Ang Gasa sa Gugmang Putli

Ni Elder Takashi Wada

Sa Seventy

Ang tiunay nga gugma ni Kristo makapausab sa atong mga kinabuhi kon kita magtinguha niining bililhon nga gasa.

Kita gidapit nga mahimong sama sa atong Manluluwas, si Jesukristo. Siya miingon: “Busa, unsa nga matang sa mga tawo kamo angay nga mahimo? Sa pagkatinuod sultihan ko kamo, gani sama kanako” (3 Nephi 27:27). Samtang kita maningkamot nga mahimong mas sama Kaniya, kinahanglan nga magtinguha kita og gugma nga putli bisan sa labing mahagiton nga mga panahon.

Si Moroni, ang kataposang Nephita nga propeta, nagpakabuhi sa “hilabihan ka mapintas” nga mga gubat ug nakasaksi sa hingpit nga kalaglagan sa iyang katawhan. Tungod kay ang iyang mga kaaway nanumpa sa paglaglag sa tanan nga dili molimod ni Jesukristo, si Moroni naglatagaw nga nag-inusara “alang sa kaluwasan sa [iyang] kaugalingon nga kinabuhi” (Moroni 1:2–3).

Niining mangilngig nga sitwasyon, si Moroni misulat “og dugang pa nga mga butang,” nanghinaot nga kini “mahimo nga bililhon … sa umaabot nga adlaw” (Moroni 1:4). Giapil niya “ang mga pulong sa [iyang] amahan nga si Mormon,” kinsa mitudlo nga kita “kinahanglan gayod adunay gugma nga putli; kay kon [kita] walay gugma nga putli, [kita] walay kapuslanan.” “Ang gugma nga putli mao ang tiunay nga gugma ni Kristo,” mipadayon si Mormon, “ug kini molahutay sa kahangtoran” (Moroni 7:1, 44, 47).

Ang gugma nga putli mao ang gasa nga atong madawat sa higayon nga kita “mag-ampo ngadto sa Amahan uban sa tibuok kusog sa kasingkasing, nga [kita] unta mapuno niini nga gugma, diin siya mitugyan diha sa tanan kinsa tinuod nga mga sumusunod sa iyang Anak, nga si Jesukristo” (Moroni 7:48).

Isip lain nga tugon ni Jesukristo, ang Basahon ni Mormon maayo kaayo nga nagpamatuod sa tiunay nga gugma ni Kristo ug nagtudlo kon unsaon nato sa pagkab-ot sa gasa sa gugmang putli sa atong kinabuhi.

Ang Gugma ni Kristo alang Kanato

Gikan sa mga pagtulun-an ni Mormon, makat-onan nato nga ang gugma nga putli konektado nga dili mabulag ngadto sa Manluluwas. Ang labing mahinungdanong pagpahayag sa gugma nga putli mao ang gugma nga nagagikan ni Jesukristo pinaagi sa Iyang maulaong sakripisyo.

Nagsulti ngadto sa Manluluwas, si Moroni miingon:

“Ako nahinumdom nga ikaw nag-ingon nga ikaw nahigugma sa kalibotan gani ngadto sa pagtugyan sa imong kinabuhi alang sa kalibotan. …

Ug karon ako nasayod nga kini nga gugma diin ikaw aduna … mao ang gugma nga putli” (Ether 12:33–34).

Sa pagsugod sa Iyang pangalagad diha sa Basahon ni Mormon, ang nabanhaw nga Manluluwas midapit sa katawhan sa pagduol ug sa paghikap sa marka sa Iyang kilid ug sa mga agi sa lansang sa Iyang mga kamot ug mga tiil aron sila makaila Kaniya ug sa unsay Iyang nahimo tungod sa tiunay nga gugma alang sa tibuok kalibotan (tan-awa sa 3 Nephi 11:14–15).

Ang gugma ni Kristo dili gayod mapakyas. Si Mormon mitudlo nga kita kinahanglan nga “[mo]unong ngadto sa gugma nga putli, nga mao ang labing mahinungdanon sa tanan” (Moroni 7:46). Si Presidente Jeffrey R. Holland, Akting nga Presidente sa Korum sa Napulog duha ka Apostoles, miseguro kanato nga “ang tiunay nga gugma lamang ni Kristo ang mosuporta kanato atol sa malisod nga panahon. Ang gugma ni Kristo mainantoson, ug mabination. Ang gugma ni Kristo nga dili manghambog ni dili dali masuko. Ang iyang tiunay nga gugma lamang ang nakapahimo kaniya—ug kanato—nga mainantoson sa tanan nga butang, matuohon sa tanan nga butang, malaomon sa tanan nga butang, ug malahutayon sa tanan nga butang. [Tan-awa sa Moroni 7:45.]”

