Muimui ki he Palōfitá
ʻE Fakaava Mai e Ngaahi Matapā Fakalaumālié: Ko e ngaahi pōpoaki kau ki he temipalé meia Palesiteni Nalesoní
Te ke ako ai ki he founga hono toʻo ʻo e veili ʻi he vahaʻa ʻo e langí mo e māmaní, founga ke kole ai ki he kau ʻāngelo ʻa e ʻOtuá ke tokoniʻi koé, mo e founga lelei ange ke maʻu e fakahinohino mei langí.
Naʻe pehē ʻe hotau palōfita mo e Palesiteni ko Lāsolo M. Nalesoní ʻi he Konifelenisi Lahi ʻo ʻOkatopa 2018, “Tau sio leva he taimí ni ki he kaveinga ʻo e ngaahi temipalé.”
ʻI heʻene fakahinohino toputapu ki he founga te tau lava ke hoko ai ko ha Kāingalotu faʻifaʻitakiʻanga leleí, naʻá ne toki fakalotolahiʻi kitautolu ke liliu hotau ngaahi ʻapí ke hoko ko ha senitā ki hono ako ʻo e ongoongoleleí mo fakamanatu mai kiate kitautolu ʻa e mahuʻinga ʻo hono ui totonu e hingoa ʻo e Siasi hotau Fakamoʻuí: Ko e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní.
Pea naʻá ne kole mai leva ʻi he loto-ʻofa ki he kāingalotu kotoa pē ʻo e māmaní ke nau fakamuʻomuʻa e temipalé.
Naʻá ne pehē: “ʻOku tau ʻiloʻi ʻoku mahuʻinga hotau taimi ʻi he temipalé ki hotau fakamoʻuí mo e hakeakiʻí kae pehē ki hotau fāmilí.”
“Hili ʻetau maʻu hotau ngaahi ouau fakatemipalé mo fai ha ngaahi fuakava toputapu mo e ʻOtuá, ʻoku tau takitaha fiemaʻu ke hokohoko atu e fakaivia mo e akoʻi fakalaumālie ko ia ʻoku toki malava pē ke maʻu ʻi he fale ʻo e ʻEikí. Pea ʻoku fiemaʻu ʻe heʻetau ngaahi kuí ke tau fakafofongaʻi kinautolu.
“Fakakaukau angé ki he mohu ʻaloʻofa mo e anga totonu ʻa e ʻOtuá, ʻa ia naʻá Ne ʻomi ha founga ke foaki mai ai e ngaahi tāpuaki ʻo e temipalé kiate kinautolu ne pekia teʻeki ke nau ʻilo e ongoongoleleí. Ko e ngaahi ouau fakatemipale toputapu ko ʻení ko e tukuʻau mai ia mei he kuonga muʻá. ʻOku fakafiefia ʻene fakakuongamuʻá pea ko ha fakamoʻoni ia ʻe taha ʻo ʻene moʻoní.
