O Le Ala mai Peteleema

Saunia e Elder Ahmad S. Corbitt

O le Fitugafulu

O Iesu Keriso, le Pepe o Peteleema, e aumaia i tatou i le ala o feagaiga lea e tau atu i le malumalu ma toe foi atu ai i le afioaga o le Tama Faalelagi.

Ata na tusia e Corey Egbert

Ia Tesema talu ai, sa ma asiasi atu ai ma lo’u toalua i Peteleema. A o o’u tilotilo atu i luga i le taulaga ma savali atu i ona auala, sa ou usuina le “Peteleema le Aai” ia te a’u lava ia (Viiga, nu. 122). Na toe fo’i lo’u mafaufau i le silia ma le 2,000 tausaga talu ai, i le taimi na malaga atu ai Maria ma Iosefa e tusia o la igoa. Sa ou mafaufau ia Maria, o lē na faia le faigamalaga a’o maitaga ma fanauina se tamaitiiti i se fale o manu.

Sa matou asiasi atu i le atumauga papa lata ane o Palesitina, e aofia ai le mea sa leoleo ai e leoleo mamoe a latou lafu. Sa ou mafaufau i le agelu na faaali atu ia i latou ma folafola atu le “tala lelei e olioli tele ai, lea o le a i ai i tagata uma” (Luka 2:10) ma fai atu ia i latou e saili atu mo le tamaitiiti o i se faatanoa vao. Sa ma vaaia ni falemanu e pei o ni ana, faapei o le fale lea sa fanau mai ai Iesu ma faatanoavao-ma’a e pei o le faatanoa lea na faataoto ai o Ia.

O isi nofoaga sa matou vaai ai i nofoaga sa femaliuai ai Iesu, aoao atu, puapuagatia, maliu, ma toetu mai. Ierusalema, o le Mauga o le Malumalu, o le Mauga o Olive, o le Faatoaga o Ketesemane, Kolokota, ma le Tuugamau i le Faatoaga. Sa matou vaai i le ala o le soifuaga o Iesu mai valoaga e uiga ia te Ia e oo i Lona soifua mai, i Lona maliu ma le Toetu.

Sa matagofie le asiasi atu i nei nofoaga, ae e le manaomia ona e alu iina ia malamalama ai ma lagona moni se sootaga i le Pepe o Peteleema ma le Faaola o Kalevaria. Ou te iloa—ma e mafai ona e iloa—e ala i le mana o le Agaga Paia, o Iesu Keriso o le Alo o le Atua ma le Faaola o le lalolagi.

Ma faatasi ai ma lenei molimau, atonu e te mafaufau e uiga i le soifua mai o le Faaola ma Lona ala i le olaga ma mafaufau: O le a lo’u ala? E mafai faapefea ona ou mulimuli i Ona tulagaaao?

Auala e O Mai ai i le Faaola i Aso Nei

Ina ia sau i le Faaola, e le manaomia ona e savali i le mea na savali ai Iesu; e manaomia ona e taumafai e savali a o Ia savali, ma mulimuli i Lana faataitaiga.

O le asō, tatou te le o atu i Peteleema e saili le Faaola. Tatou te o i tusitusiga paia ma taitai o le Ekalesia. O i latou e le auai i lo tatou faatuatuaga e o atu i faifeautalai ma uo o e o tagata o le Ekalesia. Tatou te o i vai papatisoga ma sauniga o le faamanatuga. Tatou te o i malumalu. I se isi faaupuga, tatou te osia ma tausia feagaiga paia.

O le Pepe o Peteleema o le mafuaaga lea tatou te aai ma feinu ai i le faamanatuga. O Ia o le mafuaaga tatou te o ai i malumalu. O Ia o le auala tatou te agai ai i luma ma tumau ai i luga o le ala o feagaiga, lea e tau atu i le malumalu ma iu ai ina tatou toe foi atu i le afioaga o lo tatou Tama Faalelagi. O Ia o le mafuaaga tatou te saili ai e faia le galuega o le faaolataga ma le faaeaga.

Auala e Faamanatu ai Lenei Kerisimasi

O lenei “Atalii Paia, o Iesu” (Moronae 8:3) o le mafuaaga foi lea tatou te faamanatuina ai le Kerisimasi. O Lona filemu, lea e le mai lenei lalolagi, o le mafuaaga lea tatou te aufaatasi ai ma isi i le lalolagi atoa i le ofo alofa atu o le “manuia i le lalolagi, o le finagalo alofa i tagata” (tagai i le Luka 2:14)—i tagata uma.

O le loloto o le uiga o le Kerisimasi mo oe ma a’u o ni soo o Iesu i Le Ekalesia a Iesu Keriso o le Au Paia o Aso e Gata Ai, e sau mai la tatou sootaga faalefeagaiga i le Faaola ma le Tama Faalelagi. E sau mai le malamalama i le matafaioi a Iesu Keriso i o tatou olaga.

O lenei Kerisimasi, faaalu se taimi e toe manatunatu ai i le ofoofogia o le vaaiga i le fale o manu i Peteleema i na tausaga uma ua mavae. Ma faalogo i le Agaga o molimau atu ia te oe o le Pepe i le faatanoa vao o ia lea o Lē na togiola oe, a’u, ma tagata uma. Ona manatua lea o mea ua Ia valaaulia i tatou e fai ma mea ua Ia folafola mai ia i tatou. Ia tatou manatua a tatou feagaiga.

Ia avea mea uma e te faia i lenei vaitau e faateleina ai lou faatuatua ia Iesu Keriso ma lou faalagolago atu ia te Ia. Taumafai e faia le mea o le a Ia faia. Aapa atu i isi i le alofa. Ia avea ma se faataitaiga, ma faasino atu tagata i le malamalama e faavavau lea na susulu i auala pogisa o le taulaga laitiiti o Peteleema.