“Pagsuporta sa Bag-ong mga Miyembro sa Panaw sa Pagkadisipulo,” Liahona, Dis. 2024.
Pagsuporta sa Bag-ong mga Miyembro sa Panaw sa Pagkadisipulo
Ang bag-ong mga miyembro nagkinahanglan og mga higala sa Simbahan, mga oportunidad sa pagserbisyo, ug pag-alima pinaagi sa pulong sa Dios.
Ang usa ka linghod pa, nagtubo nga pagpamatuod nagkinahanglan og mapailobong pag-alima samtang ang mga kinabig mobalhin gikan sa kalibotan sa naandang mga higala ug mga kasinatian ngadto sa bag-ong pamaagi sa pagsimba ug sa kultural nga mga kombinsyon sa Ang Simbahan ni Jesukristo sa mga Santos sa Ulahing mga Adlaw.
Kining bag-o nga mga miyembro naggikan sa nagkadaiyang matang sa kinabuhi nga mihangop sa gipahiuli nga ebanghelyo ni Jesukristo. Nagkinahanglan sila og giya ug pakighigala aron mouswag sa Iyang kahayag. “Kita nga anaa sa lahi nga kahimtang sa taas nga panaw sa pagkadisipulo kinahanglang motunol sa mainiton natong pag-abi-abi sa bag-o natong mga higala, sabton sila sa unsay anaa kanila, ug tabangan, higugmaon, ug ilakip sila sa atong kinabuhi,” mitudlo si Elder Ulisses Soares sa Korum sa Napulog Duha ka Apostoles.
Ang pagtabang sa bag-ong mga miyembro nga malakip sa panon nagkinahanglan og pagmatngon, kahibalo sa sitwasyon, ug usahay kaugalingong pagpamalandong. “Nagtuo kong makahimo kita og mas maayo ug angay nga mohimo og mas maayo nga paghangop sa bag-ong mga higala sa Simbahan,” miingon si Elder Soares. “Dapiton ko kamo sa paghunahuna unsay atong mahimo aron mas mahangopon kita, madawaton, ug matinabangon kanila.”
“Anaa ako sa bag-ong kultura nga puno sa bag-ong bokabularyo ug mga tradisyon. Mibati ko nga walay labot sa grupo sa kadaghanang mga pag-istoryahanay ug naghunahuna kon unsa kaha ang akong bili.”
Si Amy Faragher, nga makita kauban sa iyang bana, ug sa ilang mga anak
Magpakita og Tinuoray nga Tinguha
Nasayod si Amy Faragher nga tinuod ang Simbahan dihang mitikang siya pasulod sa pultahan sa Simbahan. “Di nako ikalimod ang pagsaksi nga akong nadawat gikan sa Espiritu Santo,” miingon siya, “mao nga mipili kong magpabunyag.”
Mga usa ka tuig human nagpasakop sa Simbahan isip 19 anyos, nakadawat siya og calling nga moserbisyo sa Relief Society. Paglabay sa usa ka tuig gitawag siyang moserbisyo isip presidente sa Relief Society sa iyang young single adult nga ward. “Kadto nga mga kasinatian tinuod mipalambo sa akong kinabuhi,” miingon siya. “Masaligon kaayo ko.”
Ang pagserbisyo niini nga calling isip bag-o pa nga miyembro sa Simbahan dunay mga hagit. “Naa ko sa bag-ong kultura nga puno sa bag-ong bokabularyo ug mga tradisyon,” miingon siya. “Mibati ko nga walay labot sa grupo sa kadaghanang mga pag-istoryahanay ug naghunahuna kon unsa kaha ang akong bili isip usa ka miyembro.”
Bisan sa mga kalisod, ang mga miyembro midawat niya sa mainiton ug bukas nga mga bukton, sama sa usa ka sister nga mihangyo nga makighigala kaniya. “Ang ingon niadto nga pagpakig-uban nagpasayon sa hagit sa pagkat-on og bag-ong kinabuhi,” miingon si Sister Faragher. “Mibati ko nga kabahin sa usa ka komunidad. Wala ko hukmi sa mga miyembro sa ward sa wala pagsabot sa kultura o doktrina sa Simbahan.”
Lima ka tuig human mipasakop sa Simbahan, naminyo siya. Siya ug ang iyang bana nakapuyo sa lainlaing mga ward sulod sa katuigan. Usa niana nga Ward nga natambongan midawat sa iyang kasinatian isip usa ka kinabig, gani sa pagdapit kaniya nga mopakigbahin sa iyang sugilanon isip sakop sa usa ka panel sa usa ka kalihokan sa ward.
