2022
Juon Jon̄ak Ekajoor n̄an Kōkaajriri
Jeptōm̧ba 2022

“Juon Jon̄ak Ekajoor n̄an Kōkaajriri,” Liaona, Jept. 2022.

Juon Jon̄ak Ekajoor n̄an Kōkaajriri

Jān Maren Daines, JD, Specialist in Global Family Policy and Program Development, im G. Sheldon Martin, PhD, Licensed Clinical Mental Health Counselor

Pedped ioon katak ko n̄an jipan̄ katakin, jon̄ak in n̄an kōkaajriri emaron̄ jipan̄ tōl eok n̄an ejaake jemdo̧o̧n ko ewōr tokjeer, kōkaajririik tōmak im eddōkļo̧k, im kalōk bōro kuk im iakwe ilo baam̧le eo am̧.

baba eo ej riiti jeje ko rekwojarjar ippān leddik eo nejin

Erom̧ juon pāāren ewōr jibadbad eo n̄an indeeo n̄an maron̄ bōk nōbar, m̧ōņōņō, im lan̄lōn̄. Ak kōnke baam̧le ko rej itok ilo aolep kain jekjek im jon̄ak ko im jelm̧ae apan̄ ko aer make, kōkaajriri ajri ro emaron̄ bar pen im kam̧ōkm̧ōk jet iien.

Jeraam̧m̧an eo in ej bwe, jejjab make iaad ilo jerbal in.

Kōn tōl eo an Jemedwōj Ilan̄, jipan̄ eo an Rilo̧mo̧o̧r im gospel eo An, im kōn im̧we an jar, jemaron̄ lo jipan̄ im kōjatdikdik ilo iaļan kōkaajriri in ad.

Juon Jon̄ak in Kōkaajriri eo me Gospel in ej Rie

Ilo ad ļoore gospel eo an Jisōs Kraist n̄an jipan̄ ekkatak ko kōn kōkaajriri, rijeje ro rej kwaļo̧k jilu pedped in tōl ko n̄an kōkaajririik juon ajri ilo an rūttoļo̧k ilo ānbwin im jetōb. Ilo ad kobaiki ippān doon, eria in ekkatak kein jilu n̄an ejaake juon jon̄ak ekajoor me emaron̄ jipan̄ baam̧le ko ipeļaakin laļin.

Jon̄ak in ekajoor kōnke ej kobaik m̧ool ko an gospel in kōn unin katak ko n̄an kōkaajriri im ekkatak ko kōn an ajri eo eddōkļo̧k. Pukōt revelesōn an juon make n̄an mour kaki pedped in emaron̄ jipan̄ eok kalōk iakwe an baam̧le im ejaake juon em̧ eo ej pedped ilo Jisōs Kraist.

Pedped in katak ko jilu rej:

  1. Ejaake jemdo̧o̧n in iakwe an baam̧le

  2. Kōkaajririik ekkatak im eddōkļo̧k

  3. Kalōk bōro kuk im ekajoor ilo jerbal in jipan̄

Jon̄ak in ejipan̄ kōj lale men ko ewōr tokjeer. Kajjojo m̧ōttan jon̄ak kein eaorōk n̄an kōkajoorļo̧k baam̧le ko ad. Jerbal ippān doon, rej kwaļo̧k jemdo̧o̧n ko im en̄jake ko rem̧m̧an, jipan̄ baam̧le ko ad eļļā jān apan̄, im kalōk juon jon̄ak in iakwe.

Ilo ad rūttoļo̧k āinwōt pāāren ro, jon̄ak in emaron̄ lukkun jerbal n̄an lo kilen katak eo em̧m̧antata n̄an kōkaajririik juon ajri.

Ijin ilaļ ej jidik kōmeļeļe in kajjojo m̧ōttan jon̄ak ko im juon waanjon̄ak jān mour eo an Rilo̧mo̧o̧r n̄an tōl kōj n̄an mour kake jon̄ak in mour ko ad. N̄an meļeļe ko reļļapļo̧k ikkijeen kōkaajririr, jipan̄ ko, im uwaak ko n̄an aolep kajjitōk ko kōn kilen kōkaajriri repād ilo family.ChurchofJesusChrist.org.

