“O le Kerisimasi o le Faamoemoe, Filemu, ma le Alofa,” Mo Le Malosi o le Autalavou, Fep. 2024.
O LeKerisimasi o leFaamoemoe, Filemu, ma le Alofa
I le vaitaimi o le Kerisimasi, tatou te taulai atu i le faamoemoe, filemu, ma le alofa ua ofoina mai e Iesu Keriso i le lalolagi.
Meaalofa a le Lagi, saunia e Dan Wilson
O le folafolaga o le soifua mai o Iesu Keriso ua aumaia ai le “malamalama tele” (Isaia 9:2) ma “le tala lelei o le olioli tele” (Luka 2:10) i le lalolagi. O le vaitaimi o le Kerisimasi o le avanoa sili lea e taulai atu ai o tatou loto ma mafaufau i le Tamaitiiti o Keriso lea sa fanau mai i se taimi ua leva; ma le faamoemoe, filemu, ma le alofa lea e aumaia e le savali o Lana talalelei i o tatou loto a’o tatou mulimuli ma le naunautai ia te Ia.
Sulu Alofa, Ta’i Mai, saunia e Simon Dewey.
Faamoemoe i le Faaola
I ni nai tausaga ua mavae, sa maua ai se teineitiiti e 19 masina le matua, o Hope Gentile, i se ma’i o se fula i le pito i lalo o lona tua. “I le lima masina na sosoo ai o taotoga ma togafitiga faa-kemo,” na fai mai ai le tamā o Hope, o Nicholas, “o tauiviga a Hope mo lona ola sa avea o se vaega na fatuina ai le tele o aafiaga eseese.”
I se tasi po a’o i ai Hope i le lona lua o ana togafitiga faa-kemo e ta’i lima aso, na matauina ai e Brother Gentile le tele o lona lauulu ua to’ulu. O nai vaega manifinifi enaena vaivai o lona lauulu na totoe, sa faamanatu mai ai ma le tiga ia te ia lona olaga faaletino. E ui i lea, sa ia maua le faamafanafanaga i le folafolaga a le Alii e faapea “o le a le pa’ū se lauulu o lona ao i le eleele e aunoa ma le iloa” (Mataupu Faavae ma Feagaiga 84:116).
“Sa ou lagonaina sa matua silafia a’ia’i e Iesu Keriso le faigamalaga a Hope—ma lo matou lototiga,” o le tala lea a Brother Gentile. “Na te le’i tuua [i matou] e aunoa ma se faamafanafanaga’” (Ioane 14:18).
I se tasi afiafi ina ua sauni e momoe a’o ia faitau atu se tusi faava’a malo ia Hope, na fesili atu Br Gentile i se leo fiamalie, “Faimai e a le lulu?” Na ata Hope ma tali mai, “Uuuu, uuu!” Ona ia fesili atu lea, “Faimai e a le povi?” Sa tali mai ma le mimita Hope, “Moo, moo!”
I lena lava taimi, na tau atu le vaai ma gauai atu Brother Gentile i se ata o le Faaola sa i totonu o le potu o Hope. Sa uunaia o ia e le Agaga e fesili, “Hope, ae faimai e a Iesu?”
Sa faapupuu mai Hope i lona tau’au, pupula ona mata lanumoana lapopoa, ma musumusu mai, “Uumau ia te oe.’ Fai mai Iesu, ‘Uumau ia te oe.’”
Sa opo lemu mai e Brother Gentile le tino itiiti o Hope ma tagi lotulotu. A o toe fusi atu o ia e Hope, sa ia musumusu atu, “Ou te alofa ia te oe, Tama.”
O le tofotofoga o Hope ma le le mautonu o le lumanai na aumaia ai Brother Gentile, o lona faletua, o Christina, ma lo la aiga i se tulaga vavalalata—o le tasi i le isi ma i le Faaola. “Sa uumauina e Iesu lo matou aiga i Ona aao agaalofa,” o le tala lea a Brother Gentile. “Sa ou mafaufau loloto i le upumoni agamalu na aoaoina ai a’u e le Atua e ala i upu a lo’u afafine: O le a uumauina i tatou e Iesu ma faamanuia i tatou i taimi o o tatou tofotofoga pe afai tatou te faatagaina o Ia.”1
O Hope Gentile, i le fa o aso a o lumanai lona uluai togafitiga faa-kemo ia Mati 2015.
Filemu ia Keriso
Ou te fiafia e lipoti atu na tali le faatuatua ma tatalo a le aiga o Gentile. O le asō, o Hope o se teineitiiti maloloina ma fiafia ua 10 tausaga le matua.
