Ua Na’o Tusiga Faaeletonika
O le Malamalama o le Lalolagi—Sāvali Lata Mai Nei mai Perofeta, Aposetolo, ma Isi Taitai o le Ekalesia
Tagai i mea na aoao mai talu ai nei e taitai o le Ekalesia i luga o ala o faasalalauga faaagafesootai e uiga i a Iesu Keriso, o le Malamalama o le Lalolagi.
I se lalolagi o loo faateteleina ai le pogisa, o le a faaauau pea ona susulu mai le malamalama. O lena malamalama, lea e aumaia lo tatou faamoemoe ma le fiafia, e oo mai ona o Iesu Keriso, le Malamalama o le Lalolagi.
Na aoao mai e Peresitene Dallin H. Oaks, Fesoasoani Muamua i le Au Peresitene Sili:
“O Iesu Keriso o le malamalama o le lalolagi aua o ia o le puna o le malamalama lea ‘ua susulu atu mai luma o le Atua e faatumulia ai le loaloa o le vateatea’ (MF&F 88:12). O Lona malamalama o le ‘malamalama moni ua faamalamalama ai tagata uma e o mai i le lalolagi’ (MF&F 93:2). …
“… O Ana faataitaiga ma Ana aoaoga e faailoa mai ai le auala e tatau ona tatou savavali ai.”1
Tatou te taulai atu i le malamalama o Keriso aemaise lava i le taimi o le Kerisimasi, ae e susulu mo i tatou i le tausaga atoa, ma e mafai ona tatou saili e faasoa atu Lona malamalama i mea uma tatou te faia. O nei upusii mai taitai o le Ekalesia, ua faasoaina i luga o ala o faasalalauga faaagafesootai, e mafai ona fesoasoani ia i tatou e malamalama atili ai e uiga i le ala ua avea ai Keriso ma Malamalama o le Lalolagi ma auala e mafai ona tatou faataitaia ai Lona malamalama i o tatou olaga.
Malamalama Fou e Faamumuina ia i Tatou Taitoatasi
“O le tausaga lenei, o le a ou faamanatuina ai le Kerisimasi mo le taimi lona 99. I le aluga o nei tausaga e tele, ua ou maofa i le faateleina o le agaalofa ma le agalelei faaletagata lea e tulai mai i taimi uma i lenei vaitau paia. A o tatou faamanatuina le soifua mai o Ia o le Malamalama o le Lalolagi, e faamumuina le malamalama fou ia i tatou taitoatasi. O aso nei ua sili atu ona tatou manaomia ai le malamalama o Iesu Keriso nai lo se isi lava taimi. A o tatou mulimuli ia te Ia, e mafai e i tatou taitoatasi ona fesoasoani e faia lenei lalolagi ia sili atu ona lelei.”
Peresitene Russell M. Nelson, Facebook, Tes. 18, 2022, facebook.com/russell.m.nelson.
O Le Malamalama o le Kerisimasi
“Ona o le toatele o i tatou o loo tauivi ma luitau o le tausaga ua tuanai ma isi, e mafai ona faigata ona iloa le mea e mafai ona tatou liliu atu i ai mo le filemu.
“I lenei Kerisimasi, ou te valaaulia outou e faasoa atu le malamalama o le Faaola o Iesu Keriso ia i latou o siomia outou. O LONA malamalama ma LONA alofa o le a faamaloloina ai o tatou loto i lenei vaitau—ma le aluga o luitau uma o le olaga.”
Vitio: “Ua lata mai le vaitau o le Kerisimasi ma e pele i lo’u loto, e pei ona ou iloa e faapena foi mo le toatele o outou. I le tuuina mai o mea uma na tatou oo i ai i lenei tausaga ua tuanai ma isi, sei ou faasoa atu se savali e uiga i le auala e mafai ai ona tatou fesoasoani e suia olaga i lenei taimi faapitoa o le tausaga?
“… Ou te valaaulia outou ia mafaufau loloto i ni auala e mafai ona outou aapa atu ai ma fesoasoani ai i isi ia lagonaina le Malamalama o Iesu Keriso i lenei Kerisimasi. O lenei Kerisimasi, o loo faatalitali pea nisi mo malamalama [moli] ia toe ola mai. O le mafuaaga lena tatou te fiafia ai e faasoa atu le malamalama o Iesu Keriso i se taimi o le toatele o loo siomia i tatou ua i ai avega mamafa o le fefe ma le le mautonu.
