2023
O Le Meaalofa Faavavega a Iesu Keriso
Tesema 2023

“O Le Meaalofa Faavavega a Iesu Keriso,” Liahona, Tes. 2023.

Mo Mātua

O Le Meaalofa Faavavega a Iesu Keriso

Ata
o tamaiti o loo faataitaia le tala o le Soifua Mai o Iesu

Ata na pu’eina e Scott Law

Mātua Pēlē,

O le lomiga o lenei masina e lagolagoina le aoaoina o lau fanau e uiga i le auala e atiina a’e ai ma faaleleia a latou sootaga ma le Faaola ma fanau uma a le Atua. E mafai ona e faaaogaina manatu o loo iinei e atiina a’e ai talanoaga i le auala e saunia ai e osia feagaiga ma le Atua ma le auala e faaleleia ai a tatou sootaga ma Ia ma isi.

Talanoaga o le Talalelei

Faamoemoe i le Faaola

I le tusiga a Elder Gary E. Stevenson i le itulau e 4, faitau pe na faapefea e se teineitiiti laitiiti e igoa ia Hope ma lona aiga ona faamoemoe i le Alii i taimi o ō latou tofotofoga, ona talanoaina lea pe na faapefea e Iesu Keriso ona “opoina oe” e ala i ou lava tofotofoga.

O Meaalofa Silisili

Faasoa atu nisi o manatu mai le tusiga a Elder Brent H. Nielson e uiga i le tele o vavega ma meaalofa o le Kerisimasi (itulau 40). Talanoaina ma lou aiga ia meaalofa e tolu o le Kerisimasi lea na ta’ua e Elder Nielson i le faaiuga o lana tusiga. Mafaufau po o a “meaalofa” atonu o loo talosaga mai ai le Tama Faalelagi ma Iesu Keriso ia te oe i lenei vaitau o le Kerisimasi.

Aoaoga Autu o le Talalelei

O le osia o feagaiga i le malumalu e faaauau ai se sootaga paia, lea na muamua amata i le papatisoga, faatasi ma le Tama Faalelagi. Iloilo le “Saunia e Auai i le Malumalu” i le itulau e 22 e aoao atili ai e uiga i mea e mafai ona faia e oe po o i latou e te alofa i ai ina ia saunia ai e maua sauniga o le malumalu ma faamalosia ai lou sootaga faalefeagaiga ma le Atua.

Sau, Mulimuli Mai ia te A’u Mea Mālie Faaleaiga

Faatoilaloina o le Fili e ala ia Keriso

Faaaliga

“A ua latou manumalo ia [Satani] ona o le toto o le Tamai mamoe, ma le upu a la latou mau” (Faaaliga 12:11). 

  1. Fesili atu i tagata o le aiga pe faapefea ona taumafai Satani e faatiga, faaosooso, pe faasesē i latou. Tusi tali nei i luga o se pepa.

  2. Tuu atu ia tofu tagata uma ma se pepa lanu mumu e faatusa i le Togiola a Keriso, po o le “toto o le Tamai Mamoe.”

  3. Valaaulia tagata taitoatasi e filifili se mau e fiafia i ai e uiga i le Togiola a Keriso pe faaaoga se tasi o mau nei: Mataio 26:26–28; Efeso 1:7; Eperu 9:14, 22; 1 Ioane 1:7; Faaaliga 5:9; Mosaea 3:11, 15, 18; Eteru 13:10–11.

  4. Tuu atu i tagata taitoatasi e kopi fasifuaitau mai a latou mau filifilia i luga o a latou fasipepa lanumumu. I lalo ifo o le fuaiupu o le mau, e mafai e tagata taitoatasi ona tusi ai a latou molimau.

  5. Faasoa atu mau ma molimau. Faapipii pepa lanu mumu i le pito i luga o le pepa mai le laasaga 1.

Talanoaga: O a ni auala e fesoasoani ai Iesu Keriso ia i tatou e faatoilalo Satani?

Lolomi