“O Le Savali Le-Natia i le Tusi o Faaaliga,” Mo Le Malosi o le Autalavou, Tes. 2023.
Sau, Mulimuli Mai ia te A’u
Faaaliga
O Le Savali Le-Natia i le Tusi o Faaaliga
E faaopoopo atu i ana valoaga i le Afio Mai Faalua o Iesu Keriso, o le tusi o Faaaliga o loo i ai se savali mamana o le filemu ma le mafanafana.
Ou te Tu i le Puipui ma Tu’itu’i Atu, saunia e J. Kirk Richards
Fai mai nisi o tagata o le Afio Mai Faalua o Iesu Keriso e faamata’uina ai i latou. O taua, oge, faama’i—o valoaga o loo i ai nisi o faailoga matautia. Ae latou te faamatalaina foi mea mananaia na tutupu ma folafolaga paia. O lea, e faaopoopo atu i le logoina o i tatou e uiga i faailoga o le Afio Mai Faalua, ua ofoina mai foi e valoaga se faamafanafanagatele.
E moni lava lenei mea i le tusi o Faaaliga, mo se faataitaiga, lea na tusia e le Aposetolo o Ioane. O loo i ai le tele o valoaga e uiga i le Afio Mai Faalua ma o loo i ai foi nisi o fuaitau e sili ona faamafanafanaina i tusitusiga paia uma. O nisi nei o savali o le faamafanafanaga mai le tusi o Faaaliga.
E Mafai Ona E Faalogo i le Siufofoga o le Faaola ma Tatala le Faitotoa
I le Au Paia i aso o Ioane—ma i tatou—na fetalai mai le Faaola:
“Faauta, ou te tu atu i le puipui ma tu’itu’i atu: ai se tasi e faalogo mai i lo’u leo, ma tatala mai le puipui, ou te ulufale atu ia te ia, ma te tali sua foi ma ia, o ia foi ma a’u” (Faaaliga 3:20).
E finagalo le Faaola e faalatalata atu ia te oe (tagai i le Mataupu Faavae ma Feagaiga 88:63). O loo valaau mai o Ia ia te oe. E mafai ona e tatalaina le faitotoa ma valaaulia o Ia i totonu i soo se taimi.
E Mafai Ona E Maua le Puipuiga
I le tusi o Faaaliga, ua poloai mai ai le Alii, “Lo’u nuu e, ia outou o ese ia te ia [le lalolagi], ina ne’i faatasia outou i ana agasala, ina ne’i tofusia foi outou i ona mala” (Faaaliga18:4). O nei mala e leaga, ae ua faapolopoloina mo i latou o e alolofa i le amioleaga ma e le o taumafai e sosola ese mai ai.
Faalatalata atu i le Alii ma Ona tagata. Tuuese le lalolagi. E mafai ona e maua le filemu o le mafaufau ma le puipuiga i le sulufaiga o Siona.
E Mafai Ona E Manumalo
I le Faaaliga o le a e maua ai folafolaga matagofie mai le Alii i Lana Au Paia o e manumalo i le lalolagi (tagai, aemaise lava, Faaaliga 2–3). O nei faamanuiaga e faavavau e mo i latou o e osia feagaiga ma le Atua ma tausia nei feagaiga. Na aoteleina e le Alii faamanuiaga nei:
“O lē e manumalo e fai ma ona tofi nei mea, ma e avea a’u ma ona Atua, e fai fo’i o ia ma o’u atalii [po o afafine]” (Faaaliga 21:7).
Ua ta’u atu e Ioane ia te oe e le gata po o a faamanuiaga ae faapea foi le auala e mafai ona e maua ai. Ona o le “toto o le Tamai Mamoe, ma le upu a [lau] mau” (Faaaliga 12:11 Ina ia manumalo, e mafai ona e faalagolago i le alofa tunoa o Iesu Keriso ma faatino le faatuatua ia te Ia. E pei ona aoao mai Peresitene Russell M. Nelson:
“O le manumalo i le lalolagi e mautinoa lava e le faapea o le atoatoa i lenei olaga, e le faapea foi o le a suia faapogai ai ou faafitauli—aua o le a latou le atoatoa. Ma e lē faapea o le a e le faia lava ni mea sese. Ae o le manumalo i le lalolagi o lona uiga o le a faateleina lou tetee atu i le agasala. O le a faamalūlūina lou loto a o faateleina lou faatuatua ia Iesu Keriso. O le manumalo i le lalolagi o lona uiga o le tuputupu a’e e alofa i le Atua ma Lona Alo Pele e sili atu nai lo lou alofa i soo se tasi po o se isi lava mea” (“Manumalo i le Lalolagi ma Maua le Malologa,” konafesi aoao Oke. 2022 [Liahona, Nov. 2022, 96–97]).
E Mafai Ona E Saunia
O se tasi savali manino i le tusi o Faaaliga o le, o le a toe afio mai Iesu Keriso—ma e mafai ona e saunia mo lena savali e ala i le faatuatua ia Iesu Keriso, salamo, osia ma tausia feagaiga, ma tumau e oo i le iuga. Faatasi ai ma lenei sauniuniga e oo mai ai le faamautinoaga e le tatau ona e fefe i Lona afio mai. Nai lo lena, e mafai ona e manatua Lana faamafanafanaga sili mo Lana Au Paia:
“O le a soloiesea foi e le Atua loimata uma i o latou mata; e leai foi se toe oti, po o se faanoanoa, po o se aue, e leai foi se toe puapuaga; auā ua mavae atu mea muamua” (Faaaliga 21:4).
Faatasi ai ma le faamafanafanaga ma le faamautinoaga faapenei, o le a e lagona ai le fia fai atu o le mea lava lea e tasi ua faimai ai Ioane i le faaiuga o lana tusi: “Le Alii e Iesu, ia E Afio Mai” (Faaaliga 22:20).