Sa ubang ward nga iyang natambongan, ganahan si Amy nga moapil apan wala mobati nga gilakip. Nagsugod siya sa pagduhaduha sa iyang dapit sa Simbahan. “May mga higayon nga, ang pag-inusara lisod sagubangon,” nahinumdom siya. “Padayon kong mitambong og miting sa sakramento ug sa pagbuhat sa akong calling sa nursery apan nag-antos og grabe nga kahingawa.”
Dihang ang iyang paningkamot nga makakita og suporta sa iyang ward atol sa mahagitong panahon wala magbunga, nangayo siya og tambag sa iyang presidente sa stake. Dihang nakig-istorya siya sa presidente sa stake sa usa ka okasyon, gitug-an niya ang mga kasubo sa iyang kasingkasing. Dali nga mitubag ang presidente sa stake ug mihangyo nga gusto pa siyang makadungog og dugang pa. Taas ang ilang panag-istoryahanay ug nagsabot og regular nga panagkita. “Ang presidente sa stake tinud-anay sa iyang tinguha ug naminaw sa tanan nga iyang gisulti,” nahinumdom siya. “Siya [presidente sa stake] ang unang nangutana kaniya sa lisod nga mga pangutana kon unsay nanghitabo.”
Ang iyang pagpakitambag sa presidente sa stake ug ang pagkadawat og ubang propesyonal nga tambag nakatabang niya nga mobati sa gugma sa Langitnong Amahan, usa ka importanteng lakang sa iyang pagkaayo. “Ang tanan kanako nausab. Nakaplagan nako ang akong dapit,” miingon siya. “Nakakat-on ko nga wala kinahanglana nga ikaulaw nako ang pagkakinabig.”
“Importante sa mga lider ang pag-ila ug pag-atiman sa bag-ong mga miyembro,” sugyot niya. “Mangutana og mga pangutana nga lisod ug hibaloan kon kumusta gayod sila. Ang usa ka calling o responsibilidad nga haom sa kapasidad sa bag-ong miyembro importante usab aron makaangkon og pagsalig ang bag-ong miyembro. Dili usa ka palas-anon ang pagserbisyo, sama sa gituohan sa ubang mga lider.”
Si Amy bag-o lang nakaangkon og master’s degree sa clinical mental health counseling, ug nagpahigayon siya og mga workshop sa stake mahitungod sa kahimsog sa pangisip ug mitabang sa programa sa Simbahan nga aron maulian gikan sa pagkaadik.
“Nagkinahanglan si Kristo nga kita mopas-an sa atong krus ug mosunod Kaniya. Gikinahanglan sa bag-ong mga miyembro, talikdan nila ang ilang mga higala. Kinahanglan nga biyaan nila ang ilang mga naandang kinaiya. Daghan nga butang ang ilang gipangtalikdan aron makaadto sila sa laing pahina, ug nagkinahanglan sila og daghan kaayong suporta—gani usahay bisan usa lang ka pahiyom ug usa ka lamano.”
Si Ka Bo Chan, gipakita nga kauban sa iyang asawa nga si Maila, ug ilang mga anak
Usa ka Oportunidad sa Pagserbisyo sa Uban
Si Ka Bo Chan natawo sa Hong Kong ug mibalhin sa Estados Unidos sa batan-on pa. Nahibaloan niya ang mahitungod sa Simbahan sa dihang tin-edyer pa siya gikan sa iyang kauban sa kwarto atol sa kolehiyo dihang nagtuon siya og musika sa Portland, Oregon. Ang mga kamatuoran sa ebanghelyo nakaapekto kaayo kaniya, ug nabunyagan siya ug nakumpirmahan. Wala madugay, miadto siya sa Estonia aron ipadayon ang iyang mga pagtuon.
Ang pagpangita og Simbahan sa Estonia naprobahan nga lisod. Sa hinayhinay, walay kontak sa mga miyembro ug sa limitado nga pagsabot sa pag-ampo ug sa mga kasulatan, nagkabugnaw ang iyang pagtuo.
Niining panahona, nahimamat niya si Maila, usa ka dalagita sa eskwelahan. “Ang tanan mahitungod kaniya masanagon,” miingon siya. Nagsugod siya og tupad kaniya, ug wala madugay nagkahigalaay.
Si Maila dili miyembro sa Simbahan ug dili pamilyar bahin sa relihiyon. Apan samtang nagpadayon ang ilang relasyon, miingon si Maila nga kon magminyo man siya, kinahanglan hangtod sa kahangtoran.
