O le Meaalofa Silisili o Meaalofa Uma a le Atua

Saunia e Elder Brent H. Nielson

O Le Au Peresitene o le Au Fitugafulu

A o o’u matauina le agaga o le Kerisimasi, o le a ou mafaufau i ni meaalofa se tolu.

O Iosefa ma Maria ma le lagi i le po i tua atu

Ou te maofa lava i taimi uma i le fasifuaitau “o le agaga o le Kerisimasi.” I le masina o Tesema, i atunuu Kerisiano, e iloagofie ai le i ai o se agalelei, filemu, ma le alofa. Sa ma nonofo ma lo’u toalua o Marcia i le Iunaite Setete, Finelani, Chile, Mekisiko, Niu Sila, ma Filipaina. Po o fea lava sa ma nonofo ai, na ma iloa lava i le masina o Tesema, o atunuu, nuu, ma tagata taitoatasi e lagonaina le agaga o le Kerisimasi.

Sa ou faaaluina le 30 tausaga o se loia faamasino. Sa ou fiafia lava e maitauina le aofai o ni tagata e tolopoina faamasinoga pe taumafai foi e foia a latou mataupu faaletulafono pe ave foi i tua a latou mataupu i le masina o Tesema. Sa i ai se manao ia aua nei finauvale i le Kerisimasi. E toatele sa taumafai e ausia le filemu. Ua ou maitauina e faapea i le masina o Tesema, e sili atu ona faauo o tatou tuaoi; o faatauoloa i faleoloa, faletupe, ma fale meli ua sili atu ona loto fesoasoani; ma o loo i ai se agaga o le agalelei ma le filemu a o tatou faamanatuina le vaitau o le Kerisimasi.

O le A le Agaga o le Kerisimasi?

A o o’u mafaufau loloto i lenei fesili, sa ou mafaufau e uiga i o tatou lava aafiaga patino i le vavega o le soifua mai o le Faaola. Ua aoao mai i tatou e tusitusiga paia e uiga i lo tatou muai olaga ma se Fono Tele i le Lagi.¹ Sa ta i ai a o tuuina mai e lo tatou Tama Lana fuafuaga mo i tatou e o mai i lenei lalolagi, maua se tino, ma ia tofotofoina ma suesueina. Sa faamalamalama mai e lo tatou Tama ia i tatou e faapea, o le a tatou agasala ma o le a tatou manaomia se Faaola o lē o le a totogiina a tatou agasala. Ao fetalai lo tatou Tama, “O ai se ou te auina atu?” Sa faapea atu Iesu Keriso, “O a’u lenei, auina atu a’u” (Aperaamo 3:27; tagai foi Mose 4:1–4). Ina ua tuuina mai e le Tama lenei fuafuaga ia i tatou ma tatou iloa le naunautaiga o le Faaola e sau i lenei lalolagi, sa tatou alalaga fiafia uma (tagai Iopu 38:7).

I lo tatou muai olaga, sa tatou iloa ai ina ia mafai ona tatou maua le ola e faavavau, faamamaina mai agasala, ma toe foi atu i le Tama, o le a manaomia ona fanau mai le Faaola ma faatino le Togiola, e aofia ai le Faasatauroga ma le Toetu.

I le vaeluaga o taimi, ina ua i’u ina fanau mai le Faaola, e foliga mai e talafeagai le faapea sa tatou auai faatasi ma le au talimalo faalelagi o loo vivii atu i le Atua ma faailoa atu le lotofaafetai mo lenei mea na tupu lea sa tatou faamoemoe uma i ai. Ua tusia e Luka i le ala lenei:

“Ona faafuasei lea ona faatasi mai ma le agelu o ‘au mai le lagi e toatele, ua vivii i le Atua, ua faapea ane,

“O le viiga i le Atua i mea aupitoaluga, ma le manuia i le lalolagi, o le finagalo alofa i tagata” (Luka 2:13–14).