1. Ejaake Jemdo̧o̧n in Iakwe an Baam̧le

Pedped in ej kakeememej kōj n̄an likūt im̧aan jemdo̧o̧n in iakwe eo ad ippān Jemedwōj Ilan̄, Rilo̧mo̧o̧r, ro pāleer, im ajri ro nejid. Jemdo̧o̧n kein an baam̧le raorōk. Piktokin ajri ro nejid indeeo im jemdo̧o̧n ko rej eddōkļo̧k kōn pedped in m̧ool eo me “kajjojo ej juōn jetōb jitōnbōro likao im jiron̄ nejin jined im jemed ilan̄, im, ilo āinwōt, kajjojo ewōr juōn mour kwojarjar im jipadpad ippān.”1

Jemaron̄ rōjan̄ er n̄an itok n̄an jeļā kajjien Anij im Jisōs Kraist kōn tōmak, jar, riiti jeje ko rekwojarjar, im revelesōn an juon make jān Jetōb Kwojarjar (lale Jon 17:3). Jemaron̄ kōļapļo̧k ad tōmak n̄an kōkaajririik ajri ro nejid “kōnaan wōt tōmak” (Alma 32:27) im jipan̄ er en̄jake iakwe eo an Anij. Eaorōk bwe ajri ro nejid ren kile bwe Jemedwōj Ilan̄ im Rilo̧mo̧o̧r elukkun jeļā kajjier, lukkuun iakwe er, im kōņaan jipan̄ er bwe ren tōprak (lale Rom 8:38–39).2

Āinwōt pāāren ro, eaorōk n̄an ejaake juon jemdo̧o̧n in iakwe n̄an kajjojo ajri ro me robrak kōn iakwe im kōmmāānwa. Meleļe kōttōbar ko an ajri ro nejid im lukkuun ron̄jake ta eo rej ba ilo tiljek im jemdo̧o̧n in iakwe. Ajri ro nejid rekōņaan jeļā ke eitok limoid ippāer, kea kōn en̄jake ko aer, im maron̄ pād n̄an jipan̄ er. Ad kea in iiaio ippān ajri ro nejid ejipan̄ er kwaļo̧k juon erreim̧aanļo̧k eo em̧m̧an ippāer make, kile aorōk eo aer, im ejaake jemdo̧o̧n ko ippān Anij im Jisōs Kraist.

Ilo kakobaba, ro uwaan baam̧le eo remaron̄ lukkuun jipan̄ doon. Jemaron̄ kwaļo̧k jemdo̧o̧n ko an baam̧le ilo ad kuk im ekkeijel ippān doon, jar, kapilōk, im bōk limoin doon.

Reilo̧k n̄an Kraist

Jisōs Kraist ekar kwaļo̧k An iakwe, juon ilo̧k juon, kōn juon jemdo̧o̧n eo me ekar leļo̧k iakwe, kōjatdikdik, im kōmour. Ālkin an Rilo̧mo̧o̧r kar kōnono n̄an riNipai ro, Eaar ilo̧k im make kwaļo̧k n̄an kōmour im kōjeraam̧m̧an kajjojo. An kwalok an tūriam̧o “eaar bōk ro re dik nejier, juon ilo̧k juon, im kōjeram̧m̧an er, im jar n̄an Jemān kōn er” (3 Nipai 17:21).

Ainwōt juon pāāren, komaron̄ kōjeraam̧m̧an ro nejūm̧ n̄an en̄jake juon jemdo̧o̧n in iakwe ippāer—jidik kōn jidik emaron̄ ejaake juon ekkeijel ewōr tokjen.

Ļōmņak ko n̄an Ejaake Jemdo̧o̧n in Iakwe an Baam̧le

  • Kōnono ippān ajri ro nejūm̧ ilo am̧ lukkuun ron̄jake, uwaak ilo iakwe, im ļoor kōttōbar ko aer n̄an tōpar aikuj ko aer.

  • Kōkaajriri tōmak ilo Jemedwōj Ilan̄ im Jisōs Kraist im kōketak jar im revelesōn an juon make n̄an kōkajoorļo̧k jemdo̧o̧n kein rekwojarjar.

  • Kea kōn eok make im m̧are eo am. Menin enaaj jipan̄ eok n̄an ekkeijel ippān ajri ro nejūm̧ im n̄an pāāren ro im ippān eo pāleem ilo bōro kuk im iakwe, āinwōt jet paatnōr ro rej juon wōt. N̄e ejjeļo̧k pāleem, tōl baam̧le eo am̧ kōn tōmak im lōke. Kappukot jipan̄ ko jān ro kwoj lōke er.

  • Kwaļo̧k kōjparok, jokne, im lan̄lōn̄ ilo m̧weeo im̧ōm̧.