Atol sa iyang mga pagtuon, si Ka Bo mibati og espirituhanong panglimbasog nga makabalik sa simbahan ug gipangita ang branch sa iyang dapit. Ang unang kalihokan nga natambongan niya ug ni Maila mao ang Christmas party sa branch. Mibati si Maila nga ang mga kalihokan kiwaw ug mibilin kini og dili maayong impresyon, mao nga nisaad siya nga dili na gyod mobalik. Apan si Ka Bo padayon sa pagsimba.
Usa ka buntag sa tingpamulak, giingnan ni Maila si Ka Bo nga kinahanglan siyang magpili tali kaniya ug sa Simbahan. Sa walay pagpanuko, miingon si Ka Bo nga nagkinahanglan siya sa Simbahan ug miawhag kang Maila sa pagsimba uban niya.
Ang direktang tubag ni Ka Bo nakapahunahuna ni Maila kon duna bay nagkulang kaniya; nahumok ang iyang mga pagbati, ug miuyon nga motambong na usab. Pagkasunod Dominggo, diha dayon gitimbaya siya og usa ka pahiyom sa sister nga misyonaryo. Gibati niya ang pagkadani kaniya, sama nga dugay na silang managhigala. Ang iyang mga kabalaka nahanaw, ug nabunyagan siya ug nakompirmahan paglabay sa duha ka semana.
Si Ka Bo ug Maila wala makasabot sa ginagmayng kalainan sa kasulatan ug sa mga naandang buhaton sa ebanghelyo, ug wala silay kasinatian sa ilang bag-ong relihiyon nga pamilyar, bisan ang musika. Apan mosimba sila ug naningkamot sa pagtuon sa ebanghelyo.
Dihang nabalhin ang mga misyonaryo, wala kaayo makaila si Maila sa mga miyembro ug dili segurado sa bag-ong mga kahimtang, sama sa Relief Society, diin kausa naghunahuna siya basin naa siya sa sayop nga lugar. Wala madugay nadasig ang bishopric nga tawagon siya nga mopatukar sa piano sa Primary. “Ang pagpatukar sa piano naghatag nako og dapit ug katuyoan,” miingon siya.
Si Mari ug Jorma nakaamgo nga nausab ang ilang direksiyon sa kultura sa Finland ug tradisyon dihang mipasakop sila sa Simbahan. Bisan pa niana, giusab nila ang pamaagi sa ilang kinabuhi ug wala na gayod molingi.
Giamumahan sa Maayong Pulong sa Dios
Si Mari ug Joma Alakoski nasayod sa dalan sa pagkakabig. Sulod sa mga katuigan sukad nagpasakop sa Simbahan sa lumad nila nga Finland, nakaserbisyo sila sa daghang kapasidad, lakip sa calling ni Mari isip kaabag sa matron sa templo ug sa calling ni Joma nga unang magtatambag sa kapangulohan sa templo sa Helsinki Finland Temple.
Apan sama sa daghang mga kinabig, nanglimbasog sila sa ilang relihiyon. Dihang nahimamat nila ang mga misyonaryo, ang pagpamatuod wala moabot sa sayon nga paagi kang Mari sama nga kini sayon ra nga nahitabo sa iyang bana. Sa sinugdanan, dili komportable si Mari sa Basahon ni Mormon ug ipadaplin kini pinaagi sa paghikap niini og gamay gamit lang ang tumoy sa iyang tudlo.
Sa wala madugay, dihang nakakita siya nga midagayday ang mga luha sa aping sa iyang bana samtang nagbasa sa Basahon ni Mormon, naghunahuna siya, “kon kini nga basahon nakatandog kaayo kaniya, siguradong bililhon kini.”
Ang iyang pagdumili anam-anam nga nawala, ug gisugdan niya ang pagpangita sa kamatuoran. Sama sa iyang bana, mitulo usab ang iyang mga luha dihang nagbasa sa Basahon ni Mormon.
Si Mari ug Jorma nakaamgo nga nabaligtad ang ilang direksiyon sa kultura ug tradisyon dihang nagpasakop sila sa Simbahan. Bisan pa man diha dayon giusab nila ang ilang kinabuhi ug wala na gayod molingi. “Ang Simbahan nagdala og talagsaong katagbawan sa among kinabuhi. Hapit ko magtuo nga ang tanan dili katuhoan. Gidawat kami sa kongregasyon sa labihan ka mabinationg paagi,” miingon si Mari.
