“Ae Faapefea Pe Afai e Popole le Atua i le Taaloga, Ae Lē Na o le Au?,” Liahona, Tes. 2023.
Ae Faapefea Pe Afai e Popole le Atua i le Taaloga, Ae Lē Na o le Au?
Ua tuuto atu le Ekalesia a Iesu Keriso e auauna atu ia i latou e lē tagolima, ma ua tuuto atu foi e felagolagoma’i faatasi ma isi i lena taumafaiga.”1
Ata na tusia e Jarom Vogel
O taaloga e mafai ona pei lava o tapuaiga (o nisi e faapea mai o i latou o se tapuaiga). Latou te uunaia ni lagona malolosi. Latou te manaomia le tuuto. Latou te saunia avanoa e faamafanafana ai nuu.
E pei o ‘au taaalo, o tapuaiga o le lalolagi e i ai o latou lava igoa ma talaaga. E mafai ona e iloa le eseesega o se patele Katoliko mai se aoao Iutaia mai se taitai Musalemi mai se faifeautalai o le Au Paia o Aso e Gata Ai. E faaalia e tagata lotu le tuuto i ni auala eseese: tatou te masani i fale tapuai; tatou te lagolagoina a tatou faapotopotoga i mea tautupe; tatou te tausia aso malolo faalelotu; tatou te auauna atu i o tatou tuaoi; tatou te o i misiona.
Ma e pei ona tupu i taaloga, o nisi taimi e faataga ai e tagata lotu ni eseesega e faatauaso ai i latou i malamalamaaga faalelotu latou te fefaasoaai ai ma isi. O lenei amioga e faamalosia ai oe e faia le lelei lea e faatoa mafai ona faia pe a tatou o mai faatasi e fesoasoani le tasi i le isi ma faamanuia le lalolagi.
O tagata tuufaatasi—pe a taulai atu i le faia o mea lelei—e pei lava o lima i ni totinilima i se taeao malulu: o tamatamailima e tuufaatasi e mafanafana. O se nuu e punouai i ni galuega taua e faaolaina ai le agaga.
O Le Taaloga ma le Au
O le Alii A’oa’o o Ionatana Sacks (1948–2020), o le sa avea muamua ma a’oa’o sili o le Malo Aufaatasi, sa saunoa i se tasi taimi e uiga i le auai i se taaloga soka i le Highbury Stadium (laufanua o le Arsenal) faatasi ai ma le akiepikopo a Canterbury. Sa taalo le au a Arsenal ma Manaseta Tuufaatasi. Ina ua uma ona faailoa e le tagata faasalalau le auai atu o le taitai faalelotu, sa faapea mai Rabbi Sacks, “Sa mafai ona e lagonaina le magamaganū faataamilo lea po o le a lava le auala na e taalo ai i lenei petipetiga faalelotu, i le tasi itu po o le isi, i lena po, sa i ai ni uo a le au a Arsenal i ni tulaga maualuluga. E lē mafai ona latou faia’ina.
“O lena po,” sa ia faaopoopo mai ai, “na toilalo ai Arsenal i le latou faia’ina i o latou laufanua na sili ona leaga i totonu o le onosefulu-tolu tausaga.”
O le aso na sosoo ai, sa faasalalau ai e se nusipepa a Peretania se tusiga na faapea mai, e lē masalomia lava o se tala ula, e faapea afai e lē mafai e le auai ai o nei taitai faalelotu iloga e toalua ona aumaia se manumalo mo Arsenal, pe “faamata e le o lea ua faamaonia ai loa ii e lē o i ai se Atua?” Lea na toe faapea atu ai Rabbi Sacks, “Ua faamaonia ai o loo i ai se Atua. Pau lava ona o loo ia lagolagoina le Manaseta Aufaatasi.”
