“O Talavou e Toa 7 O E Ua Suia le Lalolagi,” Mo Le Malosi o le Autalavou, Tes. 2023.
O Talavou e Toa 7 O E Ua Suia le Lalolagi
O a mea ua musuia oe e nei talavou e fai?
Lucy B.
14 Tausaga. Mai Tennessee, ISA. E fiafia i o tala faafiafia faamusika ma le taalo soka.
Ina ua valu o’u tausaga, sa ou fai atu i lo’u tina e aoao mai ia te a’u pe faapefea ona su’i se palanikeke. Sa amata ona ou faia ni palanikeke o ni meaalofa mo a’u uo uma.
Ona ma filifili lea ma lo’u tina e faia se foai o palanikeke i luga i le Instagram. E 16 tagata na tuuina mai ia i ma’ua. Sa le mafai ona ou filifilia na o se tagata se toatasi, o lea na ma auina atu ai (palanikeke) ia i latou taitoatasi. Ona faaauau ai lea ona o mai igoa filifilia, ma sa ma faia pea ni palanikeke. I le lima tausaga ua mavae, ua matou faia ai ni palanikeke se 1,121 ma auina atu i atunuu e 29.
O le tele o palanikeke e auina atu i tamaiti mama’i. O le vaega aupito faigata mo a’u pe a maliu se tamaitiiti a o lei oo atu se palanikeke ia i latou. O nisi taimi ou te tuuaia ai a’u lava ma lagonaina le tele o le tausalaina ma le faanoanoa. Ae a ou faalogoina lagona faapena, ou te tatalo, ma ou te lagona le toafilemu.
Ua ou vaai i nisi o tamaiti o feagai ma ni mea faigata tele. Sa ou feiloai i se tasi o tamaitai talavou o lē na faatoa uma mai le taotoga o le faiai, ae sa ia te ia se agaga fiafia e ui lava i nei mea uma. O lenei mea ua musuia ai a’u ia ou lotofaafetai mo mea uma ua ou maua.
O nisi taimi e fesili mai ai tagata ia te a’u, “E faapefea ona e faia?” Ou te manatu afai e i ai Iesu Keriso iinei, o le a Ia auauna atu i isi. Na te faamautinoaina ua lagona e tagata uma le alofagia. E mafai la ona avea a’u ma Ona aao. E mafai ona ou fesoasoani e fai Lana galuega.
Nate W.
14 Tausaga. Mai Hawaii, ISA. E fiafia e taalo pasiketipolo ma soka, faitau, ma o i le matafaga faatasi ma uo.
I ni nai tausaga ua mavae, sa matuai timuga lava le mea ou te nofo ai, ma o se tasi o vaega o lo matou taulaga sa matuai lolovaia leaga lava. O nisi tagata sa ‘a’au e o ese mai o latou fale ma agai atu i a latou taavale.
Sa faatulaga e le matou uarota se galuega fesoasoani e taumafai ai e fesoasoani ia i latou, ae i lena taeao sa ou mafaufau pe aisea e tatau ai ona ou fesoasoani. Sa ou manao ou te taalo i le paka, lea sa faia ai tietiega ma faase’ega a tagata agai lalo i se mauga susū ma mase’ese’e, i luga o laupapa faase’e.
Sa ou filifili matou te o ma le uarota, ma sa matou faamamaina lapisi ma faamautinoa ua saogalemu tagata uma. Sa ou fesoasoani e faavasega mea a tagata ma faamautinoa ua matou iloa ē e ana ia meatotino.
Sa i ai se tina sa lolovaia lona fale. Sa tutu o ia ma lana fanau i luga o lona faapaologa ma matamata i tagata uma o galulue. Sa amata ona maligi ona loimata o le faafetai. Sa matuai fiafia lava o ia i tagata sa fesoasoani ia te ia.
Sa ou lagona sa pei na ou faia le mea sa’o e ala i le fesoasoani atu. Sa ou lagona le mafanafana ma le fiafia i lo’u loto. Sa matuai aoga lava.
Grant E.
17 Tausaga. Mai Texas, ISA. E fiafia e taalo tenisi ma pasiketipolo, tamoe, ma faalogologo i musika.
Talu ai nei, sa ou faatulagaina ai e aoina ni lavalava faatasi ma nisi o talavou mai la’u siteki ma le aoga maualuga. Sa matou aoina mai ni pusa o lavalava ua faaaoga ae o loo lelei pea, e auina atu i pusa lavalava i le eria e fesoasoani ai i aiga e manaomia le fesoasoani ma tamaiti e i ai manaoga faapitoa pe le atoatoa le malosi. O lo’u uso laitiiti e maua i se faama’i lea e osofai ai e puipui o le tino [o le tagata] ona lava puipuiga [autoimmune], o lea e i ai lava se nofoaga faapitoa i lo’u loto mo tamaiti o loo feagai ma luitau faapena.
