“O Le Meaalofa O Le A Lē Galo Lava Ia te A’u,” Liahona, Tes. 2023.
O Leo o le Au Paia o Aso e Gata Ai
O Le Meaalofa O Le A Lē Galo Lava Ia te A’u
Sa ou lagonaina se uunaiga e lē mafaaseseina o le aiga lenei sa manaomia ona matou fesoasoani i ai.
Ata na tusia e Anastasia Suvorova
I se tasi tausaga mo le Kerisimasi, sa tonu ai i lo’u aiga e tuuina atu le tupe sa tatau ona matou faaaluina i meaalofa mo i matou lava i se aiga o loo manaomia se fesoasoani. Sa matou tatalo ina ia iloa po o ai e fesoasoani i ai. Sa ou teuina le tupe i totonu o se teutusi i lau atotupe ina ia ou saunia pe a oo mai le musumusuga.
I ni nai aso a o lumanai le Kerisimasi, sa ō ai la’u fanau e faasee i le aisa. Ina ua ou taunuu atu i le maupuepue e piki i latou, sa ou matamata a o latou toe faia se isi faaseega mālie se tasi e agai mai i lalo o le maupuepue.
E le’i umi, ae ou maitauina ni teineiti laiti se toalua e lē o ofuina ni ofu mo le tau malulu. Sa la’ua ofuina ni ofu faatimu, ofuvae e i ai pūpū i tulivae, peleue o le tautotogo, ma totinilima taitasi o le pea e tasi. Sa fiafia tele i la’ua i le faasee atu i lalo o le maupuepue i se fasipepa malō.
A o o’u matauina i le la tamomoe atu i luga o le maupuepue i lo laua tinā, sa ou lagonaina se uunaiga e lē mafaasesēina o le aiga tonu lenei sa manaomia ona matou fesoasoani i ai. Sa ou savali atu e talanoa i le tinā. Ina ua faliu mai o ia, sa faate’ia a’u i le iloa ai sa ou iloaina o ia.
I le sefulu tausaga na muamua atu, sa avea ai a’u ma faiaoga asiasi a lenei uso. I lena vaitaimi, sa ou taoina ni falaoa i se tasi aso ma lagonaina e tatau ona ou tuuina atu se pāpāfalaoa ia te ia. Ae ina ua ou tietie atu i lona fale, sa ou maitauina se taavale e le masani ai i lana auala taavale. Sa ou manatu atonu o tali ni ana malo, ma sa ou lē manao e faalavelave. O lea, sa ou faliu ai ma toe foi i le fale.
I le afa itula mulimuli ane, na valaau mai ai le peresitene o le Aualofa e fesili mai pe mafai ona ou alu i le fale o lenei uso ma vaai lana fanau. Sa i ai o ia i le falemai, ma sa sau lona tinā e nonofo ma tamaiti ae sa naunau lava e faatasi ma lana tama teine. Sa ou faanatinati atu ae sa ou lagona le maasiasi ou te le’i mulimuli i le uunaiga muamua. Talu mai lena aso, sa ou taumafai i le mea sili ou te mafaia e mulimuli i uunaiga mai le Agaga, ae o lenei aafiaga sa tumau pea le faapopoleina ai o a’u.
Ou te faafetai sa ou toe fesootai ma lenei uso pele. I lena aso, sa lē gata ina tali mai le Tama Faalelagi i tatalo na ofoina atu e lo’u aiga ia maua se aiga e auauna atu i ai, ae sa Ia faamanuiaina foi a’u i se avanoa e faamagalo ai a’u lava mo se mea sesē na faia muamua. Ou te le’i faamoemoeina lenei meaalofa, ae o se meaalofa o le a lē galo lava ia te a’u.