Fai mai Rabbi Sacks o lenei tala faagaeetia o loo i ai ni fatu o se malamalamaaga loloto e uiga i le taua o le lotogatasi o ekalesia soofaatasi ma le lalolagi atoa. “Ae faapefea pe afai e lē gata ina i ai le Atua i la’u itu, ae faapena foi i le isi itu?” na ia fesili ai. “Ae faapefea pe afai e popole le Atua i le taaloga, ae lē na o le au? … O o tatou tagata masani e muamua nai lo o tatou eseesega faalelotu.”2
O le taaloga o le olaga e mafai ona faamatalaina i upu nei na saunoa i ai Peresitene Gordon B. Hinckley (1910–2008) i se tusitala: “O le taua ua leva e faavavau. … O ‘au a le tiapolo e faasaga i ‘au lelei.”3 I le avea ai ma soo o Iesu Keriso, ua tatou i ai i le itu a le Faaola, “o ia sa femaliuai ma agalelei” (Galuega 10:38) ma faasoa atu Lona la susulu ma le timu i tagata uma (tagai Mataio 5:45).
E ui o nisi taimi e tatau ai ona tatou tutu ese ma faamaoni i a tatou aoaoga faavae tulaga ese, ae o le faia o mea lelei e mafai ona faia e aunoa ma le fetuuna’ia o o tatou talitonuga. O le a tatou fausia se aafiaga sili pe a tatou auai faatasi ma isi e lelei ma tutusa sini. Atonu e sili ona manino lenei mea i le taimi o faalavelave faalenatura ma isi faalavelave, lea e aumaia faatasi ai i tatou i ni auala tulaga ese. E pei ona saunoa mai le faatonu o Auaunaga Agaalofa a le Ekalesia o Sharon Eubank, “A o fevaevaea’i [le Iunaite Setete] ma a o me’i atu tagata i o latou ituaiga, ou te manatu o se tasi o lesona sili e mafai ona aoaoina—afai o loo i ai se faamoemoega lelei i se faafatiatama’i—e faapea … e mafai ona tatou faataatia ese tulaga faaupufai, ma e mafai ona tatou maua ni tulaga tutusa e toe atia’e ai o tatou nuu.4
O le fegalegaleai faatasi ma le aoao mai i isi o se taunuuga masani lea o le faafaileleina ma le faasoaina atu o aoaoga a Iesu Keriso. Ua aoao i tatou e Iesu ia alolofa i o tatou tuaoi ma ia lotogatasi. Sa le’i faamata’uina o ia i mea lelei na faia e isi vaega.
Tatou te lē o tauvā ma isi. O lo latou faatuatua ma le agalelei e mafai ona faamalosia ai o tatou lava faatuatua. Ma e sili atu mea lelei e mafai ona tatou faia pe a tutū faatasi nai lo mea tatou te mafaia pe a tatou valavala.
O faataitaiga nei e fa o loo faaalia ai le ala o loo ola ai tagata ma taitai o le Ekalesia a Iesu Keriso faatasi ai ma ni mafaufau matala ma le faamaoni i isi—faia o mea lelei mo i latou ma le faia foi faatasi ma i latou.
Ona o galuega fausia, e silia ma le 2,000 Musalemi i Kana sa le’i i ai se nofoaga e faamanatu ai o latou aso malolo faalelotu i le 2022. Na faatagaina i latou e taitai o le Siteki a Takoradi Kana e tapuai i lotoa o le nofoaga autu o le siteki. Luga: Na fesoasoani Uso Emmanuel Botwe (agavale) i le faatautaia o vaega e lua.
