“Fagotaga mo le Uiga Moni o le Kerisimasi,” Mo Le Malosi o le Autalavou, Oke. 2023.
Fagotaga mo le Uiga Moni o le Kerisimasi
Sa ou iloaina o le Kerisimasi e sili atu nai lo teuteuga, meaai, po o auaunaga foi.
O iinei i la’u misiona i Filipaina, sa ou iloa ai o le Kerisimasi e faamanatuina mai ia Setema e oo atu ia Tesema. Nai lo le aumaia o le kiona lea ou te masani ai, o Tesema i Filipaina e faatumulia taimi uma i tafalagi timuga ma puaoa. E lanumeamata soo se itu e te tilotilo i ai—fa’i, o niu, isi laau pama.
Mo le matou taimi faatulagaina mulimuli i le Tauafiafi o le Kerisimasi, sa matou asiasi ai i se aiga faatoa amata ona matou aoaoina. Sa matou tietie atu i a matou uila i le togavao mafiafia agai atu i le fale apa na fausia i ofe o le aiga. Ina ua ma taunuu atu, sa ou vaaia le nanay (tina) o fagota i le vaitafe i tua ane o lona fale, o faaaoga ai se laau ofe umi ma sina manoa. Sa ia faimai o loo ia taumafai ia maua se i’a mo le latou ulam (meaai autu) ina ia mafai ai ona latou aai ai i lena po. Sa ma fuafua e o i se pati o le Kerisimasi faatasi ma isi faifeautalai i le 6:30 i le afiafi, ae sa ma filifili e faaalu sina taimi e fagota ai ni i’a laiti i le timu e fesoasoani ai i lenei tina e fafaga ai lona aiga.
I lena po, a o ma matamata ma la’u soa i se vitio e uiga i le soifua mai o Iesu Keriso, na ou manatunatu ai i le ala na Ia afio mai ai i le lalolagi ma le leai o se mea ma toe foi atu e aunoa lava ma se mea. O le aiga sa matou auauna i ai sa le’i tele foi ni a latou mea. Ae sa ou iloaina e te le manaomia ni mea se tele ina ia e maua le fiafia. O le Kerisimasi e sili atu nai lo teuga, meaai, po o auaunaga foi. E faatatau i le alofa o le Atua (tagai i le 1 Nifae 11:13–23). E faatatau i le alofa, le alofa mama o Keriso E faatatau i le alofaina o tagata uma.
E ui ina sa ese lenei Kerisimasi mo a’u, ae o lo’u aafiaga ua ou maua ai se uunaiga faaopoopo e faaauau pea ona galue ma faaauau pea ona auauna atu aua o le talalelei a Iesu Keriso e mafai ona aumaia ai i tagata le fiafia tele. Ua aoao i tatou e le talalelei i le ala e mafai ai ona tatou aapa atu i le alofa ma le alofa mama. Sa ou lagona le alofa moni mo lo‘u aiga.
O loo auauna atu le tusitala i le Misiona a Filipaina Antipolo.