“Ua ou valaaulia oe ia faia se avanoa i lou loto mo i latou o loo siomia oe o e atonu o loo tauivi e vaai i le Malamalama o le Faaola ma lagonaina Lona alofa. E leai ni meaalofa o le a tele lona faauigaina e pei o faatinoga o le alofa mama e te ofoina atu i e ua tuuatoatasi, o e ua lelavava, ma e vaivai. O meaalofa nei e faamanatu mai ai ia i tatou ma i latou le mafuaaga moni mo le vaitau: o le meaalofa o le Alo o le Atua, o Iesu Keriso, o le na soifua mai e lafoai ese le fefe uma ma aumaia le malamalama ma le olioli e faavavau ia i latou uma o e mulimuli ia te Ia.
“Ou te ofo alofa atu ia te outou, a’u uo pele, se Kerisimasi fiafia tele ma se vaitau fiafia o le fesoasoani atu i isi ia vaai ma lagonaina le malamalama o Iesu Keriso.”
Peresitene Russell M. Nelson, Facebook, Dec. 16, 2021, facebook.com/russell.m.nelson.
O Le Aloalii o le Filemu
“O lenei vaitau o aso fiafia, ia sii a’e o outou leo ma faatumu o outou loto i le olioli ma le lotofaafetai o Keriso o le Aloalii o le Filemu. O loo soifua o Ia, ma aumaia le malamalama ma le ola i le lalolagi. O Ia o lo tatou Togiola ma lo tatou Faaola i le Kerisimasi ma aso uma.”
Vitio: “O le taimi lenei e mafaufau ai e uiga ia Iesu Keriso. Ma faaali atu i a tatou galuega ma a tatou upu, o se vaega lea o o tatou olaga—e faapea a o Ia aumaia le malamalama ma le ola i le lalolagi, tatou te taumafai e faia lea lava mea e tasi i lo tatou tulaga faatapulaa o faatosinaga. Ma e manaomia ona sii ae o tatou leo ma faatumuina o tatou loto i le olioli ma le lotofaafetai o Keriso o le Tupu o le Filemu, le Aloalii o le Filemu. O loo soifua Keriso. E moni o Ia. O Ia o lo tatou Togiola i le Kerisimasi ma aso uma.”
Elder Dieter F. Uchtdorf, Facebook, Tes 11, 2022, facebook.com/dieterf.uchtdorf.
O Vavega mai le Malamalama o le Lalolagi
“O loo talanoa mai a tatou tusitusiga paia o Iesu Keriso o le malamalama ma le ola o le lalolagi.
“Ou te faasoa atu lo’u talitonuga maumaututu a o tatou o atu ma le faanatinati e faaaoga mataupu faavae o le filemu ma le agalelei o loo maua i le talalelei a Iesu Keriso i o tatou aiga, nuu, faapotopotoga, ma malo, e mafai ona tatou vaai i vavega.”
Elder Quentin L. Cook, Facebook, 30 Nov., 2022, facebook.com/quentin.lcook.
Tulaga o le Malamalama
“I le avea ai ma Kerisiano, e talitonu tagata O Le Ekalesia a Iesu Keriso o le Au Paia o Aso e Gata Ai o i tatou uma o fanau a se Tama oi le Lagi alofa ma o Iesu Keriso o Lona Alo e Toatasi na Fanaua. O loo talanoa mai a tatou tusitusiga paia o Iesu Keriso o le malamalama ma le ola o le lalolagi. O Lona malamalama o le ‘malamalama moni ua faamalamalama ai tagata uma e o mai i le lalolagi’ (Mataupu Faavae ma Feagaiga 93:2).
“Tau ina ia avea i tatou uma ma ni vaega o le malamalama i lenei vaitau faapitoa. Na saunia e Iesu Keriso le malamalama ma le faataitaiga atoatoa. Sa Ia tuuto atu Lona soifua i e matitiva, e le tagolima, o e mamai ma puapuagatia, ma le faamaeaina ma le manuia o le fuafuaga e faavavau lea sa na o Ia lava na agavaa ai. O Ia o le malamalama ma ua faatuina le faataitaiga mo i tatou. Tau ina ia tofu i tatou ma le agaga o le Kerisimasi a o tatou faamalamalamaina le lalolagi i lo tatou alofa ma le agalelei.
Elder Quentin L. Cook, Facebook, 19, Tes. 2022, facebook.com/quentin.lcook.