Ona o i tatou o loo nonofo i lenei lalolagi i aso nei o ni molimau i lo tatou muai olaga i le fuafuaga na tuuina mai e le Tama ma ona e mafai ona avea i tatou ma tagata mātau i lena vaitaimi i le soifua mai o le Faaola, e leitioa a oo i le vaitau o le Kerisimasi pe a tatou faamanatuina Lona soifua mai, e manifinifi le veli ma o le vavega o le soifua mai o le Faaola e fagua ai i totonu o agaga o Kerisiano uma se alofa mo le Atua ma o latou uso a tagata.

Faasilasilaga i Leoleo Mamoe, saunia e Del Parson

O Vavega i le Taimi o le Fanau Mai o le Faaola

E tele isi vavega o le fanau mai o le Faaola lea e tosina ai Kerisiano i le vaitau o le Kerisimasi. E aofia ai le:

Sa faaali atu se agelu ia Maria e faailoa atu ia te ia o le a ia auai i se fanau mai faavavega o le taupou (tagai Luka 1:26–35).
O se agelu na faaali atu ia Iosefa e faatonu o ia e uiga i le matafaioi a Maria i le aumaia o le Faaola i le lalolagi ma le manaomia ona faamalosi ma lagolagoina o ia e Iosefa (tagai Mataio 1:20–24).
O le vavega o le fanau o se taupou (tagai Luka 2:7).
O le vavega o le malamalama o Elisapeta sa tauaveina e Maria le Faaola o le lalolagi (tagai Luka 1:39–44).
O se faaali atu a se agelu i na leoleo mamoe i le fanua o loo leoleoina a latou lafu i le po (tagai Luka 2:8–12).
O le faataunuuga o le valoaga a le agelu o le a maua e leoleo mamoe le Faaola o loo aui i ie ma taoto i se faatanoa vao (tagai Luka 2:12, 16).
O le fetu na faaali mai i le lagi sa lē gata ina maitauina i Ierusalema ma nuu lata ane ae sa maitauina foi e i latou i le Tusi a Mamona (tagai Mataio 2:1–2, 9; 3 Nifae 1:21).
Ma le mea mulimuli, o se ‘au o le lagi, atonu e aofia ai oe ma a’u, ua faatasi atu ma le agelu e vivii atu i le Atua, ma faapea atu, “O le viiga i le Atua i mea aupitoaluga, ma le manuia i le lalolagi, o le finagalo alofa i tagata” (tagai Luka 2:13–14).

O le vavega o Lona soifua mai na taitai atu ai i le vavega o lo tatou toefanauina ma le ola e faavavau, o “le meaalofa silisili lea o meaalofa uma a le Atua” (Mataupu Faavae ma Feagaiga 14:7). A o tatou mafaufau loloto i lena meaalofa, o le a taulai tonu atu o tatou manatu i le soifua mai faavavega o le Faaola o Iesu Keriso ma Lana Togiola e lē i’u. O le meaalofa a le Faaola ia i tatou e ofoofogia ma e lē mafai ona malamalama i ai.

O Le Alofa o le Tama Faalelagi

O le isi meaalofa taua e siomia ai le agaga o le Kerisimasi na tuuina mai e le Tama, o lē na faatagaina ma le loto i ai le taulaga a Lona Alo e Toatasi na Fanaua. Ua aoao mai i tatou e le Faaola i le Feagaiga Fou e faapea, o lenei meaalofa sa uunaia e le alofa o le Tama mo i tatou taitoatasi: “Auā ua faapea lava ona alofa mai o le Atua i le lalolagi, ua ia au mai ai lona Atalii e toatasi, ina ia le fano se tasi e faatuatua ia te ia, a ia maua e ia le ola e faavavau” (Ioane 3:16). O lena meaalofa o le ola e faavavau o le meaalofa silisili lea o meaalofa uma a le Atua.

