15 ka Rason sa Pagpadayon og Basa sa Basahon ni Mormon Kada Adlaw

Ni Stan Thomasson

Tan-awa kon mouyon ka ba sa akong lista, o tingali, pagdiskobre og imong kaugalingong lista!

Nagbasa ko og gatosan ka libro matag tuig sa daghang matang. Sa pagkakaron ang labing makahuloganon kaayo ug ang akong paborito mao ang Basahon ni Mormon: Laing Tugon ni Jesukristo.

Dili kanunayng ingon niana kaniadto. Adunay panahon nga mibati ko nga nahibalo na ko sa tanang istorya ug milambo lapas pa sa unsay matanyag sa basahon. Mihunong ko sa pagbasa sa basahon ug mipalit og daghang lain nga mahitungod sa doktrina ug mga dapit sa mga panghitabo sa Basahon ni Mormon. Bisan pa man, dihang ang akong pagkakuryoso sa intelektuwal nagkakunhod, nabatyagan nako nga ang akong pagpamatuod nagkahuyang ug nagkahanap. Ang akong pagpamatuod mibiya gikan sa akong kasingkasing ngadto sa akong ulo na lamang, ug nawala ko sa koneksiyon sa unsay akong nahibaloan sa kinahiladman sa akong kasingkasing.

Usa ka adlaw, nadunggan nako si Presidente Russell M. Nelson nga nagtudlo niini nga kamatuoran: “Kinahanglan kitang mobati, sa ‘labing kinahiladman’ sa atong kasingkasing [tan-awa sa Alma 13:27], nga ang Basahon ni Mormon mao gayod ang pulong sa Dios. Kinahanglan ato gayod kining mabati og maayo nga dili ta gusto nga mabuhi bisan usa ka adlaw nga wala kini.” Si Presidente Nelson dili ang unang propeta nga nagsulti kanato sa pagbasa sa Basahon ni Mormon matag adlaw. Apan kadto nga pakigpulong gamhanan kaayo ug direkta nga miistorya nako. Gusto ug gikinahanglan nako ang gahom nga gihulagway ni Presidente Nelson, ug gusto ko labaw pa sa bisan unsang butang nga ayohon ang akong gigutom kaayo nga pagpamatuod.

Dili nako mahunahuna ang pagpadayon og usa ka adlaw nga wala ang Basahon ni Mormon. Ang mga pulong niini nahimong akong mga pulong samtang nag-atubang ko og mga hagit o nagtabang sa uban sa ilang mga hagit. Naglista ko og mga rason sa pagbasa sa Basahon ni Mormon kada adlaw ug bag-ohay mipakigbahin sa akong labing maayo nga 50 ka rason ngadto sa akong asawa. Wala siya makatuo sa sinugdanan. Apan sa akong pagpakigbahin sa akong lista, sa dakong kadasig gidugangan pa niya og mga rason. Karon sobra na kami sa 70 ug nagpadayon pa.

Kini nga basahon tinuod gayod nga kahibulongan nga gasa. Kini usa ka giya ug usa ka pagpahayag sa gugma sa Dios, gihatag sa atong panahon sa pagbatok sa mga impluwensya sa kaaway. Pinaagi sa pagbasa ug kada adlaw nga pagbag-o sa atong pagpamatuod, mapatubo nato ang atong pagtuo sa paglihok sa mga pagtulun-an niini ug makakita kon giunsa ni Jesukristo pagluwas kanato ug niadtong anaa sa atong palibot. Ang usa ka tawo sa tinuod mapaduol ngadto sa Dios pinaagi sa pagbasa niini nga basahon ug pagsunod sa mga pagtulun-an niini kay sa magbasa og laing basahon (tan-awa sa pasiuna ngadto sa Basahon ni Mormon).

Bisan og hapit na mi mahuman sa pagtuon sa Basahon ni Mormon isip kabahin niini nga tuig sa Dali, Sunod Kanako, gidapit kami sa pagpadayon sa pagtuon sa mga kamatuoran niini sa tibuok namong kinabuhi. Ania ang 15 ka rason nga nagpadayon ko sa pagbasa sa Basahon ni Mormon matag adlaw. Tan-awa kon mouyon ka ba sa akong lista, o tingali, pagdiskobre og imong kaugalingong lista!

