Ang Gasa nga Laing Tugon ni Jesukristo

kinulit nga hulagway ni Maria uban sa bata nga si Jesus

Si Jesukristo mao ang diwa sa Pasko, ang kahayag sa Pasko, ug ang sentro sa Pasko. Diha sa mga pahina sa Basahon ni Mormon anaa ang diwa, kahayag ug pagpunting ngadto sa Pasko kay nagtudlo kini mahitungod ni Jesukristo ug kon unsaon sa pagduol ngadto Kaniya. Aniay duha lamang ka paagi nga ang Basahon ni Mormon nagtudlo kanato sa pagpaduol pa gayod Kaniya.

Ang Gasa sa mga Pakigsaad

Ang Basahon ni Mormon naghatag kanato og mas lawom nga kahibalo kon unsay ipasabot sa pagbaton og usa ka relasyon sa pakigsaad ngadto sa Dios (tan-awa, pananglitan ang, 1 Nephi 15:18; Mosiah 5:5; 18:13; 3 Nephi 20:26). Ang ulohan nga pahina niini nag-ingon nga ang katuyoan sa Basahon ni Mormon, dunay daghan pang uban, mao ang pagtabang sa salin sa balay ni Israel aron “mahibaloan nila ang mga pakigsaad sa Ginoo, nga dili sila ipahimulag sa kahangtoran.” Ang Basahon ni Mormon naghatag kanato sa gipahiuli nga kahibalo sa relasyon sa pakigsaad nga mahimo natong maangkon uban sa Langitnong Amahan pinaagi ni Jesukristo ug sa Iyang Pag-ula.

Samtang mohimo ug motuman kita og sagradong mga pakigsaad pinaagi sa bunyag ug ngadto sa templo, mas mapaduol kita sa Langitnong Amahan ug ni Jesukristo sa paagi nga kita mabugkos ngadto Kanila, sa paagi nga magdala kanato pabalik ngadto Kanila.

Ang Gasa sa Gugma

Ang atong pagtuon sa Basahon ni Mormon makatabang kanato nga makasabot nga si Jesukristo mao ang kinatas-ang gasa sa gugma (tan-awa sa 1 Nephi 11:16–23) ug nga Siya nahigugma kanato sa tinagsa-tagsa.

Human sa Iyang Pagkabanhaw, ang Ginoo midapit sa mga Nephita sa [pag]”tindog ug duol kamo kanako, aron inyong ihikap ang inyong mga kamot sa akong kilid, ug usab inyong mabati ang mga agi sa lansang sa akong mga kamot ug sa mga tiil, aron masayod kamo nga Ako ang Dios sa Israel, ug ang Dios sa tibuok yuta, nga gipatay tungod sa mga sala sa kalibotan.

“… Ug ila kining gihimo, miduol sa tinagsa-tagsa” (3 Nephi 11:14–15).

Kini nga mga bersikulo nagpakita kanato nga ang tinguha sa Manluluwas alang kanatong tanan, sa bisan asa ug sa matag sitwasyon, mao ang pagduol Kaniya, pagkat-on Kaniya, ug pagbati sa Iyang gugma. Si Jesus, sa Iyang walay kataposan nga gugma, andam nga misakripisyo sa iyang kaugalingon aron ibayad sa kantidad sa atong mga sala, naghatag kanato sa oportunidad nga malimpyohan, makig-uli sa Dios, ug sa kataposan makabalik sa presensiya sa Dios (tan-awa sa Alma 34:13–17; Helaman 14:15–17; 3 Nephi 27:14–22).

Makapakita kita sa atong pasalamat sa gasa sa Basahon ni Mormon pinaagi sa pagbasa niini ug sa pagsunod sa mga pagtulun-an sa Manluluwas. Kon buhaton nato kini, atong gihangop ang tinuod nga diwa sa Pasko, magdala og kahayag sa atong kinabuhi dili lamang sa Disyembre apan sa tibuok tuig.

Litrato sa Basahon ni Mormon sa Georgian nga pinulongan