“Kōtļo̧k bwe Irooj en Tōl Mour eo Am,” Liaona, Jept. 2022.
Rūm̧m̧an Ded ro
Kōtļo̧k bwe Irooj en Tōl Mour eo Am
Iban lo wāween an men kein kōm̧m̧an aolep iien, ak n̄e ij mour kōn tōmak, Irooj ej kōjeraam̧m̧an eō.
Kabun̄ ekar jab emejaja ilo m̧weeo im̧ōm̧ ke ikar rūttotak—men̄e ro jinō im jemā rekar lukkuun ritōmak ilo aolepen mour ko aer, kōn an jema kar nan̄inmej, ippān apan̄ ko jet, ekōm̧m̧an bwe ren etal jān kabun̄ eo rekar rūttoļo̧k ie. Ekar emen aō iiō ke ekar mej kōn kāānjōr im n̄a kar diktata iaan ajri ro 13, im jinō eo emej ļeo pāleen ekar jab tōmak ke Anij emaron̄ kar kōm̧m̧an āindein n̄an baam̧le eo ammim.
Ak ke eaar 14 aō iiō, ikar en̄jake ke ejako jet men ilo mour eo aō. Ikar ļōmņak n̄e ekar wōr aō jibadbad eļap me ikar jab jeļā kake. Ikar en̄jake āinwōt Josep Smith, ke “aō ļōmņak kar ļujuri n̄an kanooj kejokļo̧kjeņ im eļal jako̧n” (Josep Smith—Bwebwenato 1:8). Men̄e ikar jab ron̄ jān Josep Smith ilo iien eo, ikar jino pukote m̧ool eo āinwōt e im kobaļo̧k ilo elōn̄ im̧ōnjar ko ilo kōjatdikdik bwe inaaj lo m̧ool eo.
Im ikar loe, juon raan, ke iaar lo ruo likao ro rej jōōt im etal n̄an m̧weeo im̧ōn ro riturū. Ikar kajju kajjitōk ippāer n̄e imaron̄ etal ippāer n̄an aboinmen eo aer. Ālkin bōk mālim jān m̧am̧a, ikar jino ekkatak ippān mijinede ro im aaet kar kobatok ilo Kabun̄ in.
Kobatok ilo Kabun̄ eo an Jisōs Kraist im Armej ro Rekwojarjar ilo Raan Ko Āliktata ekar jipan̄ eō lo jibadbad eo aō, eļaptata ilo iiō in rūm̧man ded eo aō ke iaar kōm̧m̧ani elōn̄ jokālet ko me armej ro ipeļaakū rekar jab errā ippa kaki. Ak men̄e ekar wōr aō jibadbad im tōl, ikar jab aolep iien jeļā elmen an men ko naaj kar bōk jikier.
Ijoke, ke iaar jelm̧ae men ko jab jeļā kaki im elōn̄ apan̄ ko, tōl an Jemedwōj Ilan̄ ekar jipan̄ ke iaar oktakļo̧k n̄an E. Iaar jeļā jet wāween n̄an pedped ilo E im ilo tōmak eo aō me ekar jipan̄ eō wōnm̧aanļo̧k wōt n̄an pukot jibadbad eo aō.
Wōnm̧aanļo̧k n̄an juon Mijen
Ilo iiō eo me enan̄in aolep ro m̧ōtta rekar kōppopo n̄an etal n̄an college, ikar ļōmņak elmen aō tin etal n̄an mijen. Ilo Chile, aolep rej aikuj bōk juon teej m̧okta jen aer etal n̄an univeristy. Ej kōm̧m̧an juon katten ilo juon iiō, kōn menin n̄e inaaj etal n̄an mijen, iban karum̧wijļo̧k wōt aō jikuuļ ilo ruo iiō ak barāinwōt inaj kōttar bar juon iiō im etal n̄an jikuuļ ālkin wōt.
Baam̧le eo aō, eļaptata jinō, ekar jum̧ae mijen eo. Ekar lukkuun aorōk ippān bwe in jikuuļ ilo college. Ak ikar tōmak bwe Irooj enaaj jipan̄ eō kōm̧m̧an ta eo ekkar, kōn menin ikar lukkuun jino jar wōt ilo aō kōppopo.
