“Tōl jān Rikanaan ro Remour,” Liaona, Jept. 2022.
Pedped ko Im̧aan Tata an Gospel in
Tōl jān Rikanaan ro Remour
Rikanaan ro rej em̧m̧aan ro kar kūr jān Jemedwōj Ilan̄ n̄an kōnono kōn E. Rej kam̧ool kōn Jisōs Kraist im kwaļo̧k gospel eo An. Ro uwaan Kabun̄ eo an Jisōs Kraist im Armej ro Rekwojarjar ilo Raan Ko Āliktata im rej tōmak jim̧or ilo rikanaan ro etto im raan kein.
Anij ej Kōnono ilo Rikanaan ro
Rikanaan ro rej bōk revelesōn jān Anij. N̄e rikanaan ro rej im̧we n̄an katakin kōj, ejjeļo̧k oktak n̄e Anij ekar kōnono n̄an kōj (lale Katak im Bujen Ko 1:38). Jemaron̄ lōke bwe remaron̄ jiron̄ kōj ta eo Anij ekōņaan bwe jen jeļā.
Rikanaan ro rej Kwaļo̧k kōn Jisōs Kraist.
Mormon Ej Kalbwin Pileij ko, jān Tom Lovell
Aolep rikanaan ro rej kam̧ool kōn Jisōs Kraist. Rej katakin kōj bwe E ej Nejin Anij. Rej katakin kōj kōn mour eo An, waanjon̄ak, im Pinmuur. Im rej kwaļo̧k n̄an kōj elmen ļoor E im pokake kien ko An.
Eddo ko an Rikanaan ro
Rikanaan ro rej kwaļo̧k gospel eo an Jisōs Kraist. Rej kōmeļeļeiki kōjeraam̧m̧an ko jej būki n̄e jej pokake kien ko im jekjek ko jej būki n̄e jejjab. Ilo iien ko, remaron̄ im̧we n̄an jiron̄ kōj kōn men ko rej waļo̧k ilju im jeklaj.
Rikanaan ro Etto
Moses im Dekā ko, jān Jerry Harston
Anij ekar katakin armej ro kōn rikanaan ro jān jinoin. Rikanaan ro rekar mour ilo Kallim̧ur M̧okta tōre ko ekoba Adam, Noa, Ebream, Moses, Aiseia, im ro jet. Ekar bar wōr rikanaan ro ibwiljin armej ro ilo Bok in Mormon. Rikanaan rein ekoba Liai, Mosaia, Alma, im Moronai. Jemaron̄ jeļā ta eo rekar katakin jān riiti jeje ko rekwojarjar.
Rikanaan ro Raan Kein
Josep Smith ekar rikanaan eo jinointata ilo raan kein. E ekar kōjepļaaktok Kabun̄ eo an Jisōs Kraist n̄an laļ in. Russell M. Nelson ej rikanaan im Būreejtōn eo an Kabun̄ in rainin. Rikakpilōklōk ro an ilo Būreejtōnji eo Kein Kajuon im Doulul eo an Jon̄oulruo Rijilōk ro rej bar rikanaan ro, rilolo ro, im rikwaļo̧k revelesōn ro.
Ron̄jake Rikanaan eo
Rikanaan eo ej kōnono n̄an kōj ilo kweilo̧k eo eļap im iien ko jet. Ej katakin kōj ta eo Anij ekōņaan bwe jen jeļā im kilen ļoor Jisōs Kraist rainin. Jemaron̄ lo katak ko an ilo Liaona im ilo ChurchofJesusChrist.org.
Kōjeraam̧m̧an ko n̄an Ļoor Rikanaan eo
Jenaaj jeraam̧m̧an n̄e jej ļoor katak ko an rikanaan eo. N̄e jej ļoor rikanaan eo, jemaron̄ jeļā bwe jej kōm̧m̧ane ta eo Anij ekōņaan bwe jen kōm̧m̧ane. Jemaron̄ en̄jake aenōm̧m̧an ilo mour ko ad im epaakeļo̧k Jisōs Kraist.