“Siʻi kāinga ʻofeina, ʻoku fakautuutu pē ʻoho ʻa e filí, pea fakalalahi hono mālohí mo kehekehe. ʻOku toe fakautuutu ange ʻa e fiemaʻu ke tau ʻalu maʻu pē ki he temipalé. ʻOku ou kole atu ke mou tuku ha taimi ke mou vakai fakalelei ai ki he anga hono fakaʻaongaʻi ho taimí. Fakaʻaongaʻi lelei ho taimí koeʻuhí ko ho kahaʻú mo ho fāmilí. Kapau ʻokú ke lava ʻo ʻalu ki he temipalé, ʻoku ou tapou atu ke ke feinga ke ke fetuʻutaki maʻu pē mo e ʻEikí—ʻo ʻalu ki Hono fale māʻoniʻoní—pea tauhi pau maʻu pē taimi ko iá ʻi he fiefia. ʻOku ou palōmesi atu ʻe ʻomi ʻe he ʻEikí ha ngaahi mana ʻokú Ne ʻafioʻi ʻokú ke fiemaʻu ʻi hoʻo feilaulau ke tokoni mo moihū ʻi Hono temipalé.”1
Ne pehē ʻe Palesiteni Nalesoni ʻi haʻane lea ueʻi fakalaumālie ʻe taha, “Ko e hoko pē ha faʻahinga palopalema ʻi hoʻo moʻuí, ko e feituʻu malu taha te ke ʻi ai fakalaumālié ke moʻui ʻi loto ʻi hoʻo ngaahi fuakava fakatemipalé.”2
Ne kamata ʻene leá ʻaki ʻene fakamatalaʻi e ngāue faingataʻa lahi ʻoku fiemaʻu ke fakafefekaʻi ʻaki e fale fakahisitōlia ko ia ʻo e Temipale Salt Lake—ke ʻau ki he Nofo Tuʻí—ke ne matuʻuaki ʻa e ngaahi mālohi ʻo natulá. Pea naʻá ne fakamatalaʻi e mahuʻinga kiate kitautolu ke tau fakamālohia hotau ngaahi fakavaʻe fakalaumālie fakafoʻituituí, koeʻuhí ʻi he taimí ni ʻo laka ange ʻi ha toe taimi kimuʻa, ʻoku lahi ange hono fakamanamanaʻi ʻe he ngaahi haʻahaʻa ʻo e moʻuí hotau tuʻunga fakamoʻui taʻengatá.
“Siʻoku kāinga ʻofeina, ko e ngaahi ʻaho fakaʻosí ʻeni. Kapau ʻe fiemaʻu ke ta matuʻuaki e ngaahi faingataʻa mo e haʻahaʻa ʻe hokó, ʻoku mahuʻinga ke tau takitaha maʻu ha fakavaʻe fakalaumālie mālohi kuo langa ʻi he maka ʻo hotau Huhuʻi ko Sīsū Kalaisí” (vakai Hilamani 5:12).
“Ko ia, ʻoku ou fehuʻi atu kiate kimoutolu takitaha, ko e hā hono mālohi hoʻo fakavaʻé? Pea ko e hā ha ngaahi fakaivia ʻoku fiemaʻu ki hoʻo fakamoʻoní mo e mahino ki he ongoongoleleí?
“ʻOku kau ʻa e temipalé ʻi he uho ʻo hono fakamālohia ʻo ʻetau tuí mo e ivi fakalaumālié he ko e Fakamoʻuí mo ʻEne tokāteliné, ko e ʻelito moʻoni ia ʻo e temipalé. Ko e meʻa kotoa ʻoku akoʻi ʻi he temipalé, ʻi he fakahinohinó pea ʻi he Laumālié, ʻokú ne fakatupulaki ʻetau mahino kia Sīsū Kalaisí. ʻOku haʻi kitautolu kiate Ia ʻe Heʻene ngaahi ouau mahuʻingá ʻo fakafou ʻi he ngaahi fuakava toputapu ʻo e lakanga fakataulaʻeikí. Pea, ʻi heʻetau tauhi ʻetau ngaahi fuakavá, ʻokú Ne fakakoloaʻiaʻi leva kitautolu ʻaki Hono mālohi fakaivia mo faifakamoʻuí (vakai Tokāteline mo e Ngaahi Fuakava 109:15, 22). Pea, te tau fiemaʻu lahi Hono mālohí ʻi he ngaahi ʻaho ka hoko maí.