Mana ma le Naunautaiga
“E pei o tagata e nonofo i le tele o atunuu, o le faama’i pipisi o le KOVITI-19 na i ai se aafiaga taua ia i latou i Atenitina ma Chile. O le faigata faalelagona o loo tauivi pea ma tagata o se faamaoniga tonu lea.
“Peitai, ua avea ma se vaitau susulu atu mo i latou. A o o’u matauina i la’u asiasiga talu ai nei i Atenitina ma Chile, ua ulufale mai tagata i se vaega fou e tumu i le olioli, auaunaga, ma le faaaumeaina. O loo i ai le mana ma le naunautai i tua atu o lenei taitaiga fou. O le malamalama lea e sau mai le Faaola. O Lona alofa ma lo tatou faatuatua e mafai ona vaai mai ia i tatou e oo lava i taimi sili ona pogisa ma tuuatoatasi.”
Elder D. Todd Christofferson, Facebook, 28 Iuni, 2022, facebook.com/dtodd.christofferson.
O La Tatou Sailiga e Savavali faatasi ma Ia
“Tatou te faamanatuina le malamalama ma le upumoni na aumaia e Iesu Keriso i lenei lalolagi.
“O la tatou sailiga i le olaga o le saili lea mo le malamalama ma le upumoni ma maua faamanuiaga matagofie o le i ai o Ia e savavali faatasi ma i tatou, e ui lava i le pogisa o loo i ai i le lalolagi i aso nei. I lenei taimi matagofie ma le tausaga atoa foi, e tatau ona tatou mafaufau pe faapefea ona fesoasoani le malamalama ma le upumoni ia i tatou e savavali faatasi ai ma le Faaola. O le savavali faatasi ma Ia o le auala sili lea ona lelei e faimalaga ai.”
Elder Ulisses Soares, Facebook, 23 Tes., 2022, facebook.com/soares.u.
O Se Punavai o le Filemu ma le Olioli
“O Iesu Keriso o le malamalama o le lalolagi mo fanau uma a le Atua. A tatou mulimuli ia te Ia, e aumaia e Lona malamalama le filemu ma le olioli ia i tatou taitoatasi.”
Elder Ulisses Soares, Facebook, 16 Nov., 2022, facebook.com/soares.u.
Faatumuina o o Tatou Olaga i Lona Malamalama
“I le avea ai ma tina, ma o le taimi nei o tinamatutua, ua tatou iloa ai o le vaitau o le Kerisimasi e mafai ona avea ma se vaega e vevesi laitiiti. O nisi taimi o se vaitau o le olioli ma le faapotopotoina, ma o nisi taimi e mafai ona tiga pe faigata.
“E tusa lava po o a lagona o lau vaitau o le Kerisimasi i lenei tausaga, matou te faamoemoe e mafai ona e maua se taimi e #FaamalamalamaaileLalolagi e ala i le auauna atu i isi, faatasi ma lau fanau po o isi e pele ia te oe. Pe o tamaiti i lou olaga o ni tamaiti pepe po o ni talavou, latou te naunau ma mafai ona faia se eseesega! A o tatou auauna atu ma le magafagafa faatasi ma a tatou fanau ma e pele ia i tatou, o le a tatou faamalolosia a tatou sootaga ma le tasi ma le isi, faafailele le aoaoina a o tatou faataitaia ni mea fou, ma fausia le lotogatasi ma le malosi a o tatou tuuina atu le alofa o le Faaola ia i latou o siomia i tatou. A o tatou taulai atu ia Iesu Keriso, o le a sili atu ona faatumulia o tatou olaga i Lona malamalama.
“Saili se auala e faasoa atu ai le agalelei e aoga mo lou aiga ma lou tulaga. E le manaomia ona e faaopoopoa se mea i lau lisi o mea e fai. O le a fesoasoani le Agaga ia te oe ia iloa le auala e mafai ona e siitia faatasi ai isi.”
Peresitene Susan H. Porter, Facebook, 11 Tes, 2022, facebook.com/PrimaryPresident.
O Le Malamalama i o Tatou Loto
“O le taimi o le Kerisimasi o se vaitau matagofie o le malamalama. O lenei malamalama e susulu i luga o laau, fale, ma e sili ona patino i loto. O le malamalama tatou te vaai i ai i le Kerisimasi e faatusa i le Malamalama o Keriso. E mafai ona tatou faasoa atu lenei Malamalama a o tatou taumafai e auauna atu i le tasi ma le isi.”
Sister Amy A. Wright, Facebook, 16 Tes, 2021, facebook.com/Primary1stCounselor.