2. Kōkaajririik ekkatak im eddōkļo̧k

jinen im jemān ajri ro rej kōnono ippān leddik eo nejier

Kōkaajririik eddōkļo̧k eo an ajri eo nejūm̧ ilo am̧ kile im kaorōk m̧wiļ ko aer rejenoļo̧k jān doon, leļo̧k n̄an er iakwe eo etinkwadik, im rie kijejeto ko aer. Lale ia eo ajri ro nejūm̧ repād ie ilo eddōkļo̧k eo aer im leļo̧k jipan̄ eo am̧ ekkar n̄an aikuj ko aer. N̄an waanjon̄ak, kōmeļeļe, tōl, im naan in rōjan̄ raorōk n̄an kōkaajririik maron̄ im lōke eo an ajri eo nejūm̧. Kwaļo̧k an itok limoim ilo an ajri eo nejūm̧ ekkatak kōn mour.

Jinen im jemān ajri ro rej kōkaajriri rej kajejtokjen lukkuun kōņaan ilo jab ju bōro, tarjen jon̄an anemkwoj in m̧wil, ak kaorōk ilo m̧oņ. Leļo̧k jon̄ok ko rekkar, jikejuuļ ko remakijkij, im kōjatdikdik ko rekkar renaaj lōn̄aj eddōkļo̧k eo an ajri eo nejūm̧. Āinwōt Jemedwōj Ilan̄, pāāren ro rej aikuj mije eļapļo̧k n̄an katakin ajri ro nejier jān aer boub (lale 2 Nipai 28:30; Katak im Bujen Ko 50:24, 40).

Tōl er, ļoor er, im etetal ippān ajri ro nejūm̧ ilo aer ekkatak n̄an ļoor Jisōs Kraist.3 Katakin er kilen oktakļo̧k n̄an Rilo̧mo̧o̧r im pedped ioon Pinmuur eo An n̄an jipan̄ er eddōkļo̧k. Ajri ro nejūm̧ renaaj jidik kōn jidik loi waanjon̄ak eo am̧ im aer en̄jake ekkatak bwe remaron̄ “kōm̧m̧an men otemjeļo̧k ilo Kraist,” eo ej jeo̧rļo̧k bōd im kōkajoor er (Pilippai 4:13). Eddōkļo̧k im oktak emaron̄ pen im ebōk iien. Mour jim̧we, pāāren ro rej kōm̧m̧an iien ippān ajri ro rej kajjieon̄ n̄an katakin ajri ro aer ejjab wāween wōt “etetal ilo iaļ ko rem̧ool,” (Mosaia 4:15) ak bar etke raikuj kōm̧m̧an āindein. Kōkaajriri aer meļeļe im jipan̄ mour jim̧we eo aer n̄an kōjerbal anemkwoj ilo kajjojo bun̄tōn ko rej bōke.

Reilo̧k n̄an Kraist

Jisōs Kraist ej kōkajoorļo̧k am̧ eddōkļo̧k ilo An kalimjōk ikdeleel ko rejim̧we ilo buruōm̧ im jipan̄ eok kōttōpraki (lale 1 Samuel 16:7; Inōs 1:12). Irooj ekar kajjitōk ippān rijilōk ro An “juon ilok juon … : Ta eo kom̧ij kōņaan jān Eō?” (3 Nipai 28:1; bar lale 1 Nipai 11:1–). Lale kajjitōk in emaron̄ jipan̄ eok loe im kōļapļo̧k ta eo eaorōk ippam̧. Lale elmen an Irooj kar rōjan̄ n̄an ekkatak im eddōkļo̧k ippān ļeo jein im jatin Jared n̄an kautiej anemkwoj in kelet eo an im kajjitōk, “Ta kwo kōņaan bwe in kōm̧m̧ane?” (Ether 2:23). Irooj eaar jipan̄ e n̄an leļo̧k kōmeļeļe ko rekkar, n̄e kar aikuji, ak ekar bar rōjan̄ e bwe en make pukoti men ko. Rilo̧mo̧o̧r ejjab kipel ak peek eok ak ej katakin im rōjan̄ eok n̄an kōjerbal anemkwoj eo am̧ make n̄an em̧m̧an (lale Katak im Bujen Ko 58:26–28).

Rōjan̄ eddōkļo̧k eo an ajri ro nejūm̧ n̄an jipan̄ ikdeleel ko rejim̧we an buruōwer—juon kajjitōk eo ewōr tokjen ilo juon allen.