E ui sa taua ia te a’u le taunuuga o lenei galuega fesoasoani, ae sa faatatau foi i le aumaia faatasi o tagata ma fatuina se lagona o le lotonuu ma le faamoemoega. O le galulue faatasi, sa mafai ai ona matou faia ni faigauo ma ni sootaga fou. Sa ou lagonaina se lagona o le ausia mai le faia o se mea lelei mo isi.
O lenei aafiaga na faamanatu mai ai ia te a’u le taua o le alofa i le Atua e ala i le auauna atu i isi. E faigofie ona saisaitia i tatou i o tatou lava olaga ma faafitauli, ae a tatou faamuamua isi ma mulimuli i uunaiga a le Agaga e auauna atu, e mafai ona tatou aumaia le olioli ma le alofa i le lalolagi.
Milagros H.
16 Tausaga. Mai Santa Ana, Atenitina. E fiafia e faitau, faalogologo i musika, ma tusi solo.
I se taimi e lei mamao atu, sa amata ai ona ou asiasi i le faletusi i le lotoifale ma iloa ai e le i ai i se tulaga lelei. O le tausi potutusi o se tamaitai matua, ma e le tausia lelei e tagata i taimi uma ia tusi latou te aveina fafo.
O a’u o se peresitene o le vasega a Tamaitai Talavou i la’u paranesi, ma sa matou o, o a’u ma nisi o tamaitai talavou, i le faletusi i se Aso Toonai e faatulaga se tasi o fatatusi. Matou te tuuina ni tusi ua fai si umi e lei aveina lava i fafo e tagata, i totonu o pusa e foai atu. Ona matou faatulagaina lea o tusi o totoe i le tulaga faa-alafapeta.
Sa matuai faafetai le tausi potutusi mo le matou fesoasoani. Sa ia aumaia foi ia i matou ni meaai suamalie mananaia e ta’ua o criollitos. Ou te manatu o le matou auaunaga na fesoasoani e faaleleia ai lana vaaiga i le Ekalesia.
O loo i ai pea le tele o isi fata e faatulaga, o lea sa ou filifili ai e auina atu la’u galuega faatino i le JustServe. Ua mafai nei e tagata i lo’u aai ona maua le galuega faatino i luga o le JustServe ma volenitia mai e fesoasoani.
Fai mai tusitusiga paia sa femaliuai Iesu Keriso ma faia mea lelei (tagai Galuega 10:38). Atonu e lei i ai se aafiaga tele o la’u galuega faatino i le lalolagi, ae mo le tausi potutusi ma tagata e o mai i le faletusi, sa faia ai se eseesega.
Telia L.
17 Tausaga. Mai Saskatchewan, Kanata. E fiafia e pese, taekwondo, fusu, ma le taina o le ukulele, kitara, ma le piano.
Sa ave e lo’u tina i matou ma nai o’u tei e pepese ma sisiva i fale o tagata matutua talu mai le ono o o’u tausaga. Sa pei o le ala lea matou te faasoa atu ai le talalelei. Talu ai nei sa matou usuina ai le “Ta Felata’i Nei, Le Atua Ma Oe,” ma sa amata ona tagi se tamaitai i le pito i tua. O se tasi lena o pese ou te fiafia lava e usu.
I se isi taimi, sa ou maua ai se lagona e tatau ona matou usuina le “You Are My Sunshie.” Sa matou usuina, ma sa amata ona pepese faatasi le aofia ma i tatou. Sa fetagisi ni isi o i latou. O lenei mea sa pei o se aafiaga suia olaga mo a’u. Sa ou matuai fiafia lava sa ou faalogo i le uunaiga e usu lena pese.
E le gata i le pepese i nofoaga o le au matutua, ae sa ou faia foi ni galuega fesoasoani i lo’u nuu, e pei o le aveina o meaai i ē leai ni fale. Ou te volenitia foi mo ni faalapotopotoga se lua o se faufautua mo tamaiti o e mananao e fuafua a latou lava galuega faatino.
Ou te manatu o le aotelega ua ou aoaoina o le toatele o tagata i le lalolagi o loo tauivi pea. Tatou te le vaaia i taimi uma lena mea, ae o faatinoga faigofie o le auauna atu, e pei o le usuina o ni nai pese po o le faia o ni nai siva, e mafai ona ataata ai tagata.
