“Mga Miyembro Nagkahiusa sa Pagserbisyo sa ubang mga Tawo sa Chennai,” Liahona, Dis. 2024.
Mga Istorya gikan sa Mga Santos, Volume 4
Mga Miyembro Nagkahiusa sa Pagserbisyo sa ubang mga Tawo sa Chennai
Litrato gikan sa Majority World / UIG / Bridgeman Images
Usa ka gabii sa Disyembre 25, 2004, ang mga miyembro sa Chennai First Branch sa silangang kabaybayonan sa India nalingaw sa kalihokan sa Pasko. Wala gyod sila magdahom nga sa pagkasunod buntag usa ka dako nga linog ang mahitabo sa Indian Ocean sa kabaybayonan sa Sumatra. Ang gikusgon sa linog mikatap tabok sa dagat, nagdala og tag-as nga balod sa tubig sa dagat padulong sa yuta. Tag-as kaayo nga mga balod midasmag sa mga lungsod ug mga baryo sa India, Indonesia, Sri Lanka, Malaysia, ug Thailand, mipabaha sa kadalanan ug miguba og mga balay ug mga bilding. Wala mahibaloi nga gidaghanon sa mga tawo nawala o namatay.
Sa dihang sila si Elder Alwyn Kilbert ug si Revanth Nelabelle, mga misyonaryo nga nagserbisyo sa Chennai, miabot sa simbahan human nianang buntaga, nakamatikod sila nga adunay dili maayo. Sa baybayon, ang mga polis nagbutang og mga barikada aron magpalayo ang mga manan-away ug nagpatrol sa dapit sakay sa kabayo. Sa daplin sa baybayon, ang mga tawo nanguha sa mga lawas gikan sa tubig. Makita sa mga misyonaryo nga ang tubig ug ang kadaot miabot og sobra sa tunga sa milya (0.8 km) gikan sa baybayon.
Nianang gabhiona ang Simbahan mipadala og mga trak nga puno sa mga suplay gikan sa duol nga lungsod nga mga 400 ka milya (640 km) ang gilay-on alang sa mga Santos nga iapud-apod niadtong nanginahanglan sa Chennai. Sa buntag, ang mga miyembro ug ang mga misyonaryo nagpundok sa meetinghouse sa Chennai First Branch aron sa pagtabang sa proyekto sa pagserbisyo nga giorganisar sa duha ka branch sa siyudad. Sulod sa misunod nga duha ka adlaw, nagpundok sila ug nagbahig og mga relief kit nga adunay sinina, hapin sa higdaanan, mga butang nga pang-limpyo sa lawas, ug mga kagamitan sa pagpangaon.
Litrato sa maayong kabubut-on sa Church News
Sukad miigo ang tsunami, ang mga Santos sa Ulahing mga Adlaw sa nasod nag-apud-apod og mga butang nga gihatag sa Simbahan ngadto sa mga biktima. Human makakarga sa mga trak nga adunay gatosan ka mga kit pang-limpyo sa lawas ug uban pang mga suplay, ang mga misyonaryo ug ang uban pa mibiyahe uban ni Presidente Brent Bonham sa India Bangalore Mission aron sa paghatod niini ngadto sa estasyon sa Indian Red Cross.
Didto sa estasyon, ang tawo nga mitimbaya kanila nakamatikod sa ilang mga name tag. “Oh, gikan kamo sa Simbahan,” miingon siya. “Unsay inyong gidala?”
Mitubag sila nga sila adunay mga suga, mga kit pang-limpyo sa lawas, ug pipila ka tonelada nga sinina. Ang opisyal nalipay sa mga donasyon ug misulti kanila sa pagpasulod sa mga trak ngadto sa pasilidad.
Sa sulod nakita nila ang mga tawo nga nagpundok sa dako kaayong tinumpi nga sinina. Ang mga tawo gikan sa laing mga relihiyon ug mga organisasyon naghatod usab og mga suplay, ug ang mga misyonaryo migahin og pipila ka oras sa pagdiskarga gikan sa mga trak ug mibalhin sa mga suplay diin kini gikinahanglan.
Samtang si Elder Kilbert mitan-aw sa mga tawo gikan sa nagkalain-laing mga grupo, naemosyonal siya kon sa unsa nga paagi silang tanan nagtinabangay tungod sa gugma alang sa ilang mga silingan. “Adunay maayong mga tawo bisan asa,” naghunahuna siya.