Eperera
Ua faaho‘i faahou mai Iesu Mesia i Ta’na Ekalesia i te mau mahana hopea nei.
« E ua hapono atura vau i te îraa no ta’u nei evanelia na roto i te rima o ta’u nei tavini o Iosepha » (PH&PF 35:17).
A faananea i te mau mana‘o i horo‘ahia i ô nei ma te tuu atoa mai i to oe iho mana‘o. I te mau hepetoma atoa, a faanaho i te mau rave‘a no te (1) faaite i te haapiiraa tumu, (2) tauturu i te mau tamarii ia taa maitai i te reira, e (3) tauturu ia ratou ia faaohipa i te reira i roto i to ratou oraraa. A ui ia oe iho, « Eaha ta te mau tamarii e rave atu no te haapii mai, e nahea e nehenehe ai ia’u ia tauturu ia ratou ia farii i te Varua ? »
Hepetoma 1: I muri a‘e i te poheraa o Iesu Mesia e Ta’na mau aposetolo, ua mo‘e te mau parau mau o te evanelia.
Faaite i te haapiiraa tumu (tauaparau): A ani i te mau tamarii ia faaite mai i te i‘oa o te tahi mau mea ta Iesu Mesia i haapii mai i To’na faaearaa mai i te fenua nei. A faaite i te hoê hoho‘a no te Mesia e faatoro‘a ra i te mau aposetolo. A faataa’tu e, i muri a‘e i te poheraa e te ti‘a-faahou-raa o te Mesia, ua haapii Ta’na mau aposetolo i te evanelia, e rave rahi râ mau taata tei ore i faaroo ia ratou ; e i muri iho, ua pohe te mau aposetolo, e aita faahou ïa te tahi mau parau mau faafaa rahi i haapii-faahou-hia. A papa‘i i ni‘a i te tapura ereere i te parau « I muri a‘e i te poheraa o Iesu Mesia e Ta’na mau aposetolo, ua mo‘e te mau parau mau o te evanelia », e ia faahiti te mau tamarii i te reira na muri ia oe.
E tauturu te papa‘iraa i te hoho‘a i te mau tamarii ia faaite i to ratou haro‘aro‘araa i te mau parau tumu o te evanelia. E mea au roa na te mau tamarii ia hi‘o i ta ratou iho mau hoho‘a ia faaohipahia ei mau tauturu faahi‘oraa.
Tauturu ia taa maitai (papa‘i i te hoho‘a): A papa‘i i ni‘a i te tapura ereere i te tahi o te mau parau tumu o te evanelia tei mo‘e e aore râ tei tauihia i te taime no te Taivaraa (ei hi‘oraa, te bapetizoraa, te autahu‘araa, te mau hiero, te mau peropheta ora, e te oro‘a mo‘a). A vahi i te mau tamarii ei pŭpŭ na‘ina‘i. A horo‘a i te pŭpŭ tata‘itahi i te hoê api parau tei papa‘ihia te hoê o te mau parau tumu o te evanelia, e a ani i te mau tamarii ia papa‘i i te hoê hoho‘a o te faaite ra i taua parau tumu ra. A ani manihini i te hoê tamarii i roto i te pŭpŭ tata‘itahi ia tuu i ta ratou hoho‘a i ni‘a i te tapura ereere. A faataa’tu e, i to Iesu faaearaa mai i ni‘a i te fenua nei, ua haapii Oia i te taatoaraa o teie mau parau mau faufaa rahi o te evanelia. A ani i te mau tamarii ia tapiri i to ratou na mata. A tatara i te mau hoho‘a atoa e a huna i te reira. I muri iho a ani i te mau tamarii ia araara i to ratou na mata. A faataa’tu e, ua mo‘e te mau parau mau o te evanelia i muri a‘e i te poheraa o Iesu Mesia e Ta’na mau aposetolo. A parau i te mau tamarii e, ua faaho‘i-faahou-hia mai te evanelia na roto mai ia Iosepha Semita. A faaho‘i faahou i te mau hoho‘a, e a faaite papû e, tei roto i Te Ekalesia a Iesu Mesia i te Feia Mo‘a i te Mau Mahana Hopea Nei te mau parau mau atoa tei mo‘e i tera ra tau. (A faaherehere i te mau hoho‘a no te faaohipa i te hepetoma 4.)