“Sa kalit daghan kaayong bag-o nga butang miabot sa among kinabuhi,” miingon siya. Ang mga Dominggo dili na alang sa mga lingawlingaw apan puno sa mga miting, nga buhaton tulo ka higayon sa tibuok Adlawng Igpahulay nianang panahona. “Nagkinahanglan kini sa pagsinina sa mga bata sa matag miting ug pag-tayming sa ilang pagpangaon ug pagpahulay.”
Matag adlaw sa semana nagkinahanglan og panahon alang sa mga kalihokan nga may kalabotan sa ebanghelyo ug mga miting, ma-home evening man, Relief Society, o Primary. “Inigka-Sabado, mangandam na mi og pagkaon ug mga sinina alang sa Dominggo,” miingon si Mari.
Ang mga Alakoski wala mohimo og engrande nga pahibalo dihang mipasakop sila sa Simbahan, apan ang ilang pamilya ug mga higala anam-anam nga nahibalo. “Dili tanan nakasabot sa among desisyon,” nahinumdom si Mari. “Pipila ka mga higala dili na makigsulti namo. Apan gamay ra kaayo kana kumpara sa tanang bililhon nga butang nga miabot sa among kinabuhi. Walay bisan unsa ug bisan kinsa ang makaimpluwensiya namo aron mobiya sa Simbahan. Ang akong papa, human nasayod mahitungod sa among pagkakabig, misulbad sa lalis dihang miingon siya, ‘Pasagdai sila sa pagbuhat kon unsay tan-aw nilang sakto. Dagko na sila. Nasayod sila unsay gusto nilang buhaton.’”
Paglabay sa panahon, ang magtiayon nagtinguha nga maselyo. Nagplano sila, nagsakripisyo, ug mibiyahe og duha ka adlaw sa bus ug usa ka gabii sa barko latas sa Sweden ug Germany. Sa kataposan nangabot sila sa Bern Switzerland Temple, ang bugtong templo sa Europe nianang panahona.
Ang mga Alakoski maoy mga ehemplo niadtong mga nakadawat og usa ka saksi sa ebanghelyo ug misungasong dayon, sama ni Nephi, nga wala masayod daan sa tanan apan misunod dayon sa Espiritu (tan-awa sa 1 Nephi 4:6). Nakakuha sila og mga ideya gikan sa kaubanang mga miyembro aron makat-on sa doktrina ug kon unsaon sa paggamit ang ebanghelyo sa ilang kinabuhi. Kon wala nila mahibaloi ang pipila ka butang, tun-an nila kini o mangayo og dugang nga direksiyon.
Tambag gikan sa Apostol
“Dugay na kitang gitudloan unsaon nato nga kita makatabang sa atong bag-ong mga higala nga mobati nga gihangop ug gihigugma sa Simbahan ni Jesukristo. Tulo ka butang ang ilang gikinahanglan aron magpabilin silang lig-on ug matinud-anon sa tibuok nilang kinabuhi,” mitudlo si Elder Soares, misulti pag-usab sa tambag nga gikan ni Presidente Gordon B. Hinckley (1910–2008).
“Una, nagkinahanglan sila og mga igsoon sa Simbahan nga mobati gayod kanila, tinuod ug mounong nga mga higala nga ilang kaadtoan kanunay, kakuyogan, ug motubag sa ilang mga pangutana,” padayon pa ni Elder Soares.
“Ikaduha, ang bag-ong mga higala nagkinahanglan og buluhaton [assignment]—oportunidad sa pagserbsiyo sa uban. … Proseso kini diin mas molig-on ang atong pagtuo. …
Ikatulo, ang bag-ong mga higala kinahanglang “maamumahan pinaagi sa maayo nga pulong sa Dios’ [Moroni 6:4]. Matabangan nato sila sa paghigugma ug sa pagsinati sa mga kasulatan samtang magbasa ug maghisgot kita sa mga pagtulun-an uban nila, maghatag og konteksto sa mga sugilanon ug magpasabot sa lisod nga mga pulong.”
Pagtabang sa bag-ong mga miyembro sa pagdala og espirituhanon ug temporal nga mga panalangin sa mga kinabig ug usab sa mga miyembro nang daan sukad sa pagkatawo. Molig-on kini sa Simbahan diha sa daghang paagi. “Ang bag-o natong mga higala nagdala og hinatag sa Dios nga mga talento, kahinam, ug kaayohan,” si Elder Soares mitudlo. “Ang ilang kahinam sa ebanghelyo makatakod, nga kini nagtabang nga ang kaugalingon natong mga pagpamatuod malagsik. Nagdala usab sila og lab-as nga panglantaw sa atong panabot sa kinabuhi ug sa ebanghelyo.”