Ke bisop eo ekar itok n̄an m̧weeo im̧ō n̄an kadedeļo̧k peba in mijen eo aō im kar kajjitōk ippān jinō n̄an jaini, ekar bwilōn̄, ikar jab ba n̄an e ke ij wōnm̧aanļo̧k wōt im kōm̧m̧ani. Ekar bōk jidik iien n̄an kōmeļeļe, ak Irooj ekar kapidodoik būruwōn im kar jipan̄ e bwe en meļeļe ke ikar kōņaan jerbal.
Gospel in ekar letok n̄an eō jeļā ke ikar kōm̧m̧ane men eo ejim̧we, ak men eo wōt ij aikuj kar wōnm̧aanļo̧k wōt, jidik kōn jidik, kōn tōmak—kōn aolep aō kajjitōk im pere— ikar wōnm̧aanļo̧k wōt kaki.
Ļoor Revelesōn im bar Revelesōn
Ro̧o̧l n̄an kapijuknen jān mijen eo aō ekar bar meļeļein ro̧o̧l im jab jeļā ta. Ke ij kappukot tōl jān Jemedwōj Ilan̄ ilo jar im jitlo̧k, iaar bōk revelesōn eo ikar aikuji n̄an em̧akūt n̄an United States in jikuuļ ilo Brigham Young University, eo me ekar juon em̧akūt eo epen.
Ikar kōm̧m̧ane ijo em̧m̧antata imaron̄ n̄an bōk bun̄ten ko rem̧m̧antata. Jet iien ikar en̄jake āinwōt n̄e ijebwebwe—ikar lukkuun jerbal jon̄an wōt aō maron̄, ak ikar jab lukkuun jeļā n̄e kijejeto ko aō renaaj kar jipan̄ eō tōpar kōttōbar ko aō. Ijoke, kōttōbar eo aō eļap ej n̄an ļoor ta eo Irooj ekōņaan bwe in kōm̧m̧ane, im bwe kōttōbar in ekar aorōk n̄an eō.
Ke ikar kōm̧m̧ani kijejeto kein, juon raan ikar m̧weiur n̄an pukot ļo̧k juon m̧ōtta eo ekar jān United States im ej jokwe ilo bukwon eo aō. Ikar jab jeļā elmen an men ko kar waļo̧k iien eo—ikar baj pukotļo̧k ilo an Jetōb kar tōl eō—ak eo m̧ōtta im jemān rekar lukkuun jipan̄ eō jeļā ta eo in jerbale n̄an bōk visa eo ij aikuji n̄an jikuuļ ilo BYU. Kōn jipan̄ eo aer im wūjlepļo̧k eo eļap an jinō n̄an kōļļāiki wōņāān aō ito-itak, ikar maron̄ tōpar ijo. Ekar juon menin bwilōn̄.
Mour eo aō eaar em̧m̧anļo̧k ilo ejja jekjek eo wōt. Ikar kōm̧m̧ane ijo em̧m̧antata innām bōk im̧we, juon men ilo juon iien, n̄an ta eo tokālik ij aikuj kōm̧m̧ane. Ilo wāween in, ikar bōk juon jerbal ilo missionary training center eo, lo wāween ko n̄an kōļļāik wōnāān aō jikuuļ, kālet juon major, aaet kar kadiwōjļo̧k, im m̧are.
Uwaak ko ikar būki rekar jab aolep iien m̧ōkaj im ekar ejjeļo̧k aō karōk ejejjet, ak ikar jeļā bwe Irooj ekar m̧ōņōņō ippa kōn iaļ eo ikar jibadōke.
N̄e Revelesōn Ejjab Alikkar
Jet iiō tokālik, iaar jeļā elmen wujlepļo̧k eo eaorōk n̄an mour kake gospel in. N̄e jej kōņaan bwe Irooj en letok n̄an kōj jibadbad im tōl, jej aikuj in bōk tōl in.
Ālkin jikuuļ, men ko rekar jab waļo̧k ekkar n̄an karōk eo ilo kombani eo ikar jerbal ippān, kōn menin ekar wōr ruo am̧ro kōrā eo ippa kālet: pād wōt ilo United States ak ro̧o̧l n̄an Chile. Kom̧ro jim̧or kar en̄jake ke kōmij aikuj ro̧o̧l n̄an Chile. Emaron̄ in kar jejjet eo in n̄an ro̧o̧ļ n̄an lām̧oreen, ak ekar lukkuun juon iien epen. Ejabwe jerbal ilo Chile. Ekar pen aō wiakake m̧weeo m̧ōm̧mim. Jāān im men ko jet, ekar jab juon men epidodo n̄an kōm̧m̧ane; em̧ool baam̧le ko am rekar ļōmņak kom̧ro bwebwe.