Hepetoma 2: Ua fâ mai te Metua i te Ao ra e o Iesu Mesia ia Iosepha Semita.
Faaite i te haapiiraa tumu (hi‘o i te hoê hoho‘a): A tapo‘i i te hoho‘a no te Orama Matamua e te tahi mau api parau tapupu. A ani manihi i te mau tamarii ia tatara i te mau api parau tapupu, te hoê i muri i te tahi. A ani i te mau tamarii ia afa‘i marû noa i to ratou rima i ni‘a ia ite ana‘e ratou eaha ra taua hoho‘a ra. Ia oti te mau api parau tapupu i te tatara-pauroa-hia, a ani i te mau tamarii ia faati‘a mai ia oe eaha te tupu ra i roto i te hoho‘a.
Tauturu ia taa maitai (tai‘o i te papa‘iraa mo‘a): A faaite i te mau tamarii i hea i roto i te papa‘iraa mo‘a e nehenehe ai tatou e tai‘o i te faati‘araa a Iosepha Semita no to’na iteraa i roto i te uru raau mo‘a (Iosepha Semita —Aamu 1:14–19). A tai‘o e aore râ a ani i te tahi mau tamarii ia tai‘o i te tahi mau irava e faaite nei no te ohipa i tupu. No te mau tamarii rii, e nehenehe oe e ani ia ratou ia rave i te tahi mau ohipa ohie, mai te ti‘araa e te faateiteiraa i to ratou rima mai te tumu raau ra te huru e aore râ e tufeneraa i to ratou rima mai te huru ra e te pure ra ratou. A ani i te mau tamarii eaha to ratou mana‘o ahani e, ua nehenehe ia ratou ia ite mata roa i te Metua i te Ao ra e ia Iesu Mesia, to Raua fâraa e te paraparauraa ia Iosepha Semita. A tauaparau i te faufaa rahi o teie ohipa.
Tauturu ia faaohipa (faaite i te iteraa papû): A ani i te mau tamarii ia himene mai i te himene « Te uru raau mo‘a » (Liahona, eperera 2001, 62). I muri iho, a faaite i to oe iteraa papû no te fâraa o te Metua i te Ao ra e o Iesu Mesia ia Iosepha Semita. A ani manihini i te tahi mau tamarii ia faaite mai i to ratou iteraa papû no te Orama Matamua.
Hepetoma 3: Ua faaho‘ihia mai te mana o te autahu‘araa e te tahi mau ve‘a no te ra‘i mai.
Faaite i te haapiiraa tumu (himene i te hoê himene): A ani i te mau tamarii e nahea ratou e faaara ai i te hoê mea faufaa rahi roa. A faataa’tu e, i mutaa iho ra, e patehia te pû no te faaararaa i te hoê mea faufaa rahi. A ani i te mau tamarii ia tapiri i to ratou na mata ma te feruri e, te faaroo ra ratou i te mau pû, e ha‘uti ai te taata faata‘i piana i te himene « La Prêtrise rétablie » (CPE, 60). A ani i te mau tamarii ia himene mai i te himene e ia ite eaha te poro‘i faufaa rahi ta teie himene e faaara ra. A ani i te tahi mau tamarii ia faataa mai eaha te auraa o te himene.
Tauturu ia taa maitai (faaroo i te tahi manihini): A faaite i te mau tamarii i te mau hoho‘a no te faaho‘i-faahou-raa o te Autahu‘araa a Aarona e no te faaho‘i-faahou-raa o te Autahu‘araa a Melehizedeka. A ani manihini i te hoê tamaroa e mau nei i te Autahu‘araa a Aarona ia haere mai e faati‘a i te aamu no te faaho‘i-faahou-raa o te Autahu‘araa a Aarona (a hi‘o PH&PF 13; Iosepha Semita —Aamu 1:68–72). I muri iho a ani manihini atoa i te hoê tane e mau nei i te Autahu‘araa a Melehizedeka ia haere mai no te faati‘a i te mau tamarii i te aamu no te faaho‘i-faahou-raa mai o te Autahu‘araa a Melehizedeka (a hi‘o PH&PF 27:12–13; Iosepha Semita —Aamu 1:72). A faaite faahou i te mau hoho‘a, i reira a ani i te mau tamarii ia parau mai i te i‘oa o te mau taata i ni‘a i te mau hoho‘a.