Mafaufau loloto mo sina taimi i le loloto ma le lē mafaamatalaina o le alofa o le Tama mo oe. O lena alofa na taitai atu ai le Tama e fetalai atu i Lona Alo e tauave i Ona lava luga a tatou agasala ma vaivaiga.

Ona o Lona alofa mo i tatou, sa silasila atu ai le Tama i Lona Alo ua tafetoto mai pu afu ninii uma i le Faatoaga o Ketesemane (tagai Mataupu Faavae ma Feagaiga 19:18); na sasaina (tagai Mataio 27:26); sa faapaleina i le pale tuitui i luga o Lona ao (tagai Mataio 27:29); ua tuufeanu i ai (tagai Mataio 27:30); ma faasatauroina i luga o le satauro (tagai Mataio 27:35).

Sa mafai e le Tama ma le Alo ona taofi lenei mea i soo se taimi, ae ona o le alofa mo i tatou, sa La’ua faatagaina ai e faaauau, ma le iloaina ina ia mafai ona faamalieina e le alofa mutimutivale le faamasinogatonu, ina ia totogi mo a tatou agasala ma vaivaiga, o lea sa manaomia ai ona avea lenei mea ma “taulaga tele ma mulimuli” (tagai Alema 34:14–16). Vaai faalemafaufau mo sina taimi i le mapusaga na lagonaina e le Tama ina ua fetalai atu Lona Alo Pele e Toatasi i Ana upu faaiu faaletino, “Ua taunuu” (Ioane 19:30), ma punou ifo Lona ao ma tuua ai Lona tino faaletino.

O le a se mea o finagalo ai le Tama mai ia i tatou e taui atu ai mo lenei meaalofa matagofie? Ua tali e le Tupu o Peniamina lena fesili ina ua ia fai mai, “Ona pau o le mea ua ia manaomia mai ia te outou o le tausi lea o ana poloaiga” (Mosaea 2:22). Tatou te tausia Ana poloaiga a o tatou alolofa ia te Ia ma a o tatou alolofa i o tatou tuaoi (tagai Mataio 22:37–39). Afai e mafai ona tatou malamalama i le meaalofa sili a le Tama ma le meaalofa sili a le Alo, o le a tatou iloa ai “ona ua tele na [tatou] maua [tatou te] foai ai.”²

Sa faaalia le agaga o le Kerisimasi ina ua taualuga le alofa tunoa o le Tama ma le alofa tunoa o le Alo i le aso ua loa ona faatalitali i ai o le a fanau mai ai le Faaola o le lalolagi. E faaauau pea vavega i o tatou olaga taitoatasi a o le soifua mai o le Faaola ua mafai ai le vavega o lo tatou toe fanauina. E ala i Lona alofa tunoa, e mafai ai ona faaatoatoaina i tatou ia Keriso (tagai Moronae 10:32). O le meaalofa o le Tama ma le meaalofa o le Alo e aumaia ia i tatou le ola e faavavau, o le meaalofa silisili lea o meaalofa uma a le Atua.

O lenei Kerisimasi a o o’u maitauina le agaga o le Kerisimasi, o le a ou mafaufau i meaalofa e tolu: (1) o le meaalofa o le Alo a o Ia totogiina ma le loto i ai se tau e lē i’u mo agasala Na te le’i faia ma tauave le avega o faanoanoaga Na te le’i faamaitea (tagai 1 Korinito 7:23); (2) o le meaalofa ofoofogia a le Tama a o Ia faatagaina le taulaga a Lona Alo e Toatasi na Fanaua ina ia tatou maua le ola e faavavau; ma le (3) o le meaalofa e tatau ona ou foai atu a o o’u mulimuli i la Laua faataitaiga paia.

Tau ina ia liliu atu o tatou mafaufauga i lenei Kerisimasi ia i La’ua. Tau ina ia tatou mulimuli ia i La’ua a o tatou mafaufau i le meaalofa na La’ua tuuina mai ia i tatou ma talia le alofa tunoa lea ua La’ua ofoina atoatoa mai ia i tatou.³