Nagtuon ako sa Basahon ni Mormon aron ako:

Makadawat og pagpamatuod ni Jesukristo (tan-awa sa Moroni 10:5–7; 2 Nephi 33:10–11).
Makagamit sa labing epektibo nga kapanguhaan aron mas maduol sa Dios ug ni Jesukristo (tan-awa sa pasiuna ngadto sa Basahon ni Mormon).
Makakat-on unsaon sa “pagpahisama sa tanan nga kasulatan ngari sa [akong kaugalingon]” (1 Nephi 19:23; tan-awa usab sa bersikulo 24).
Makadawat og kaisog sa pagbuntog ug paglahutay sa mga kalisdanan (tan-awa sa Mosiah 29:20).
Makadungog sa tingog sa Ginoo ug magkat-on kon unsaon Niya sa pagpakigsulti kanato sa tinagsa (tan-awa sa Jacob 7:5; Enos 1).
Makapalig-on sa akong pagtuo pinaagi sa paghinumdom kanunay sa “kaayo ug grasya” sa Dios (Moroni 8:3).
Makakita kon giunsa sa karaan nga mga propeta pagtan-aw sa atong panahon ug mogamit sa mga pahimangno nga ilang gihatag (tan-awa sa 1 Nephi 13:40).
Makasabot nga ang kaluoy ni Kristo moabot pinaagi sa paghinulsol ug usa ka malumo nga kasingkasing (tan-awa sa Alma 12:34).
Makabati nga ang karaan nga mga propeta nakigsulti direkta kanako kabahin sa akong mga hagit (tan-awa sa Mormon 8:35).
Itutok ang akong kinabuhi sa paghinumdom sa mga posibilidad sa maayong balita ni Kristo ug ang kasegurohan sa mga saad sa ebanghelyo (tan-awa sa Mosiah 2:41).
Makasinati og kalipay ug himaya nga dili masulti (tan-awa sa Alma 26:16).
Makapalambo sa abilidad sa pagpangayo ug pagpaabot og mga tubag sa mga pag-ampo (tan-awa sa 2 Nephi 4:35; Mosiah 4:21; 3 Nephi 27:28; Ether 3:2).
Makakaplag sa kagawasan nga “[ma]giyahan sa Espiritu” (1 Nephi 4:6; tan-awa usab sa Ether 2:6)
Makakaplag sa tinguha ug kusog sa pagwagtang sa makadaot nga mga pagbalda gikan sa akong kinabuhi (tan-awa sa 2 Nephi 1:13–14).
Makasabot nga ang mapaubsanon nga sumusunod ni Kristo makahimo kanato nga dili mahisalaag (tan-awa sa 2 Nephi 28:14).

Husto si Presidente Nelson! Ang Basahon ni Mormon adunay milagrosong gahom. Kon dili ka motuo kanako, sulayi ang imong kaugalingon nga pag-eksperimento sa mga pulong ni Presidente Nelson. Ang epekto niini ngari kanako hilabihan gayod ka hingpit nga nagpasalig ako sa pagbasa ug pagpamalandong sa Basahon ni Mormon kada adlaw sa tibuok nakong kinabuhi.

Kini karon usa na ka minahal nga kompanyon ug higala. Akong nakat-onan nga adunay daghan pa nga makat-onan sa Basahon ni Mormon kay sa unsay nahisulat sa pahina. Aduna akoy mga bersikulo nga moabot sa hunahuna nga direkta nga mga tubag sa unsay akong gikinahanglan, nianang higayona gayod, alang sa akong kaugalingon ug niadtong akong gimahal. Kini segurado gayod nga akong pagpamatuod nga ang paghupot niini nga pasalig sa paggahin og panahon kada adlaw alang sa Dios, pinaagi sa pagbasa niini nga basahon, nakatabang kanako sa pagsugod pag-usab sa akong pagpamatuod. Ako hingpit nga nasayod sa kamatuoran sa ebanghelyo, ug naghinam-hinam kaayo ako kabahin sa sunod nga mga butang nga akong makat-onan.