E hopoi mai te mau manihini i te tauiraa e te anaanatae i roto i te Paraimere.
Tauturu ia faaohipa (faaite i te iteraa papû): A ani i te mau piha tata‘itahi ia papa‘i i ni‘a i hoê api parau i te hoê mea ta tatou e fana‘o nei maoti te faaho‘i-faahou-raa-hia mai te Autahu‘araa a Aarona (ei hi‘oraa, te bapetizoraa e te oro‘a [pane e te pape]) na reira atoa te hoê mea ta tatou e fana‘o nei maoti te faaho‘i-faahou--raa-hia mai te Autahu‘araa a Melehizedeka (ei hi‘oraa, te haamauraa e te haamaitairaa i te feia ma‘i). A ani i te tahi mau tamarii ia faaite mai i te mea ta ratou i papa‘i. A faaite i to oe mauruuru no te mau haamaitairaa no ô mai i te Metua i te Ao ra te faaho‘i-faahou-raa-hia mai o te autahu‘araa.
Hepetoma 4: Ua iriti Iosepha Semita i te Buka a Moromona e ua faaho‘i faahou mai i te mau parau mau o te evanelia.
Faaite i te haapiiraa tumu e tauturu ia taa maitai (tauaparau): Na mua a‘e te Paraimere e haamata ai, a papa‘i « Ua iriti Iosepha Semita i te Buka a Moromona e ua faaho‘i faahou mai i te mau parau mau o te evanelia » i ni‘a i te hoê api parau, e a tapupu haere i te reira ei tuhaa piriapu (puzzle). I muri i te mau tuhaa tata‘itahi, a papa‘i i te i‘oa, o te hoê taata anei e aore râ o te hoê tao‘a e tu‘ati i te iritiraa o te Buka a Moromona (ei hi‘oraa, Iosepha Semita, Urima e Tumima, melahi Moroni, te mau papaa parau auro, puai o te Atua, e Oliver Cowdery). A horo‘a i te piha tata‘itahi i te hoê tuhaa o te piriapu e a ani atu ia ratou ia aparau nahea te tao‘a e aore râ te taata e tu‘ati ai i te iritiraa o te Buka a Moromona. A ani manihini i te piha tata‘itahi ia haere mai i mua, ia faaite mai ratou i te mea ta ratou i aparau, e ia tapiri i ta ratou tuhaa api parau i ni‘a i te tapura ereere. Ia oti ana‘e te mau tuhaa o te piriapu i te tapiri-pauroa-hia, a tai‘o amui i te pereoda.
Te vai nei te pirapu i ni‘a i te sharingtime.lds.org
Tauturu ia taa maitai (faaroo i te manihini): A ani manihini i te hoê taata e mau nei i te autahu‘araa ia haere mai e faaite i te huru o Iosepha Semita e te aamu no to’na iritiraa i te Buka a Moromona. A horo‘a ia’na i te mau hoho‘a ta te mau tamarii i papa‘i i te hepetoma 1 e a ani ia’na ia faaite mai nahea teie mau parau tumu o te evanelia i te faaho‘i-faahou-raa-hia mai e Iosepha Semita. E nehenehe ta’na e ahu noa mai i te hoê ahu ohie, mai te hoê taamu arapoa ereere (nœud papillon). A ani manihini ia’na ia tatara i te taamu arapoa e ia horo‘a i to’na iteraa papû no Iosepha Semita.
Tauturu ia faaohipa (faaite i te mana‘o): A ani i te mau tamarii ia ti‘a mai i ni‘a mai te peu e nehenehe ia ratou ia parau mai i te hoê parau mau o te evanelia tei mo‘e na mua a‘e e o tei faaho‘i-faahou-hia mai na roto mai ia Iosepha Semita. A ani i te tahi mau tamarii ia faaite mai i to ratou mana‘o. A faaite i to oe iteraa papû no te evanelia tei faaho‘i-faahou-hia mai e no te Buka a Moromona.