2023
Auaunaga ma le Faamaoni
Tesema 2023

“Auaunaga ma le Faamaoni,” Liahona, Tes. 2023.

O Mataupu Faavae o le Auaunaga

Auaunaga ma le Faamaoni

E mafai ona tatou faia se eseesega tele e ala i auaunaga ma le faamaoni.

o se alii o loo suaina le kiona i se palau

Ata na pueina e Kay Lynn Hodges

O le soifuaga o le Aposetolo o Peteru o se faataitaiga musuia o le faamaoni ma le tuuto i le Faaola. Ae sa tatau ia Peteru ona aoao ma tuputupu a’e i nei uiga auaumamā, e pei foi o i tatou uma. E ui ina sa ia folafola atu muamua o Iesu o le Mesia (tagai Mataio 16:16) ma sa naunau foi e oti mo Ia (tagai Luka 22:33), ae sa ia faafitia le iloaina o Iesu ina ua fesiligia (tagai Mataio 26:69–74). Ina ua uma lenei faalataina, sa “tagi lotulotu” Peteru (tagai Mataio 26:75). Na faamagalo e Iesu ia Peteru, ma mulimuli ane i le avea ai ma Aposetolo sili, na taitaia e Peteru le Ekalesia anamua a Iesu Keriso.

Ua aoao mai i tatou e lenei tala e faapea, e tusa lava pe tatou te toilalo, e mafai ona faamagaloina i tatou e ala i le Togiola a Iesu Keriso pe afai tatou te salamo moni ma faamaoni ia te Ia. Na avea Peteru ma se faataitaiga ofoofogia o le faamaoni i aso na totoe o lona soifua, e ui i sauaga ma puapuaga a o ia auauna atu i le Alii. Mulimuli ane, na ia tuuina atu lona soifua.

Na aoao mai Peteru e faapea, o le a faamanuiaina i tatou pe afai tatou te faamaoni i le Faaola e oo lava i tofotofoga ma sauaga:

“Afai e upuleagaina outou ona o le suafa o Keriso, amuia outou; aua o loo tumau ia te outou le agaga mamalu o le Atua: o loo faifaia o ia e i latou, a ua viia e outou. …

“Ae afai e faatigaina aua o ia o le Kerisiano, aua le maasiasi ai o ia; a ia vivii atu i le Atua ona o lea lava mea” (1 Peteru 4:14, 16).

E mafai ona tatou faaali atu le faamaoni e lē maluelue i le Faaola e ala i le faia e pei ona Ia poloaiina ai i tatou, ma e mafai ona tatou faaalia le faamaoni ia i latou tatou te auauna atu i ai e ala i le galulue e fausia ni faauoga moni ma faamaoni.

Atiina A’e o le Faamaoni

O le faamaoni o se uiga faa-Keriso e mafai ona tatou aoao atili i ai ma atiina a’e ia i tatou lava. O nisi nei o manatu:

  1. Fesootai atu ma le mataalia: O le manino ma le faamaoni o au fesootaiga ma le faalogo ma le mataalia i manatu o isi, e mafai ai ona e atiina a’e le malamalama ma le faatuatuaina loloto, e fesoasoani ai ia te oe e fausia ma faatumauina sootaga faamaoni.

  2. Ia faifai pea: A mafai e tagata ona faalagolago ia te oe ia i ai iina mo i latou ma ia mulimuli i au tautinoga, o le a latou faatuatuaina ma faalagolago ia te oe, ma taitai atu ai i sootaga malolosi ma faamaoni.

  3. Tatalo: Pe a e tatalo e fai ma sui o i latou e te auauna atu i ai, o le a atiina a’e lagona o le faamaoni ia i latou.

tamaitai o loo savavali ma se tamaitiiti i le kiona

Ata na pueina e Shirlene Stoddard

Auaunaga ma le Faamaoni

  1. Ia faatuatuaina: Mulimuli i tautinoga ma ia lagolagosua pe a manaomia e i latou e te auauna atu i ai le faamalosiauga.

  2. Faalogo lelei: E ala i le faalogo moni, malamalama, ma le taula’i atu mo tagata e te auauna atu i ai, e mafai ai ona e fausia ni fesootaiga malolosi atu ma faaali atu e te popole mo lo latou soifua manuia.

  3. Ia tausisia le mautinoa: O se uo faamaoni e tausia le talitonuga mautinoa pe a auauna atu—ma i taimi uma. (I tulaga faapitoa, e pei o tulaga o sauaga faatautala, talosaga atu mo se faatagaga ona fesoasoani lea ia i latou e saili le fesoasoani sa’o.)

  4. Faaali atu le alofa ma le agaalofa: Pe a e popole moni ia i latou e te auauna atu i ai, o le a latou lagonaina le faatauaina ma le talisapaiaina, ma fatuina se sootaga lea e mafai ai ona lauolaola le faamaoni.

  5. Auauna atu: Pe a tatou auauna atu i le tasi ma le isi ma le alofa, tatou te faaalia lo tatou faamaoni i le Faaola ma lo tatou naunau e fafaga Ana mamoe (tagai Ioane 21:15–17).