Titema
Ua ite au e, e ho‘i faahou mai Iesu Mesia
« Ua ite hoi au e, te ora ra te faaora ia’u, e ia tae i te hopea ra e ti‘a mai ai oia i ni‘a i te fenua nei » (Ioba 19:25).
A faananea i te mau mana‘o i horo‘ahia i ô nei ma te tuu atoa mai i to oe iho mana‘o. I te mau hepetoma atoa, a faanaho i te mau rave‘a no te (1) faaite i te haapiiraa tumu, (2) tauturu i te mau tamarii ia taa maitai i te reira, e (3) tauturu ia ratou ia faaohipa i te reira i roto i to ratou oraraa. A ui ia oe iho, « Eaha ta te mau tamarii e rave atu no te haapii mai, e nahea e nehenehe ai ia’u ia tauturu ia ratou ia farii i te Varua ? »
Hepetoma 1: Ua tohu te mau peropheta e, e haere mai Iesu Mesia i ni‘a i te fenua nei.
Tauturu ia taa maitai (tai‘o i te papa‘iraa mo‘a): A pia i te hoho‘a no Isaia, no Nephi, no te arii Beniamina, no Abinadi, no Alama e no Samuela te ati Lamana i roto i te Buka hoho‘a o te evanelia e te pute hoho‘a o te buka Paraimere 4. A tapŭpŭ i te mau tamarii e a horo‘a i te pŭpŭ tata‘itahi i te hoê o te mau papa‘iraa i muri nei: (1) Isaia 7:14; 9:6; (2) 1 Nephi 11:14–15, 20–21; (3) Mosia 3:5–8; (4) Mosia 15:1; (5) Alama 7:10–12; e (6) Helamana 14:1–3. A ani i te mau tamarii ia imi mai o vai te peropheta e parau ra e no vai ta’na tohuraa. A ani i te pŭpŭ tata‘itahi ia faaite mai i te hoho‘a o te peropheta e ia parau i te tahi atu mau tamarii o vai oia e eaha te mea ta’na i parau. (No te mau tamarii rii, a faaahu e ono tamarii i te tahi mau ahu ohie noa no te faahoho‘a i na ono peropheta. A parau poto noa no ni‘a i na peropheta tata‘itahi e te mea ta ratou tata‘itahi i parau no ni‘a i te fanauraa e te misioni a Iesu Mesia.) A faataa’tu e, ua tohu a‘ena teie mau peropheta e, e haere mai Iesu Mesia i ni‘a i te fenua nei. Himene i te himene Sing « Samuel Tells of the Baby Jesus » (CS, 36). A faaite papû e, ua haere mai Iesu Mesia i ni‘a i te fenua nei mai ta te mau peropheta i tohu.
Hepetoma 2: E ho‘i faahou mai Iesu Mesia i te fenua nei.
Faaite i te haapiiraa tumu: A pia i te hoê hoho‘a no te Tae-piti-raa mai (BHE, no.66) A faahaamana‘o i te mau tamarii e, ua haere matamua Iesu Mesia i te fenua nei mai te hoê aiû i Betelehema. A faataa’tu e, te haapii mai nei tatou i roto i te mau papa‘iraa mo‘a e, e ho‘i faahou mai Oia i ni‘a i te fenua nei.
Tauturu ia taa maitai (ha‘uti i te pereraa tareta faatu‘ati): A hamani e piti pereraa no te mau papa‘iraa i muri nei, te hoê faahororaa papa‘iraa mo‘a to’na tareta: Mataio 16:27; Mataio 24:30, 36, 42; Te Ohipa 1:9–11; PH&PF 36:8; PH&PF 45:57–59; PH&PF 88:95–98. A tuu i te mau tareta i ni‘a i te tapura ereere, te hoho‘a i raro. A ani i te mau tamarii, te hoê i muri mai i te tahi, ia ma‘iti mai e piti tareta. A huri na tareta no te hi‘o e, ua tu‘ati anei. Mai te mea e, aita raua e tu‘ati, a faahuri faahou ia raua. Ia tu‘ati raua, a vaiiho ia itehia te papa‘iraa e a ani i te mau tamarii ia hi‘o mai i taua papa‘iraa ra no te faaite mai i te mea e haapiihia ra no ni‘a i te tae-piti-raa mai o te Mesia. A tapiti faahou ia tuati pauroa’tu te mau tareta.
Hepetoma 3: E faaineine au no te ora-faahou-raa i piha‘i iho i te Metua i te Ao ra e ia Iesu Mesia.
Faaite i te haapiiraa tumu (faahiti i te hoê piri): A ani manihini e piti e aore râ e toru tamarii ia ha‘uti taata ora i te faaineineraa ia haere e taoto, te faaineineraa ia haere i te purereraa, e aore râ te faaineineraa ia reva maoro na te ara. A ani i te tahi atu mau tamarii ia imi eaha ta ratou e rave ra. A aparau e te mau tamarii eaha te mea e tupu mai mai te mea e aita tatou i faaineine no te rave i teie mau mea. A faataa’tu e, te hoê mea faufaa rahi e ti‘a ia tatou ia faaineine atu, o te ora-faahou-raa ïa i piha‘i iho i te Metua i te Ao ra e ia Iesu Mesia.