Ou te manatu e tatau ona tatou auai uma i auaunaga—i o tatou nuu po o o tatou lava aiga. O le auauna atu e aumaia ai le fiafia i tagata o loo e fesoasoani i ai ma oe. Pe a e auauna atu i isi, o loo e auauna atu i le Atua ma o loo e fesoasoani i Ana fanau, o e e alofa tele i ai o Ia. (Tagai i le Mosaea 2:17.)
Luca M.
16 Tausaga. Mai Alberta, Kanata. E fiafia e ’ata, aoao, ma le kukaina o le hamupeka lelei atoatoa.
A o tuputupu a’e, o o’u matua sa toaaga tele i le Ekalesia. Sa masani ona ou lagonaina e pei sa toso atu a’u i galuega fesoasoani e aunoa ma se filifiliga. A o faasolo ina ou matua ma faaauau pea ona auai i auaunaga, sa ou iloa ai ua suia ai a’u mo le lelei sili atu. A o faaitiitia lo’u taulai atu ia te a’u lava, ua sili atu lo’u fiafia.
I se tasi taimi, sa ou maua ai se avanoa e alu ai i le taulaga tutotonu faatasi ma nai isi talavou e fesoasoani i e leai ni aiga. Sa ta’u mai e se tasi alii mai El Salvador ia te a’u e uiga i le ala na tatau ai ia te ia ona tuua lona atunuu ona o le vevesi ma iu ai i luga o magaala i Kanata. Sa ou feiloai foi i se tamaloa sa faamanatu mai ia te a’u ou te nofo i le aoga ma aua nei ou manatu faatauvaa i o’u avanoa.
O le faalogo atu i a latou tala ma le vaaia o lo latou faapalepale ma le lotomaualalo na i ai se aafiaga loloto ia te a’u. E faigofie lava le le amanaiaina o e ua leai ni fale ma manatu o tulaga ua i ai na aumaia lava e i latou i o latou lava luga. Ae ua talanoa Isaia e uiga i le ala na tauave ai e Iesu Keriso o tatou faanoanoaga ma sa teena e tagata (tagai Isaia 53:3). Ou te talitonu i le avea ai ma soo o Iesu Keriso, e le tatau ona tatou le amanaiaina i latou o e ua teenaina e pei ona sa i ai o Ia.
E ui atonu e le mafai ona ou foia uma o latou faafitauli, ae ou te iloa e oo lava i nai faatinoga laiti o le auauna atu e mafai ona faia ai se eseesega tele i le olaga o se tasi.
Limna C.
16 Tausaga. Mai le Taulaga o Mekisiko, Mekisiko. E fiafia e ta le kitara, pese, faitau, tietie i lana uila, ma lana taifau e igoa ia Loki.
I le taimi o le faama’i oti, sa ou vaaia ai se valaaulia mai le Au Peresitene Aoao o Tamaitai Talavou e faasoa atu le talalelei e ala i le auauna atu. Sa ou mafaufau i auala na ositaulagaina ai e fomai ma tagata faigaluega faafomai o latou taimi ma lamatia ai o latou soifua e fesoasoani ia i matou. Sa ou mafaufau atonu e mafai ona ou ositaulagaina sina taimi ma tupe e fesoasoani ai ia i latou.
Sa i ai sa’u galuega o le faia ma le faatauina atu o kuki ma meaai suamalie. Sa ou filifili e faaaoga se vaega o a’u teugatupe e totogi ai meaai e fai ai meaai tuu tagapepa mo tagata faigaluega faafomai. Sa fesoasoani o’u matua ma matua matutua ia te a’u e saunia taumafataga o le aoauli, lea sa aofia ai se sanuisi, apu, granola bar, ma fagu vai. Ona ou tusia lea o le upu gracias i luga o tagapepa taitasi. E 150 ato, o lea sa matua lelava ai lava o’u lima!
Sa fesoasoani mai lo’u peresitene o le siteki ia te a’u ia maua se faatagaga e faasoa atu ai meaai i le falemai. Sa le mafai ona ou aumaia meaai i totonu, ae sa ia faaali mai ia te au ata o tagata o loo mauaina meaai. Sa ou matua fiafia lava e vaai atu i o la foliga ataata.
O nisi taimi ou te le fiafia ai i tagata ma galo ai ona taulima i latou e pei ona faia e le Alii. Sa agalelei le Faaola i tagata uma, e tusa lava pe na latou feitai pe agaleaga ia te Ia. Afai tatou te taumafai e vaai atu i isi i le alofa o le Faaola, e mafai ona tatou faia se eseesega i olaga o tagata. E mafai ona avea i tatou ma se malamalama i se lalolagi e tele masalosaloga. O nisi taimi atonu tatou te lagonaina e pei tatou te le o faia se eseesega, ae afai o loo tatou taumafai, ua lava lena.