Ta eo kwoj kōm̧m̧ane n̄e revelesōn eo itok ilo epoktak ippān ļōmņak eo em̧m̧an? Men̄e ekar pen, kom̧ro kōrā eo ippa kar jeļā ta eo n̄an kōm̧m̧ane. Kōm kar kakeememej kōm make bwe gospel in ekar bōktok kōj n̄an ijjo jeped ie rainin. N̄e eban Irooj, iban kar bōk im̧we eo ekar jipan̄ eō n̄an etal im mijen, bōk aō jeļāļo̧kjeņ, im ioon kōrā eo ippa. Kom̧ro ej aikuj lōke jekdo̧o̧n jabdewōt un, Chile ej aikuji kom̧ro.
Kom̧ro kar leļo̧k m̧weeo m̧ōm̧ro n̄an bisop eo am bwe en rene m̧ae iien emaron̄ wia kake, im kom̧ro kar etal. Ekar pen, ak kom̧ro kar ioon elōn̄ kōjeraam̧m̧an ko im kabwilōn̄lōn̄ ko n̄e jej ļoor kūr ko an Irooj. Irooj ejeļā ia eo eļap aikuji kōj ie im ijo jemaron̄ jerbal n̄an E ilo kōttōbar ko, im E ej kōjeraam̧m̧an kōj ilo ad pokake.
Pukot Uwaak ko ilo Irooj
Ij kōjatdikdik bwe rūm̧m̧an ded ro rainin renaaj ļoor waanjon̄ak eo an ļeo jein im jatin Jared. Men̄e RiJared ro rekar jeļā rej aikuj etal n̄an āneen kallim̧ur, rekar jab jeļā elmen aer maron̄ etal n̄an ijeņ. Ke ļeo jein im jatin Jared “kar kūr ioon etan Irooj” (Either 2:15), E ekar leļo̧k n̄an e jet uwaak ko. Irooj eaar ba n̄an e bwe en jek baaj ko im kar leļo̧k n̄an e tōl n̄an kilen an kōm̧m̧an wūntō ilo baaj ko.
Innām Irooj eaar kajjitōk ippān ļeo jein Jared kajjitōk in: “Ta kwo kōņaan bwe in kōm̧m̧an bwe en wōr ami meram ilo wa ko?” (Ether 2:23). Ijeļļo̧kin ba n̄an ļeo jein im Jatin Jared lukkuun ta eo en kōm̧m̧ane, Irooj eaar kajjitōk ippān bwe en etal im pukot uwaak ko n̄an e make.
En̄in kar wāween an mour eo aō kar jerbal. Jet iien Irooj ej letok n̄an eō kōmeļeļe ko ralikkar. Iien ko jet Ej kōttar bwe in itok n̄an E kōn ļōmņak ko aō. Jekdo̧o̧n ia, ijoke, eaorōk bwe in kobaik E ilo em̧m̧akūt in. Jitlo̧k, jar, im kapilōk ippān Irooj rej bun̄ten ko raorōk n̄an jabdewōt ro rej kajjieon̄ in kōm̧m̧ani kālet ko kōn mour ko aer.
N̄an jabdewōt rūm̧m̧an ded ro rej kappukot eļapļo̧k jibadbad, ij lewaj kapilōk in: Oktaļo̧k n̄an Irooj kōn revelesōn an juon make. En Emakijkij am̧ lale kōjeraam̧m̧an in petriak eo am̧. Im kajjieon̄ in kaarmejete men ko ejjeļo̧k tokjeer ilo mour eo am̧ n̄e Irooj ej ba n̄an eok ke E ewōr an jibadbad eļap n̄an eok.
Ij iakwe Irooj. Gospel in ej men eo eaorōk n̄an eō. Ijeļā bwe Irooj ej lo aorōk eo am̧ im kōņaan jipan̄ eok tōpar jibadbad eo am̧ indeeo.