā’āto’a. ’A ’ohipa ’āmui ai mātou nō te fa’anaho ’e nō te fa’aineine i te arohara’a hope’a o Meteta i te fenua nei, tei ni’a tō mātou mau mana’o i te fa’anahonahora’a nō te fa’aorara’a a tō tātou Metua i te ao ra ’e i ni’a i tāna tamaiti, tei fa’ati’a ia tātou ’ia ’āmui fa’ahou ’e o Meteta i te hō’ē mahana.
’Ua riro tō mātou mau pūhapara’a nō te tau fa’afa’aeara’a o te ’utuāfare ’ei ’ohipa māniania, ’ua ’ī i te pehe ’e te ’ori, te mau ha’utira’a tārēni ta’ata ora, te mau ’atara’a, ’e te ’oa’oa, terā rā, i teie noela ta’a ’ē, e au ē, ’ua marū ri’i te ’oa’oa o tā mātou mau ’areareara’a i raro a’e i te māramarama o te ’oa’oa mau tā to tātou Fa’aora o Iesu Mesia i hōpoi mai ’a fānauhia mai ai ’oia i roto i teie nei ao nō te hōro’a mai ia tātou i te ora.
Nā tō mātou hāro’aro’ara’a i tāna ’evanelia i hōpoi mai i te hau i tō mātou ’utuāfare i muri a’e i te pohera’a o Meteta. ’Ua tauturu te reira ia mātou ’ia ha’amana’o i te aura’a mau o te noela.