Fesoasoani i Musalemi e Tapuai i Kana
Na saunoa Iosefa Samita e uiga i le taua o le talimalo i tagata ese ma tagata lotu, ma folafola atu ia i latou se taliga e faalogo ina ua ia fai mai, “O le a latou maua la’u pulelaa i le aso atoa.”5
O lena tu masani faamanuiaina o loo faaauau pea i aso nei i Le Ekalesia a Iesu Keriso o le Au Paia o Aso e Gata Ai. Mo se faataitaiga, o le Au Paia agalelei i Kana. Ona o galuega fausia, sa le’i i ai se nofoaga e mafai ona faapotopoto ai ni vaega toatele mo tapuaiga a tagata Musalemi i le lotoifale i nisi taimi o le 2022. Ia Aperila o lena tausaga, na faatagaina ai ma le agaalofa e le Au Paia o Aso e Gata Ai ia soo e 2,000 o Isalama e faaaoga le nofoaga tutotonu o le Siteki a Takoradi Kana mo taumafataga ma tatalo o le Ramadan. E lua masina mulimuli ane, na faafeiloa’ia ai e taitai o le Au Paia o Aso e Gata Ai lea vaega a o latou faamanatuina le Eid Al-Adha. O aso malolo sili ia e lua a Isalama.6
Sa lotofaafetai a tatou uo Musalemi. “O tatou uma o uso ma tuafafine. E tasi lo tatou tofi” o le tala lea a le taitai sili o Musalemi i le lotoifale, o Alhaji Mohammad Awal, e faatatau i atalii o Aperaamo o Isamaeli ma Isaako.7
O Emmanuel Botwe, na valaauina e taitaia fesootaiga i le Siteki a Takoradi Kana, na saunoa sa ia atiina a’e ni sootaga ma isi tapuaiga i le eria talu mai le 2018. Ua ia valaaulia i latou e taaalo soka ma auai i se faaaliga faalelotu, konafesi faalesiteki, ma le faapaiaga o se falelotu fou.
“E tatau ia i tatou uma ona faaaloalo ma tausia e le tasi le isi e tusa lava po o a o tatou eseesega,” o le tala lea a Brother Botwe. “Ua uunaia a’u e lena mea e aapa atu—aemaise lava i o tatou uso Musalemi.” E na o le 19 pasene tagata Musalemi i Kana, o se atunuu e toatele Kerisiano. “O i tatou uma o atalii ma afafine o lo tatou Tama,” na ia faaauau ai, “o lea e tatau ai ona tutusa a tatou vaaiga.”
Ua faapaleniina e le aapa atu a Uso Botwe le agalelei i mataupu faavae. E masani ona faamanatu e Musalemi le Eid Al-Adha e ala i le ositaulagaina o se manu e pei o se mamoe po o se ‘oti. Latou te faia lenei mea e manatua ai le faatagaina e le Atua o Aperaamo e ositaulaga se mamoe nai lo lona atalii o Isaako.
“Sa matou ta’u atu i [a matou uo Musalemi] e lē mafai ona latou fasia le mamoe i la tatou lotoā. Sa matou faamalamalama atu i ai o matou talitonuga o le taulaga tupito sa faia e le Silisili Ese. Ma sa latou faaaloalogia o matou moomooga,” o le tala lea a Brother Botwe. “I le mae’a ai o le sauniga, sa latou siitia atu i le faletapuai, lea sa faia ai le taulaga e le taitai sili.”
Mo le agalelei o Uso Botwe, sa faameaalofa atu ai e le taitai sili ia te ia ni aano o le mamoe poa. Sa taliaina ma le alofa tele e Uso Botwe.
“Pe a e amata i le faaaloalo i o latou tulaga faatauaina ma talitonuga, faaaloalo ia i latou po o ai i latou—ma aua le tausalaina i latou, ia aua le faitioina i latou, e tusa lava pe tou te lē malilie faatasi ma i latou—o le a i ai iina le faaalolao,” na saunoa ai Uso Botwe.
O Au Paia o Aso e Gata Ai ua faatasi atu i isi vaega Kerisiano i Boston, Massachusetts, e foai atu meaai mo i latou e lē tagolima.
Fafagaina o e Fiaaai i Boston
O le Au Paia o Aso e Gata Ai i Massachusetts, ISA, sa galulue faatasi ma le Azusa Christian Community ma le Catholic Charities e aumai ni meaai i e matitiva i Boston, Malden, ma Springfield. Ia Novema 2022, sa foai atu ai e le Ekalesia ni pīpī tuuaisa e 3,000 ma le 40 tone o taumafa e lē pala.