Ļōmņak ko n̄an Kōkaajririik ekkatak im eddōkļo̧k

  • Tōl ajri ro nejūm̧ n̄an Jisōs Kraist im katakin er kile bōk kajoor eo an Pinmuur eo An.

  • Ļoor Jisōs Kraist ilo leļo̧k iakwe, tōl, jipan̄, im tūriam̧o ilo an ajri ro nejūm̧ ekkatak n̄an ļoor E.

  • Kōkaajririi eddōkļo̧k n̄an jipan̄ ajri eo nejūm̧ meļeļe, maron̄, anemkwoj, im lōke.

  • Itok n̄an Kraist ilo ekkatak gospel eo An im jim̧or mour kaki ilo am etal wōt ilo iaļan bujen in.

3. Kalōk Bōro Kuk im Kajoor ilo Jerbal in Jipan̄

an baam̧le eo bōkļo̧k m̧ōn̄ā n̄an baam̧le eo juon

Jisōs Kraist ekar kwaļo̧k n̄an rijilōk ro An n̄an “Yokwe doon, āinwōt Iar yokwe kom̧” (Jon 13:34). Ilo am̧ kaenōm̧m̧an, lōn̄aj, im jerbal n̄an ro jet, kwoj kwaļo̧k iakwe eo erreeo an Kraist n̄an erom̧ eļapļo̧k āinwōt E. Anij ekar bar letok elōn̄ iien ko raorōk n̄an ajri ro nejūm̧ n̄an ekkatak im eddōkļo̧k n̄an kobatok ilo jerbal in An im kakūrm̧ool kallim̧ur ko aer n̄an jerbal n̄an ro jet (lale Moses 1:39; Mosaia 18:7–11). Kwaļo̧k iakwe an Kraist im kajedeed meram eo An n̄an er im ro rej jerbal n̄an er.

Baam̧le eo am̧ renaaj bar jeraam̧m̧an n̄an pād ilo juon ward ak branch ijo ajri ro nejūm̧ rej kwaļo̧k iakwe im bōk iakwe im jipan̄. Kobaik būruwōm̧ “ippān doon ilo bōro kuk im ilo iakwe n̄an doon ” (Mosaia 18:21) kapen jemdo̧o̧n ko im en̄jake ko rem̧m̧an me rej kōkajoorļo̧k baam̧le eo am̧. N̄e kwoj jerbal n̄an ro jet kōn Mour āinwōt Kraist ilo iakwe, komaron̄ jipan̄ kalōk Zaion ilo baam̧le eo am̧ im ilo juon jukjukin pād eo eļap (lale Moses 7:18).

Katakin ajri ro nejum̧ bwe jerbal in jipan̄ emaron̄ juon imminene kajjojo raan ijeļo̧kin juon būroojāāk. Kajjieon̄ n̄an jerbal n̄an doon enaaj jipan̄ ajri ro im jodikdik ro lo eļapļo̧k n̄an kakūrm̧ool mour ilo aer lale make aikuj ko aer n̄an aikuj ko an ro jet. Ekabwilōn̄lōn̄ kilen kalōk Zaion bwe Zaion ej kalōk armej.

Reilo̧k n̄an Kraist

Rilo̧mo̧o̧r ej kūr kōj kajjojo n̄an iakwe im jerbal n̄an ro jet (lale Jon 13:34–35). Bōk koņaad ilo jerbal in lo̧mo̧o̧r in an Jemedwōj Ilan̄ ej kōkajoorļo̧k im ukōt kōj. N̄an kōm̧m̧ane “em̧m̧an [In] pād ilo im̧ōn Jema” (Luk 2:49) ekar m̧ōttan eddōkļo̧k eo Jisōs ekar en̄jake ke Ej jodikdik ilo An kar “ļapļo̧k ilo An mālōtlōt im rūtto, im ilo jouj ippān armej im Anij” (Luk 2:52).

Jej aiintok Israel ilo ad bōk koņaad ilo jerbal in lo̧mo̧o̧r im mour eo eutiejtata ilo ad mour kōn gospel eo an Jisōs Kraist, kea kōn aikuj ko an ro jet, karuwaineneik aolep n̄an bōk gospel eo, im kakobaik baam̧le ko n̄an indeeo.4

Kōkaajririik eddōkļo̧k eo an ajri eo nejūm̧ n̄an kobaiki ilo “jerbal eļap” eo an Anij (Katak im Bujen Ko 64:33)—jidik kōn jidik ilo iakwe kōn jerbal in jipan̄.