Ae faamata e faapefea na taimi pe ana o le tali a le Atua e le o le mea lea sa tatou faamoemoe i ai? E mafai ona oo mai le filemu i le lotolotoi o le lototiga faaletagata lava ia?
Ioe! E maua pea le filemu a o tatou liliu atu i le Faaola, o Lona soifua mai i Peteleema lea tatou te faamanatuina i lenei vaitau. I le vaitaimi o le Kerisimasi, o o tatou tofotofoga faaletagata lava ia, faanoanoaga, ma ma’i e mafai ai i le tele o taimi ona lagona le le ogatusa ma a tatou faamanatuga o le Kerisimasi. Ae o la tatou molimau i le soifua mai, maliu, ma le toetu o le Faaola e maua ai le filemu ma le olioli.
Na aoao mai i tatou e lo tatou perofeta pele, o Peresitene Russell M. Nelson, e faapea:
“E pei lava foi ona ofo mai e le Faaola le filemu lea e “silisili lava i mea uma e manatu i ai” [Filipi 4:7], ua Ia ofoina mai foi le malosi faateleina, loloto, ma le lautele o le olioli lea e tetee i manatu faaletagata po o le malamalama faaletino. Mo se faataitaiga, e foliga mai e le mafai ona lagona le olioli pe a mafatia se tamaitiiti i se ma’i e leai se togatifi, pe ua leai foi sau galuega … Ae o le olioli tonu lava lena ua ofoina mai e le Faaola. O Lona olioli e faifai pea, ma faamautinoa mai ai ia i tatou, o o tatou ‘puapuaga o le a na o sina taimi laitiiti’ [Mataupu Faavae ma Feagaiga 121:7] ma faapaiaina mo lo tatou manuia [2 Nifae 2:2].”2
Pe a fetalai mai le Alii i le mafanafana i o tatou agaga, e mafai ona tatou auai faatasi ma “au mai le lagi e toatele, ua vivii i le Atua, ua faapea ane, O le viiga i le Atua i mea aupitoaluga, ma le manuia i le lalolagi, o le finagalo alofa i tagata” (Luka 2:13–14). E mafai ona tatou “o mai … olioli ma manumalo”3 ia Keriso ma lagonaina Lona “filemu faalelagi.”4
O Le Meaalofa o le Alofa
E silafia lelei oe e le Tama—o ou tofotofoga ma lē atoatoa, o ou faananauga ma ou toilalo. Ona e alofa o Ia ia te oe, ua Ia tuuina atu ai ia te oe le meaalofa silisili e mafai ona e mauaina.
“Aua ua faapea lava ona alofa mai o le Atua i le lalolagi, ua Ia aumai ai lona Atalii e toatasi, ina ia le fano se tasi e faatuatua ia te Ia, a ia maua e ia le ola e faavavau” (Ioane 3:16).
Ona e faapena foi ona alofa le Alo ia te oe, o lea na Ia ofoina mai ma le malie atoatoa Lona soifua mo oe.
O le meaalofa o le Alo Pele e Toatasi o le Atua o lona uiga o le faamoemoe tumau ma le filemu ua mafai ona maua e ala i le Togiola ma le Toetu o le Faaola. “O le mafuaaga autu tatou te faamanatu ai le Kerisimasi ona o le Eseta,” ua faamanatu mai ai Peresitene Nelson ia i tatou. “Ona o Iesu Keriso, ua mafai ai ona tatou salamo ma faamagaloina mai i a tatou agasala. Ona o Ia, o le a toetutu ai i tatou taitoatasi.”5
Ata na tusia e Dan Burr
O le faitauina o tala paia o le soifua mai o le Faaola i le Feagaiga Fou ua i ai i le totonugalemu o le tele o a tatou tu masani o le Kerisimasi e fiafia i ai, ae aua nei galo ia i tatou atonu e leai sa tatou Kerisimasi e aunoa ma Lana Togiola ma le Toetu. O loo molimau mai le Tusi a Mamona i le mea moni e uiga i le Keriso toetu faapea foi le tamaoaiga ma le loloto o Lana aoaoga faavae. Afai e te faaaogaina upumoni e uiga ia Keriso o loo maua i totonu o ona itulau i le vaitau o le Kerisimasi ma faasoa atu i isi, o le a e faaopoopoina ni uiga loloto i au faamanatuga o le Kerisimasi.
Ou te molimau atu o le alofa o le Faaola ma le matafaioi tutotonu i le ata o le faaolataga e aumaia ai le filemu (tagai i le Ioane 14:27) ma “se faamoemoe sili ona lelei” (Eteru 12:32)—i le vaitaimi o le Kerisimasi ma taimi uma.