“O a ‘tapuaiga faa-Aperaamo’?,” Mo Le Malosi o le Autalavou, Tes. 2023.
Tuusao i le Mataupu
O a “tapuaiga faa-Aperaamo”?
Aperaamo, saunia e Robert T. Barrett
E i ai ni taimi, atonu e te faalogo ai i se tasi o ta’ua “tapuaiga faa-Aperaamo.” Mo se faataitaiga, na saunoa Peresitene Dallin H. Oaks i se tasi taimi, “O le foai atu ia i latou e manaomia le fesoasoani o se mataupu faavae lea i tapuaiga uma faa-Aperaamo ma i isi foi” (konafesi aoao Oke. 2022 [Liahona, Nov. 2022, 6]).
O lea la, o a “tapuaiga faa-Aperaamo”? O le tali puupuu o le: faa-Iutaia, faa-Kerisiano, ma le Isalama. O le mafuaaga ua ta’ua ai i latou o lenei, ona latou te talitonu uma lava o Aperaamo o se perofeta ma o la latou tapuaiga na oo mai ia i latou e ala mai ia te ia.
Ua maua e le au Iutaia ma au Kerisiano o latou talitonuga e uiga ia Aperaamo mai le Feagaiga Tuai. O talitonuga o Musolemi e uiga ia Aperaamo e sau mai a latou tusitusiga paia, o le Koran.
“O Musolemi ma le Au Paia o Aso e Gata Ai latou te vaai atu ia Aperaamo … o se faataitaiga o le faamaoni a’ia’i, faamaoni, ma le usiusitai i le Atua. Latou te vaaia se sootaga i le va o le faa-Isalama, faa-Kerisiano, ma le faa-Iutaia ona o se tupuaga faaleagaga masani lea e fesootai ia Aperaamo. Mo lenei mafuaaga, o nei lotu e tolu e tele ina ta’ua o ‘faatuatuaga faa-Aperaamo’” (Musolemi ma le Au Paia o Aso e Gata Ai: Talitonuga, Tulaga Faatauaina, ma Olaga, Potutusi o le Talalelei).