E tolu loli o meaai mai le Faleteuoloa Tutotonu a le Epikopo i le Aai o Sate Leki na taunuu i Boston i le aso 19 o Novema. E afe pīpī na auina atu i le Faalapotopotoga Agaalofa a le Katoliko [Catholic Charities] i Boston e fesoasoani ia i latou i la latou tufatufaga o taumafa e 1,400 o le Aso Faafetai i aiga i le aai o le pitonuu o Dorchester. O isi pīpī e 2,000, faatasi ai ma le 40 tone o meaai, sa la’ueseina i se falelotu o le Au Paia o Aso e Gata Ai i Newton. Ona oo mai ai lea i volenitia—pe tusa ma le 400 o i latou—o e sa faaaluina o latou Aso Toonai e la’uina uta meaai ma le toe afifiina o i latou i ni pusa meaai se 2,000.
O le toalua o na volenitia, o Charles Inouye ma lona atalii o Kan, na fesoasoani e kiliva ma faatulaga ni laulau uumi ma kololi i le pakaga taavale o le falelotu. Sa fesoasoani Kan e tatala ma faaputu ia pusa pepa malo. Sa galue lona tamā i le fokilifi.
“Na aoao mai Iesu e susulu le la i tagata uma ma e pa’ū le timu i luga o e amiotonu ma e amioletonu,” o le tala lea a Uso Inouye. “Sa ou mafaufau soo talu ai nei po o le a le uiga o le ‘ia atoatoa ona lelei o la outou amio’ [Mataio 5:48]. Pe mafai ona tatou pei o le la ma le timu—foai atoatoa atu i soo se tasi, i soo se mea, i soo se taimi?”
O Reverend Eugene Rivers, o lē e taitaia le Azusa Christian Community, na asiasi atu i Newton i lena taeao. Sa ia fai mai o tagata o le faatuatua ma le agalelei o e o mai faatasi i faamoemoega lelei o le “faamoemoega sili mulimuli” lea o tagata lautele e puipuia ai i tatou mai le goto ifo i le loloto o fevaevaeaiga.
“Atonu o le a le lelei mea uma, se’i vagana ua sili atu le felagolagoma’i o faalapotopotoga o tagata tapuai,” o le saunoaga lea a Reverend Rivers.
O vaega o tagata tapuai o loo galulue faatasi e pei ona latou i ai i Boston, na saunoa Reverend Rivers, o se vaifofo faaKerisiano atamai ma mataalia—ma “na o le pau lea o le filifiliga folafolaina o loo i ai i lo tatou atunuu” e ausia ai le lotogatasi ma le atoatoa.
O le Au Paia o Aso e Gata Ai i Memphis, Tennessee, o loo galulue faatasi ma le NAACP e fesoasoani i tinā ma pepe ma faaitiitia le pasene o pepe maliliu.
Fesoasoani ai i Tina i Memphis
I Tennessee, ISA, o nisi Au Paia o Aso e Gata Ai ua auai faatasi ma uso ma tuafafine o le National Association for the Advancement of Colored People (NAACP) e fesoasoani i tinā ma a latou pepe ia tuputupu a’e i se nofoaga o loo maualuga ai le faitau aofai o pepe maliliu i le Iunaite Setete. O lenei taumafaiga o loo fesoasoani i le faataunuuina o le faamoemoega na tuuina mai e Peresitene Russell M. Nelson i le 2021 o faalapotopotoga e lua o loo galulue faatasi i auaunaga i nuu.8
Ia Novema 2022, e toafa tagata o le aiga o Dudley mai le Siteki a Memphis Tennessee na potopoto faatasi ma le tele o tagata i le Paranesi a NAACP Memphis e tufa atu pepa e uiga i se polokalama o vasega ua fuafuaina e fesoasoani ai i tinā fou ma tina maitaga i le tausiga lelei o a latou fanau.
“Sa matou maua le avanoa e tuitui atu ai i le faitotoa o se tamaitai o loo maitaga i le taimi nei,” o le tala lea a Marc Allan Dudley, o lē sa tufatufaina atu ni pepa faailo ma lona faletua, o Sonya, ma le la fanau teine e toalua. “Sa matua’i foliga fiafia o ia, ma sa ia faafetai mo le polokalama. … E fiafia tagata i le iloa ai o loo maitauina e se tasi o loo i ai se faafitauli ma o loo i ai se tasi o loo faia se mea e uiga i ai.”