“Kuo ʻosi talaʻofa mai ‘kapau [te tau] mateuteu ʻe ʻikai [te tau] manavahē,’ (Tokāteline mo e Ngaahi Fuakavá 38:30; vakai Tokāteline mo e Ngaahi Fuakavá 10:55). Ko e fakapapauʻi mai ko ʻení ʻoku ʻi ai hono lelei lahi ʻi he ʻahó ni. Kuo ʻosi folofola ʻa e ʻEikí neongo ʻa e ngaahi faingataʻa makehe ʻo e ʻaho ní, ka ko kinautolu ʻe langa honau fakavaʻé ʻia Sīsū Kalaisí, mo ʻosi ako ki he founga hono fakaʻaongaʻi Hono mālohí, ʻoku ʻikai fiemaʻu ke nau moʻulaloa ki he ʻū meʻa fakahohaʻa makehe ʻo e kuonga ko ʻení.”3
Ne hoko atu ʻa Palesiteni Nalesoni ʻo pehē, “pea kiate kimoutolu kotoa kuo mou fai e ngaahi fuakava fakatemipalé, ʻoku ou kōlenga atu ke mou feinga—ʻi he faʻa lotu pea maʻu ai pē—ke mahino e ngaahi fuakava mo e ngaahi ouau fakatemipalé. ʻE ava ʻa e ngaahi matapā fakalaumālié. Te ke ʻilo e founga ke fakaava ai e veili ʻi he vahaʻa ʻo langi mo māmaní, founga ʻo e kole ki he kau ʻāngelo ʻa e ʻOtuá ke tauhi koé, mo e founga ke maʻu lelei ange ai e fakahinohino mei he langí. ʻE fakamālohia mo fakaivia ho tuʻunga fakalaumālié ʻi hoʻo feinga faivelenga ke fakahoko iá. . . .
“Kātaki ʻo tui mai ʻi he taimi ʻoku ou pehē ai ko e taimi ʻoku fokotuʻu mālohi ai ho tuʻuʻanga fakalaumālié ʻia Sīsū Kalaisí, ʻoku ʻikai fiemaʻu ke ke manavahē. ʻI hoʻo fai pau ko ia ki hoʻo ngaahi fuakava ne fakahoko ʻi he temipalé, ʻe fakamālohia koe ʻe Hono mālohí. Pea, ʻi he tō mai ʻa e ngaahi mofuike fakalaumālié, te ke lava ʻo tuʻu mālohi koeʻuhí ʻoku fefeka mo taʻeueʻia hoʻo fakavaʻe fakalaumālié.”4
ʻOku loto ʻa Palesiteni Nalesoni ke manatuʻi ʻe kitautolu ko e Kāingalotú ʻa e mahuʻinga ʻo e ngaahi temipalé ʻi heʻetau moʻuí, koeʻuhí, he ʻoku nau tataki tonu kitautolu ki hotau Fakamoʻui ko Sīsū Kalaisí.
Naʻe pehē ʻe hotau palōfitá ʻi ha vitiō kimuí ni ʻi hano kātoangaʻi hono toe fakatapui ʻo e Temipale Washington D.C.:
“ʻOku tau mohu tāpuekina ke maʻu ha ngaahi temipale. ʻE toe lahi ange e ngaahi temipalé ʻi he tupu ʻa e tokolahi ʻo e Siasí. Ka ʻoku ʻikai ko e lahí, mo e feituʻu ʻoku tuʻu aí. ʻOku ʻikai ko e falé. Ka ko e ngaahi ouau ʻoku fakahoko ʻi aí.
“ʻI hoʻo vakai ki ha temiaplé, ʻoku totonu ke ke ʻiloʻi ko ha fakaʻilonga ia ʻo Sīsū Kalaisi, ko Ia ʻa hotau Fakalaloa ki he Tamaí. ʻOku fakafou ʻiate Ia pea ko Ia toko taha pē ʻe lava ke tau aʻu ai ki heʻetau Tamai Hēvaní.
“Ko ha fakaʻilonga foki ia ʻo ʻetau tui ki he moʻui hili ʻa e maté. ʻOku hoko ʻa e temipale kotoa pē ko ha sitepu, ko ha sitepu toputapu ki heʻetau moʻui taʻengatá kae pehē ki hotau ngaahi fāmilí.”5