Usa ka paagi nga atong madawat kining gasa sa gugma nga putli mao ang pagsunod sa pagtulun-an sa Manluluwas sa “paghinulsol … ug duol ngari kanako, ug pagpabunyag diha sa akong ngalan, ug pagbaton sa hugot nga pagtuo kanako, nga kamo maluwas” (Moroni 7:34).

Ang Atong gugma alang ni Kristo

Human makapaminaw ni Hari Benjamin nga namulong mahitungod ni Jesukristo, ang iyang katawhan nakasinati og “dakong kausaban … sa [ilang] kasingkasing” ug “wala nay tinguha sa pagbuhat og daotan, apan sa pagbuhat og maayo kanunay” (Mosiah 5:2).

Kini nga kausaban, posible lamang pinaagi ni Jesukristo ug sa Iyang Pag-ula, naghimo ngari kanato og kasingkasing nga puno sa gugma alang ni Kristo. Kini nga gugma mas labaw pa kaysa pagpasalamat, pagbati, o pagdayeg lamang. Kon kita tinud-anay nga nahigugma ni Kristo, ihatag nato ang atong tibuok kasingkasing ngadto Kaniya.

Sa dihang ang amahan ni Hari Lamoni nakadungog sa ebanghelyo, nagtinguha siya nga modawat sa Espiritu ug sa pag-angkon og kinabuhing dayon. “Tan-awa,” miingon siya, “biyaan nako ang tanan nakong gipanag-iya, oo, ako mobiya sa akong gingharian, aron akong madawat kining hingpit nga kamaya”(Alma 22:15). Pinaagi sa pag-ampo, gisultihan niya ang Ginoo, “biyaan nako ang tanan nakong sala aron makaila kanimo”(Alma 22:18).

Ang uban diha sa basahon ni Mormon mipakita niini nga gugma alang ni Kristo. Ang mga Anti-Nephi-Lehi “mihunong sa paggamit sa mga hinagiban sa ilang pagsupil,” (Alma 23:13) ug gilubong nila kini sa “ilawom sa yuta” (Alma 24:17). Sila nakigsaad nga sila “dili na gayod mogamit pag-usab sa [ilang] mga hinagiban,” ug “kay sa magpaagas sa dugo sa ilang kaigsoonan itugyan nila ang ilang kaugalingon nga mga kinabuhi” (Alma 24:18). Hingpit silang nakabig nga sila “wala gayod mobiya” (Alma 23:6).

Gipakita nato ang atong gugma alang ni Kristo pinaagi sa pagtuman sa Iyang mga sugo, pagdawat og mga ordinansa sa kaluwasan ug kahimayaan, paghimo ug pagtuman sa mga pakigsaad, ug sa pagpakabuhi isip Iyang mga disipulo. Ang atong gugma alang Kaniya nag-impluwensiya sa tanan nga atong gihimo.

The Good Samaritan [Ang Maayong Samaryanhon], ni Walter Rane

Ang Atong Gugma alang sa Usag Usa

Dugang pa sa pagbati og gugma gikan ni Kristo ug alang ni Kristo, kinahanglan nga maningkamot kita nga makabaton og gugma nga putli, o Kristohanon nga gugma, alang sa usag usa.

Si Enos nag-ampo tibuok adlaw ug gabii alang sa kapasayloan sa iyang mga sala. Human siya mapasaylo ug napuno sa gugma sa Manluluwas, gibubo niya ang iyang tibuok kalag sa pag-ampo alang sa iyang katawhan—ug alang sa iyang mga kaaway (tan-awa sa Enos 1:4–12). Napuno sa gugma nga putli, ang mga anak nga lalaki ni Mosiah usab “nagtinguha sila nga ang kaluwasan kinahanglan ipadayag ngadto sa matag nilalang, kay dili nila maagwanta nga bisan usa ka kalag sa tawo malaglag” (Mosiah 28:3).