“O lenei faigapaaga ua faauuina e le Atua ma musuia e le Atua,” na faaopoopo mai ai le peresitene o le Paranesi a NAACP Memphis o Van Turner. “Ua ou matua’i fiafia lava ona o loo tupu i se taimi faigata tele i lo matou aai. O loo matou feagai ma le saogalemu o tagata lautele, o loo matou feagai ma le leai o ni aiga, o loo matou feagai ma le mativa. [E taua tele ona talanoaina] le tupuaga o le tagata soifua, pe a i ai nei tagata alualutoto i le manava, ma taumafai ia mautinoa latou te maua le tausiga e tatau ai a o i ai i le manava [ona] o mai lea i fafo ma ola ai ma ia maloloina. O le taimi lava e tupu ai lena mea, e maoae lo latou amataga i le olaga.”9
Ua tuu e le Ekalesia ia Masini Foai o le Faamalamalama le Lalolagi i aai e 28 e tuu atu ai i tagata ia avanoa e faatau ai meaai, vai, tausiga faafomai, moega, ma isi sapalai mo i latou e lē tagolima.
Faamalamalamaina o le Lalolagi faatasi ai ma ni Masini Foai
Talu mai le 2017, ua saunia e le Ekalesia ni masini faifaatau e taulai atu i le foai atu (ua ta’ua o Masini Foai o le Faamalamalamaina o le Lalolagi) o se auala tulaga ese mo tagata e foai i ai e fesoasoani ai ia i latou e lē tagolima. I le 2022, o nei masini sa faaaogaina i nofoaga e 28 mai Manila i le Aai o Mekisiko. E mafai e tagata ona faatau mai aitema mo isi e pei o meaai, tui puipui, moega, vai felesi, ma manu. O foai e avatu i paaga a le Ekalesia i le lotoifale ma le lalolagi atoa.
Sa faapitoa le faia e se tasi o le Au Paia o Jenny Doan se ie soosoo e saili ai se tupe mo Masini Foai i lana eria. “Ou te manatu [o nei masini] e matuā faapitoa lava auā e lē na o le [fesoasoani] i le lotoifale, e ui lava e taua lena mea,” o le tala lea a Sister Doan. “E mafai ona e tuuina atu se ‘oti i se aiga e manaomia se ‘oti—e le o se mea e mafai ona masani ona e afifiina ma tuu i totonu o se pusa. Ae o iinei ua e maua ai le avanoa e faia ai lena mea. Ma o na ituaiga o mea e suia ai olaga o tagata.”10
O Tiffany Bird, o se Au Paia o Aso e Gata Ai i Atlanta, Georgia, sa ia faaigoaina le Masini Foai o se “auala tulaga ese e fesoasoani ai i la’u fanau ia iloa le foai atu i isi. O le vaaia o oloa i totonu o masini, latou te iloa ai le auala o loo i ai aiga ma tamaiti o siomia i latou e lē o i ai ni manaoga autu o aso taitasi. Ma o se avanoa lenei mo i latou e faia ai se mea e uiga i lena mea.”11
I le konafesi aoao ia Oketopa 2022, na sii mai ai e Peresitene Dallin H. Oaks, Fesoasoani Muamua i le Au Peresitene Sili, le aoaoga a Elder Orson F. Whitney e faapea “o loo faaaogaina e le Atua le sili atu ma le toatasi ni tagata mo le faataunuuina o lana galuega sili ma le ofoofogia. … E telē na’uā ma faigata tele mo soo se tagata se toatasi.” Ona apoapoai mai lea o Peresitene Oaks ia tatou “nofouta atili ma talisapaia atili le auaunaga a isi.”12
E pei ona fai mai ai Rabbi Sacks, e faatatau i le taaloga, ae le na o le au. Pe e Au Paia o Aso e Gata Ai pe leai, ua tatou i ai uma faatasi i lenei mea.