O Fea E Alu i Ai Sefuluai ma Taulaga Anapogi ?

Vaai po o le a le mea e tupu i au foai.

Pe na i ai se taimi na e mafaufau ai po o le a le mea o tupu i sefuluai ma taulaga anapogi e te tuuina atu i le Ekalesia? O se vaaiga vave lenei i le mea e tupu ma le lelei e faia (e au sefuluai ma taulaga anapogi) mo tagata o siomia ai oe ma le lalolagi atoa.

Auala e Foai Atu Ai

E mafai ona e auina atu lau foai i luga o upega-tafailagi i le donations.ChurchofJesusChrist.org po o le tuuina atu i se tasi o lau au epikopo po o le au peresitene o le paranesi.

O ata na tusia e Katy Dockrill

Sefuluai

E te foai atu le 10 pasene o au tupe maua mo le sefuluai (tagai i le Mataupu Faavae ma Feagaiga 119:3).

E pei ona taialaina e musumusuga, e faia e le Au Peresitene Sili, Korama a Aposetolo e Toasefululua ma le Au Epikopo Pulefaamalumalu ni faaiuga e uiga i le ala o le a faaaoga ai tupe paia o le sefuluai, e pei ona faatonuina ai e le Alii (tagai i le Mataupu Faavae ma Feagaiga 120).

Faatasi ai ma le tele o mea, o le sefuluai e totogi ai mo …

• 

  Taumafaiga faaleuelefea ma galuega fesoasoani mo tagata.

• 

  Galuega faafaifeautalai.

• 

  Polokalama o aoaoga a le Ekalesia.

• 

  Sailiga o talafaasolopito o aiga.

• 

  Fausiaina ma le tausiga o malumalu, falelotu, ma isi fale.

• 

  O tusitusiga paia ma isi anomea.

Taulaga Anapogi

O le totogiina o taulaga anapogi o se avanoa lea e fesoasoani ai i o tatou uso ma tuafafine i manaoga faaleagaga pe faaletino. O le auala lenei e fai ai:

Mo taulaga anapogi, e te foai atu le tupe lea sa tatau ona e faaaluina i meaai mo au ‘aiga e lua lea ua misi a o anapogi.

O lau foai e teuina i se teugatupe i le faletupe lea e maua ai tupe e faaaoga e tusa ai ma manaoga o tagata o lau uarota po o le paranesi.

O le epikopo, peresitene o le Aualofa, ma isi taitai o le uarota latou te fefautuaai faatasi ma le agaga tatalo ia filimaoti manaoga o tagata o le au paia, ma e mafai ona faaaoga taulaga anapogi e fesoasoani ai e totogi meaai, lisi, pili o tausiga faafomai, po o isi fesoasoaniga.