Digital Lamang
2 ka Leksiyon gikan sa Hiwi nga mga Suga sa Pasko
Ang tagsulat nagpuyo sa Utah, USA.
Ang mga dalan sa kinabuhi dili kanunay nga tul-id, apan ang kahayag ni Kristo nagdan-ag gihapon sa dalan.
Hapit na magwalo ka tuig sukad nga nagbutang ko og mga suga sa Pasko sa balay sa akong ginikanan. Tungod sa lain-laing mga kahimtang, ang akong pamilya wala magkauban sa dugay na nga panahon. Dili ko ganahan nga magbutang og dekorasyon sa akong balay, tungod kay naglagot ko nga dili makauban ang akong pamilya. Apan, dili nako matago ang gibati sa akong kasingkasing: aduna akoy kusog nga pagbati sa pagbutang og mga suga sa Pasko.
Gikumbinser nako ang akong igsoon nga tabangan ko sa pagbitay niini. Tali sa trabaho, eskuwelahan, ug lain-laing mga responsibilidad, pipila ka adlaw among gigahin aron mahuman ang pagbitay sa mga suga. Sa dihang nahuman na mi, duha ka mahinungdanong leksiyon ang akong naamgohan.
Ang una mao nga ang kinabuhi dili kanunay magsubay sa tul-id nga dalan. Among gisugdan sa pagbitay ang mga suga sa hapsay nga mga laray, apan sa pag-abot namo sa luyo sa balay, among namatikdan nga kami adunay mas daghang suga kay sa among gidahom. Nakahukom mi nga ibitay ang nahibiling mga suga sa ubos nga bahin sa balay, nga mas hiwi kay sa ubang mga suga. Diha ko nakaamgo nga ang akong kinabuhi sama niining mga suga. Naningkamot ko nga modiretso, nga dili motipas sa dalan sa ebanghelyo ni Jesukristo. Pero usahay, masayop ko ug wala ko kabalo unsay angay nga buhaton. Ang Ginoo miingon, “Siya kinsa naghinulsol sa iyang mga sala, ang mao gipasaylo, ug Ako, ang Ginoo, dili na mahinumdom [niini]” (Doktrina ug mga Pakigsaad 58:42). Bisan pa man nga nagsambod ang mga suga sa Pasko, nagpadayon sila sa pagsilbi sa ilang katuyoan: ang paghatag og kahayag ug pagdan-ag sa akong balay. Sama sa mga suga, dili ako perpekto. Nakahimo ko og mga sayop apan makakita gihapon sa kahayag ug makasunod sa plano sa Dios alang kanako, salamat sa Pag-ula ni Jesukristo.
Ang ikaduhang butang nga akong nakat-onan mao nga ang Kahayag ni Kristo anaa kanunay. Sa ibabaw, sa ubos, sa tuo, sa wala—anaa kini, andam sa paghatag kanato og giya ug koreksyon. Sa Moroni 7:19, atong mabasa nga kita kinahanglang makugihong mangita diha sa Kahayag ni Kristo aron kita makaila tali sa maayo ug sa daotan. Akong gibati nga ang Espiritu Santo ang misulti sa akong kasingkasing aron akong mabitay kadto nga mga suga ug mahinumdom nga si Jesukristo anaa, nagtawag kanako ug naghatag kanako og giya. Ang Kahayag ni Kristo nagdan-ag sa tibuok tuig, dili lang sa espesyal nga mga panahon sama sa Pasko.
Ang mga suga sa akong panimalay mahimong dili ang labing nindot sa kasilinganan, apan kini nagpahinumdom nako nga ang akong paninguha sa pagsunod sa Manluluwas nagdala og mga panalangin diha sa akong kinabuhi.