Fesili ma Tali

“O faatosinaga le lelei o loo i soo se mea i ala o faasalalauga. E mafai faapefea ona ou taofia i latou mai le faatosinaina o a’u?”

“E tatau ona tatou faia mea uma tatou te mafaia e aoao atu ai ma faataitai ia faaaogaaga amiotonu o tekinolosi i le tupulaga faiae ma lapataia i tulaga lamatia e faatatau i ai ma le faaaogaina le lelei. O le maimoaina o ala o faasalalauga faaagafesootai i tioata o le talalelei, e mafai ai ona tatou taofia mai le avea o se gasetoto faaleagaga i o tatou olaga.”

Elder Gary E. Stevenson o le Korama a Aposetolo e Toasefululua, konafesi aoao Oke. 2017 (Ensign po o le LiahonaNov. 2017, 47).

Manatua Mea e Le Iloa e le Initoneti

“E le mafai ona e aloese mai faatosinaga le lelei. Peitai, e mafai ona e faatulagaina ni tulaga faatonuina. O ala o faasalalauga o le a tele auala e na te faaaoga ai manatu talafeagai e faatalitonu ai oe e tuu i lalo ou tulaga faatonuina. Ae ia manatua e le iloa e ala o faasalalauga mea uma. E iloa e le Atua. O Ia o le punaoa tupito. Faalogo ia te Ia, ma o le a puipuia oe mai le piopio o ala o faasalalauga.”

Reilly K., Arisona, ISA

Faasoa atu le Talalelei

“Sa ou faia se talaaga otooto i le Instagram lea ou te fatu ai ni sini e fesoasoani ai i le autalavou i Pasila ia tuputupu ae ma avea atili e faapei o Keriso. I luga o la’u lava talaaga otooto, o loo i ai foi ata o malumalu, o a’u i le falesa po o le inisitituti, ma i se taimi e le o toe mamao, o a’u i la’u misiona. Ou te faasoa atu le talalelei i luga o ala o faasalalauga faaagafesootai.”

Cyndell M., 19, Pasila

Faaaoga Faaaliga Patino

“O le taimi muamua lava na ou faaaogaina ai le initoneti, sa fautuaina a’u e ou matua e aoao e uiga i vaega lamatia. Ina ia taulimaina, sa tatau ona ou tatalo muamua i le Tama Faalelagi ina ia mafai ona Ia apoapoai mai ia te a’u. Ma sa ou maua faaaliga faaletagata lava ia e poloka ai ala o faasalalauga uma e mafai ona taitai seseina ai a’u.”

Eden K., 18, Farani Polenisia

Pipii i Tulaga Faatonuina

“O le le auai i se mea e te iloa e le tusa ai ma ou tulaga faatonuina e mafai foi ona fesoasoani ia te oe e latalata atili atu ai i le Atua ma aloese ai mai tosinaga le lelei. A e faia ni faaiuga e uiga i tulaga faatonuina, ua e taumafai ia lelei atili, ma o le mea lena e finagalo le Atua e te faia.”

Hazel J., 13, Idaho, ISA

Saili se Mea e [te] Fiafia e Fai e Faagaeetia

“O le i ai o se mea [ou] te fiafia e fai ua fesoasoani lea ia te a’u e aua nei faalavelaveina a’u e le initoneti. O le faatinoina o faaaliga faamaneta ua fesoasoani ia te au e atiina ae ai a’u taleni ma faafiafia ai isi. E mafai ona tatou taulai atu i o tatou malosiaga e aloese ai mai le faatosinaina i ala sese.”

Sebastian S., 16, Siamani

Faalogo i le Agaga

“E taumafai pea lava pea le tiapolo ia tatou vaai i mea ma faitau mea tatou te lagona ai le ita, fefe, lotoleaga, ma isi mea faapena. Ou te taumafai e aua le alu atu i ala o faasalalauga lea e le valaaulia ai le Agaga Paia pe a ou manao i tali po o faafiafiaga. O le faalogo i le Agaga, o le a faaitiitia ai lo tatou aafia i faatosinaga le lelei a ala o faasalalauga.”

Sierra J., 15, Idaho, ISA

Mafaufau i Ai

“Ae e te lei talitonu i se mea, mafaufau i ai ma vaai pe o fesoasoani ia te oe e latalata atili atu ai i le Atua pe ave mamao ese ai oe mai le Atua. Afai e aveesea mamao ai oe mai le Atua, aua e te faatagaina e faatosinaina oe.”

Parker W., 11, Iuta, ISA

O tali ua faamoemoe mo se fesoasoani ma se vaaiga, ae e lē o ni faalauiloaga aloaia o aoaoga faavae o le Ekalesia.

O Le A Sou Manatu?

“E mafai faapefea ona ou iloa e moni le Tusi a Mamona?”

Auina mai lau tali ma lou ata ae le’i oo i le aso 15 o Ianuari, 2024.

Imeli mai ia i matou i le [e-mail]. Pe alu i le ftsoy.ChurchofJesusChrist.org ma kiliki le “Submit Your Work.” Saini e alu i totonu i lau Faitotoa a le Ekalesia ona filifili lea o le “Mo Le Malosi o le Autalavou” i lalo o le “Filifili le Mekasini.” Kiliki le “Faaopoopo le Faila” e filifili ai lau faila ma ata, ona kiliki lea o le “Auina Atu” e utaina ai ma auina mai ai ia i matou lau faila.

E ono sui ia tali mo le uumi po o le manino.