Ang Pagtuo Magdala og mga Milagro

Ang Ether 12 ug ang Moroni 7 naghisgot sa mga panalangin nga mahimong moabot sa atong mga kinabuhi kon kita mogamit sa hugot nga pagtuo diha ni Jesukristo. Ang Ether 12 mipakigbahin og mga ehemplo niadtong kinsa milihok inubanan sa gahom sa hugot nga pagtuo. Sama pananglitan:

“Tan-awa, kini tungod sa hugot nga pagtuo ni Alma ug ni Amulek nga nakahimo sa bilanggoan nga malumpag ngadto sa yuta.

“Tan-awa, kini tungod sa hugot nga pagtuo ni Nephi ug ni Lehi nga nakahimo og kausaban diha sa mga Lamanita …

“Tan-awa, kini tungod sa hugot nga pagtuo ni Ammon ug sa iyang mga kaigsoonan nga nakahimo sa mga kahibulongan nga milagro taliwala sa mga Lamanita.

“Oo, ug gani tanan sila kinsa nakahimo og mga milagro nakahimo kanila pinaagi sa hugot nga pagtuo” (Ether 12:13–16).

Ang mga panalangin sa hugot nga pagtuo dili limitado ngadto sa mga lalaki ug mga babaye diha sa mga kasulatan—ang paghimo og mga aksyon pinaagi sa hugot nga pagtuo nagpanalangin kanato karon. Ang mosunod mao ang mas bag-o nga mga ehemplo sa hugot nga pagtuo:

Pinaagi sa Hugot nga Pagtuo, usa ka Miyembro sa Korea Mipakigbahin sa Ebanghelyo ngadto sa Liboan

Ang Santos sa Ulahing mga Adlaw nga si Hwang Keun Ok mitrabaho sa usa ka balay sa mga ilo [orphanage] sa South Korea niadtong mga 1960. Sa dihang ang mga esponsor sa balay sa mga ilo nakahibalo nga si Sister Hwang usa ka miyembro sa Simbahan, mihatag sila kaniya og kapilian: mobiya sa Simbahan o moluwat [resign] sa iyang trabaho. Siya miluwat. Paglabay sa lima ka tuig, miabli siya og bag-ong panimalay alang sa mga batang babaye sa Seoul. Nakig-uban sa mga misyonaryo nga Santos sa Ulahing mga Adlaw, mihimo sila og mga konsiyerto sa tibuok nasod nga nakatabang sa pagsangyaw sa ebanghelyo ngadto sa liboan.

Freiberg Germany Temple

Pinaagi sa Hugot nga Pagtuo, Ang mga Miyembro sa East Germany Nakadawat og Templo

Samtang nagbisita sa komunistang East Germany niadtong 1968, si Presidente Thomas S. Monson, kanhi usa ka sakop sa Korum sa Napulog Duha ka Apostoles, misaad sa mga Santos, “Kon kamo magpabilin nga matinuoron ug matinud-anon sa mga sugo sa Dios, ang matag panalangin nga natagamtaman ni bisan kinsa nga miyembro sa Simbahan sa bisan hain nga nasod inyong madawat.” Nianang higayona, ang labing duol nga templo anaa sa Switzerland, apan ang East Germany ubos sa estrikto nga lagda sa gobyerno. Ang mga miyembro sa Simbahan balik-balik nga wala hatagi og mga visa aron mobiyahe didto.

Si Presidente Spencer W. Kimball mitambag ni Henry Burkhardt, presidente sa misyon sa Simbahan sa Dresden, nga makighigala sa mga opisyal sa komunista sa nasod. Bisan og kini lisod, milihok siya inubanan sa hugot nga pagtuo. Ang mga miyembro nagpuasa ug nag-ampo, ug si Henry nakapalambo og panaghigalaay sa daghang opisyal sa gobyerno ug kanunay nga mihangyo nga tugotan ang mga miyembro sa Simbahan sa pagbiyahe ngadto sa templo. Niadtong 1978, sa dihang mihangyo na usab siya, usa ka opisyal miingon, “Nganong dili man kamo magtukod og templo dinhi?”

Ang taas nga paghulat natapos na, ug ang Simbahan mitukod og templo sa Freiberg, Germany, nga gipahinungod niadtong 1985 ni Presidente Gordon B. Hinckley.

Mga miyembro sa Simbahan sa usa ka debosyonal sa Tonga, Mayo 2019

Pinaagi sa Hugot nga Pagtuo, ang mga Miyembro sa Tonga Naminaw sa Propeta nga Nagpaulan

Si Presidente Russell M. Nelson ug ang iyang asawa, si Sister Wendy Nelson, mibisita sa mga Isla sa Pasipiko niadtong 2019 atol sa panahon nga kusog ang ulan. Unya si Presidente Nelson nahinumdom:

“Ang mga miyembro nagpuasa ug nag-ampo nga ang ilang mga miting nga ipahigayon sa gawas mapanalipdan gikan sa ulan.

“Didto sa Samoa, Fiji, ug Tahiti, pagsugod gayod sa mga miting, mihunong ang ulan. Apan sa Tonga, ang ulan wala mohunong. Apan ang 13,000 ka matinud-anong mga Santos nangabot og sayo aron makalingkod, mapailobong naghulat diha sa padayon nga pagpangatagak sa ulan, ug dayon naglingkod nga basa kaayo sa duha ka oras nga miting.

“Among nakita ang labihan ka madasigong hugot nga pagtuo nga anaa sa matag usa niadto nga mga taga-isla—hugot nga pagtuo nga igong mopahunong sa ulan, ug hugot nga pagtuo nga magpadayon bisan ang ulan wala mohunong.”