Talia o Ia i totonu o ō Tatou Fale

Saunia e Giovanna Di Lenardo, Friuli-Venezia Giulia, Italia

Sa faamanatu mai e le afafine a la’u tama teine ia te a’u e taua le tuuina atu ia Iesu Keriso o se nofoaga faapitoa i o tatou olaga i aso uma.

I se vaitau talu ai nei o le Kerisimasi, sa ou talimalo ai i le fale i le afafine e fa tausaga le matua a la’u tama teine. O ona matua e le malolosi i le Ekalesia.

Sa ou faaaogaina lelei lo ma taimi e teuteu ai la’u laau Kerisimasi faatasi ma ia. A o ia tilotilo atu i la’u faatusa o le Fanau Mai o Iesu, lea na uma ona ou faatuina, sa faaalia se lē mautonu i ona foliga. O lea, sa amata ai ona ou faamatala atu ia te ia i se auala faigofie le tala o le fanau mai o Iesu Keriso. Sa ou faamatala atu ia te ia o le pepe o Iesu o le tagata sili lea ona lelei i le lalolagi, o le a avea o Ia o se Tupu maoae, ma o le a Ia fesoasoani mai ia i tatou i taimi uma.

Sa ou fai atu ia te ia, ona sa lē mafai e Maria ma Iosefa ona maua se nofoaga e momoe ai, o lea sa la nonofo ai i se fale o manu na lata ane. Sa toe lē mautonu foi o ia.

A o ma faaaluina faatasi le aso, e fai lava ma alu atu i le vaaiga o le Fanau mai o Iesu i lea taimi ma lea taimi ma fetuunai faatagata. E aunoa ma lona iloaina, ou te siakiina e vaai po o fea na ia aveina i ai. O taimi uma lava, na te aveesea ai le faatusa o le pepe o Iesu mai le faatanoa vao ma aveese matuamoa uga ma isi faatusa o manu mai le vaaiga o le Fanau Mai o Iesu. Ou te toe tuuina i latou i o latou tulaga, ae e toe foi atu foi o ia ma toe faame’i i latou.

I lena afiafi, ina ua moe le afafine o la’u tama teine, sa ou tau atu i a’u matuāmoa laiti o loo omia i totonu o se tama’i fale pepamalō sa lata ane, o isi manu na na tuu i fafo e aai ai, , ma na toe aveese foi le pepe o Iesu mai le faatanoa vao. Ua i’u ina ou malamalama.

Ina ua uma ona faalogo i le tala i le fanau mai o Iesu, sa manatu le afafine o la’u tama tama e lē tatau ona tuu pea se tamaitiiti faapelepele i se nofoaga lē lelei ma le lē maloloina. Sa maualuga la’u talanoa e uiga i le Faaola lea na lē mafai ai ona ia tuua o ia i se faatanoa vao e siomia e manu.

Sa faamanatu mai e si ou afafine laitiiti ia te a’u e faapea, e taua le tuuina atu i lo tatou Faaola o se nofoaga faapitoa i o tatou olaga i aso uma. Sa ia faamanatu mai foi ia te a’u e lē tatau ona pei i tatou o pule o faletalimalo lea na leai se avanoa [o o latou fale] mo le aiga o Iesu. Nai lo o lena, e tatau ona tatou talia Iesu i totonu o ō tatou fale ma loto o le Aloalii o le Filemu.