O le Feagai ai ma Faigata e Le Faapea Ua Faaletonu Mea Uma

Saunia e Konan Kouadio

A o o’u feagai ma se tasi o tofotofoga ina ua mavae le isi tofotofoga, nai lo le aveesea o faafitauli, sa faamanuiaina a’u e le Atua i le malosi ma le faamoemoe.

A o o’u talavou, sa ou matua ma’i lava. Sa le’i lava ni tupe a o’u matua e auina atu ai a’u i le falemai, o lea na matou o ai mai lea lotu i lea lotu e saili se tasi e fesoasoani, ae sa leai se tasi na mafaia. Ina ua mavae sina taimi sa matou fiu, ma sa tuua a’u ma le mafatia faaletino ma faalelagona.

Ou te manatua lo’u fesili atu, “O le a le faamoemoega o le olaga? Aisea ua ou i ai iinei? Pe moni ea vavega?”

A ou maua sina malosi i le taimi o lenei ma’i, ou te faitau i tusi faalelotu mai lotu eseese, ma taumafai e saili tali ma le toafilemu. I se tasi aso sa ou tatalo le leoa ai i le Atua, ma ta’u atu ia te Ia le manao e tatau ona ou auai i se lotu—ae ou te le’i iloa po o le fea!

I se tausaga mulimuli ane, sa ou toe malosi faaletino ae sa tele pea ni fesili sa i ai. I se tasi aso sa ou vaaia ai lo’u uso o talanoa i ni alii talavou se toalua o laeiina ni ofutino papae. Sa la valaauliaina a’u ma nai o’u tei uma e auai i le latou talanoaga.

O le taimi muamua lenei na ou faalogo ai i le O Le Ekalesia a Iesu Keriso o le Au Paia o Aso e Gata Ai ma le Tusi a Mamona.

O le vaiaso lava lena, sa valaaulia ai i matou e auai i se sauniga lotu, ma sa le’i umi ae valaaulia a’u e papatiso. Sa ou taliaina e aunoa ma le faatuai. O lo’o avea lava a’u ma se tagata o le Ekalesia talu mai lena taimi ma na iu lava ina ou maua le avanoa e auauna atu ai i se misiona talai.

Peitai, sa i ai taimi sa ou feagai ai ma le tetee mai tagata o le aiga, uo, ma isi na siomia a’u. O nisi o i latou sa taumafai e faalotovaivaia a’u, faamaasiasia a’u, ma faatiga i lo’u faatuatuaga fou. Ae, e ui lava i faigata, sa faaauau pea ona ou alu.

E Faatagaina E Puapuaga I Tatou ia Tuputupu A’e

O lo’u aafiaga i le auai i le Ekalesia na aoaoina ai a’u e faapea, o nisi taimi e feagai ai tagata lelei ma taimi faigata. O faigata ma tofotofoga e mafai ona tatou lagona ai le le mautonu e uiga i le lumanai. Ma o nisi taimi tatou te masalosalo foi i o tatou gafatia pe o tatou i ai i luga o le ala sa’o. Ae na oo ina ou iloa ou te le’i oo i faigata ona sa ou faia se mea sese. O le mea moni, ua na o le faafeagai

Sa ou oo i faigata ona o faigata o se vaega o le fuafuaga a le Atua.

Na fetalai mai le Alii ia Iosefa Samita: “Ma afai e lafo oe i le lua, po o lima o e fasioti tagata, ma ua oo mai le fuaiupu o le oti i ou luga; … afai e tatala faamaga lautele mai e auvae lava o seoli le gutu ia te oe, ia e iloa, lo’u atalii e, o nei mea uma e te maua ai le poto masani, ma o le a avea mo ou lelei” (Mataupu Faavae ma Feagaiga 122:7).

I le taimi o la tatou malaga faaletino i le lalolagi, atonu tatou te oo i tofotofoga, le fiafia, faanoanoa, ma’i, po o isi lototiga, ae e le mafai ona tatou lafoaia pe tuua le ala o le talalelei. O nei faigata o mea ia e mafai ai ona tatou avea atili e faapei o le Atua.

E Alofa le Atua ia i Tatou ma e Tali mai i a Tatou Tatalo

I le faamatalaina o lona aafiaga i le tatalo atu i le Atua, na saunoa ai Enosa, “Ma sa matelaina lo’u agaga; ma sa ou tootuli i lalo i luma o Le na faia a’u, ma ou tagi atu ia te ia i le tatalo malosi ma le faatauanau mo lo’u lava agaga; ma sa ou tagi atu ia te ia i le aso atoa” (Enosa 1:4).

E pei o Enosa, sa ou tatalo ma le faamaoni ina ua ou tauivi ma se tulaga o le fatu ma toe oo foi i se taimi mulimuli ane ina ua ou feagai ma le tetee mo le auai i le Ekalesia. Sa tali mai le Atua i a’u tatalo e ala i le aumaia ia te a’u o le faamafanafanaga talafeagai ma le faamoemoe sa ou manaomia i taimi o aafiaga taitasi.

E ui lava Na te le’i faamaloloina le tulaga o lo’u fatu pe taofia tagata mai le sauaina o a’u mo le auai i le Ekalesia, ae sa Ia auina mai pea ia te a’u ni faamautinoaga faapitoa ma le faamoemoe na fesoasoani ia te a’u e tumau malosi ai i le ala o feagaiga.

Filemu pe a mae’a le Afā

Ou te iloa ua tatou i ai iinei i le lalolagi e aoao, tuputupu a’e, ma saunia e feiloai ma le Atua. Ou te fiafia na taitai atu a’u e o’u puapuaga e talia le talalelei, ia iloa lo’u faasinomaga moni, ma ia i ai i le auaunaga a fanau a le Atua. Ou te faafetai ona sa ou le fiu ina ua ou feagai ma faigata mo le auai i le Ekalesia. Talu mai lena taimi, ua faamanuiaina a’u i le taliaina i le Iunivesite o Polika Iaga–Idaho ma sa mafai ona avea a’u ma se faifeautalai mo le BYU–Pathway Worldwide.

O le a taitai i tatou e le Atua, faaleleia i tatou, ma taitai atu i tatou i lo tatou faasinomaga paia ua tulaga ese ona Ia saunia mo i tatou taitoatasi. Ou te iloa a tatou tumau i Lana ala o feagaiga, o le a tatou maua le fiafia i lenei olaga faapea foi ma le olaga a sau.