Ang gugma nga putli mopalambo sa paagi sa atong pagtan-aw ug pagtagad sa uban. Si Presidente Russell M. Nelson mitudlo: “Ang gugma nga putli moimpluwensya nato ‘sa pagtambayayong sa usag usa nga mga alantoson’ [Mosiah 18:8] kay sa maghatag og kalisod sa usag usa. Ang tiunay nga gugma ni Kristo nagtugot nato nga ‘mobarog isip mga saksi sa Dios sa tanang panahon ug sa tanang butang,’ [Mosiah 18:9]—ilabi na sa lisod nga mga sitwasyon.”

Sa dihang ang mga igsoon nga lalaki ni Nephi migapos sa iyang mga kamot ug tiil og pisi, tuyo nga pasagdan siya nga mamatay sa kamingawan, si Nephi nag-ampo alang sa panabang ug ang Ginoo miluwas kaniya (tan-awa sa 1 Nephi 7:16–18). Imbes magtinguha nga manimalos sa iyang mga igsoong lalaki, sama sa buhaton sa usa ka kinaiyanhon nga tawo, gipakita ni Nephi kon sa unsa nga paagi nga ang gugma nga putli “mainantoson” (Moroni 7:45) pinaagi sa “walay lipod-lipod [mipasaylo] kanila sa tanan nga ilang nabuhat” (tan-awa sa 1 Nephi 7:21).

Kon ang tanan adunay gasa sa gugmang putli, makaamgo kita unsa ang nasinati sa mga tawo sa Basahon ni Mormon human mobisita kanila ang Manluluwas, mitudlo kanila, ug mitukod sa Iyang Simbahan diha kanila: “Walay panagbingkil … tungod sa gugma sa Dios nga anaa sa [ilang] mga kasingkasing” (4 Nephi 1:15).

Ang Labing Bililhon nga Gasa

Sa dihang si Nephi nakadungog sa iyang amahan naghisgot mahitungod sa iyang panan-awon sa kahoy sa kinabuhi, si Nephi miingon nga siya “nagmatinguhaon … nga ako makakita, ug makadungog, ug masayod niini nga mga butang, pinaagi sa gahom sa Espiritu Santo” (1 Nephi 10:17). Napanalanginan si Nephi nga makat-on og dugang mahitungod sa gugma nga putli sa dihang nakakita siya sa kahoy sa kinabuhi, nga nagrepresentar sa gugma sa Dios—“ang labing madanihon labaw sa tanang butang” ug “makalipay kaayo sa kalag” (1 Nephi 11: 22, 23).

Unya si Nephi misulat:

“Kinahanglan nga kamo mopadayon sa unahan uban ang pagkamakanunayon diha kang Kristo, magbaton og hingpit nga kahayag sa paglaom, ug gugma sa Dios ug sa tanang tawo” (2 Nephi 31:20).

Moabot ang adlaw nga kita mobarog sa atubangan sa Manluluwas. Niana nga adlaw, kon kita nakaangkon og eksakto nga panan-aw sa Iyang kinaiya, mga hiyas, ug tahas isip atong Manunubos, “kita mahisama kaniya, kay kita makakita kaniya nga mao gihapon” (Moroni 7:48). Ang igsoon nga lalaki ni Jared nakasinati niini samtang nagbarog siya sa atubangan ni Jesukristo, kinsa miingon, “Wala pa gayod Ako makapakita sa akong kaugalingon ngadto sa tawo … , kay wala gayoy tawo nga mituo kanako ingon kanimo. Nakaamgo ba ikaw nga ikaw gilalang subay sa akong kaugalingon nga hitsura?” (Ether 3:15).

Tungod ni Jesukristo, “kita mahimo nga makabaton niini nga paglaom; aron mahimo kita nga putli ingon nga siya putli” (Moroni 7:48). Imposible kanato nga makakab-ot niini nga mag-inusara. Ang gugma nga putli gihatag kanato isip usa ka gasa gikan Kaniya, ug kon kita “makaplagan nga aduna niini sa kataposan nga adlaw, kini makaayo uban [kanato]” (Moroni 7:47).

Ako mopamatuod nga ang gasa sa gugmang putli adunay gahom sa pag-usab sa pagpakabuhi sa tawo kon kita motugot niini. Hinaot nga kita mag-ampo sa tanang kalagsik sa atong mga kasingkasing aron modawat sa tiunay nga gugma sa Manluluwas alang kanato, modako ang atong gugma alang Kaniya, ug, isip Iyang tinuod nga mga sumusunod, mopakigbahin niining labing bililhon nga gasa ngadto sa uban.