Ļōmņak ko n̄an Kalōk Bōro Kuk im Kajoor ilo Jerbal in Jipan̄

  • Kwaļo̧k am̧ iakwe Anij im itok n̄an jeļā E kōn iakwe im jerbal n̄an ro Nejin.

  • Iakwe do̧o̧n ilo jerbal in karejar n̄an ro ipeļaakūm̧ im kea kōn ro rej aikuj.

  • Aiintok Israel ilo kwaļo̧k gospel in, kōm̧m̧ane menmenbwij an baam̧le eo am̧, jerbal ilo tampeļ, im jipan̄ ro jet kōm̧m̧ani im kōjparok bujen ko.

  • Kalōk bōro kuk im kwaļo̧k kajoor ilo leļo̧k iakwe, kwaļo̧k jokne, im jipan̄ do̧o̧n.

Mour kake Jon̄ak in ilo M̧weo Im̧ōm̧

Pedped in tōl kein remaron̄ jipan̄ eo mije kōkaajriri eo am̧ kajjojo raan. N̄an waanjon̄ak, rainin komaron̄ ļōmņak kilen am̧ maron̄ ejaake ilo kōttōbar juon jemdo̧o̧n in iakwe eļap, kōkaajriri ekkatak, ak kalōk ro jet. Mour kake jon̄ak in emaron̄ kōļapļo̧k gospel in ekkatak, kōkaajririik eddōkļo̧k eo make an ajri ro nejūm̧, im rōjan̄ n̄an mije eļapļo̧k me enaaj lōn̄aj im kōjeraam̧m̧an baam̧le eo am̧. Mour kake pedped kein emaron̄ bar kōkm̧anm̧anļo̧k am̧ kōjerbal menin jipan̄ ko an Kabun̄ in āinwōt Itok, Ļoor Eō im būrookuram̧ ko an Ajri im Jodikdik ro.

Elōn̄ wāween ko n̄an mour kaki pedped ko ilo jon̄ak in. Kwon pād im kappukot revelesōn an juon make n̄an kobaik er n̄an aikuj ko an baam̧le eo am̧. N̄an “ejaake, kōkaajriri, kalōk” jon̄ak in ejjab ekkar n̄an kōm̧m̧an eļapļo̧k. Emaron̄ wōr men ko kwoj en̄jake reim̧we n̄an kobaiki n̄an ta eo kwoj kōm̧m̧ane, jon̄ak in ej n̄an jipan̄ eok kōm̧m̧ane iien eo ami ippān do̧o̧n em̧m̧antata.

N̄e kwoj kōm̧m̧an aolep men n̄an ejaak jemdo̧o̧n in iakwe, kōkaajriri ekkatak im eddōkļo̧k, ak kalōk bōro kuk ilo jerbal in jipan̄, kwoj ekkal ioon juon pedped eo em̧m̧an kōn aolep men ko kwoj kōm̧m̧ani ilo m̧weeo im̧ōm̧.

Jinen im Jemān Ajri ro Rem̧m̧an Rej Ro Jej Kōjatdikdik Kake Er, Rejjab Wāppen

Emenin aikuj n̄an keememej bwe kwojjab aikuj in wāppen n̄an erom̧ juon jinen im jemān ajri em̧m̧an. Ijoke, kajjieon̄ leļo̧k jipan̄ ilo iakwe im jipan̄ n̄an ajri ro nejūm̧. Kajjieon̄ bōk koņaam ippān ajri ro nejūm̧ ilo wāween ko reddik me emaron̄ kōm̧m̧ane juon oktak eo eļap.

N̄e pāāren ro rej en̄jake ebweer, keememej in bōk kūtuwōm̧, kakkijeik eok make jidik, im bar kajjieon̄. Komaron̄ bun̄ m̧aanļo̧k wōt kōn tōmak jeļā bwe Rilo̧mo̧o̧r ej lukkuun kea kake eok im ajri ro nejūm̧ im naaj kōļapļo̧k kijejeto ko am̧ im ikdeleel ko rejim̧we.

Kōjatdikdik ilo Kraist

Ilo am̧ kajjieon̄ dim n̄an kōm̧m̧ani aolep men ko rem̧m̧an ippam̧, kōjatdikdik, im kōkajoor kajjojo ajri, juon ilo̧k juon, kwe im baam̧le eo am̧ remaron̄ bōk kōjatdikdik ilo Kraist kōnke kallim̧ur eo An indeeo n̄an eok: “Jab mijak, ajri reddik, bwe kom̧ij Aō, im em̧ōj Aō anjo̧ ioon laļ” (Katak im Bujen Ko 50:41).