A ara i te mau ohiparaa, mai te ha‘utiraa taata ora, e nehenehe ïa e faaohipahia no te faatupu i te anaanatae e no te tauturu atoa i te mau tamarii ia faatumu i to ratou ara-maitai-raa i ni‘a i te tumu parau o te haapiiraa. No te mau tamarii e mata‘ita‘i ra, e tupu mai ïa to ratou hinaaro e amui atu i muri iho.
Tauturu ia taa maitai (himene i te himene): A himene i te irava toru no te himene « E tamarii au na te Atua ra » (Te mau himene, 185), e a ani atu i te mau tamarii ia faaroo e nahea tatou ia faaineine no te ora faahou i piha‘i iho i te Metua i te Ao ra. A ani manihini i te mau tamarii ia ti‘a mai i ni‘a e ia himene faahou mai i te pereoda « Ia haapa‘o vau i Ta’na parau ». A faataa’tu e, e faahaamana‘o te tahi mau himene a te Paraimere ia tatou i te tahi mau mea ta tatou e nehenehe e rave no te faaineine ia ora faahou i piha‘i iho i te Metua i te Ao ra e ia Iesu Mesia (ei hi‘oraa, « Je veux suivre le plan de Dieu » [CPE, 86–87], « Pour trouver la paix » [CPE, 68–69], « Je serai gentil envers chacun » [CPE, 83], and « Le jour de mon baptême » [CPE, 53]). A ani i te taata faata‘i piana ia ha‘uti mai i te tahi mau nota no te hoê o teie mau himene, ei reira, a ani i te mau tamarii ia imi mai i te himene. A ani manihini i te mau tamarii ia himene i te himene e ia ti‘a mai ratou i ni‘a ia himene ratou no ni‘a i te hoê rave‘a e faaineine ia ratou ia ora i piha‘i iho i te Metua i te Ao ra. A na reira faahou no te tahi atu mau himene.
Tauturu ia faaohipa (papa‘i i te hoho‘a): A ani i te mau tamarii ia feruri i te mau rave‘a e nehenehe ratou e faaineine ia ora i piha‘i iho i te Metua i te Ao ra e ia Iesu Mesia. A horo‘a i te tamarii tata‘itahi i te hoê api parau, e a ani manihini ia ratou ia papa‘i faaati mai i te hoho‘a o to ratou rima. I muri iho, a ani ia ratou ia papa‘i e aore râ ia papa‘i hoho‘a i ni‘a i to ratou manimani rima tata‘itahi i te hoê mea o ta ratou e nehenehe e rave no te faaineine ia ratou. A ani i te mau tamarii ia ma‘iti i te hoê o taua mau mea ra no te faaohipa i te roaraa o te hepetoma. A parau ia ratou e, e ani oe ia ratou i te Sabati i muri nei ia faaite mai i te ohipa i ravehia.
Hepetoma 4: E iteraa papû to’u e, e tamarii au na te Atua
Faaite i te haapiiraa tumu (faahiti i te hoê piri): I ni‘a i te tapura ereere, a papa‘i, « E ______________ to’u ». A parau i te mau tamarii ia faaroo mai i te mau faaiteraa i muri nei, e ia tufene i te rima e ia ti‘a mai i ni‘a, ia mana‘o ratou e ua itehia ia ratou te parau mo‘e.
-
E faatae mai te reira i roto ia tatou i te mana‘o maitai e te oaoa e te tamahanahanaraa.
-
Na te Varua Maitai e horo‘a mai i te reira ia tatou.
-
E tauturu mai te reira ia tatou ia hinaaro ia rave i te maitai.
-
E nehenehe tatou e faaite i te reira ia vetahi ê ia horo‘a ana‘e tatou i te mau a‘oraa i roto i te Paraimere, i roto i te pureraa pô utuafare, e i roto i te pureraa haapaeraa maa.
A ui: « Eaha teie mea faahiahia mau ? » A faaî i te area uouo e te parau iteraa papû, e a parau atu i te mau tamarii e, e nehenehe ta ratou e farii i te iteraa papû e, e tamarii ratou na te Atua ra.
Papa‘i i te hoê parau tumu o te evanelia, na te reira e tauturu i te mau tamarii ia haamana‘o mai i te reira.
Tauturu ia taa maitai (himene i te hoê himene): A ani manihini i te mau tamarii ia himene mai « E tamarii au na te Atua ra » (Te mau himene,185–86), e a ani atoa ia ratou ia hi‘o eaha te mea e tupu i roto ia ratou a himene ai ratou. A ani i te tahi mau tamarii ia faaite mai i to ratou mana‘o. A faataa’tu e, te mana‘o maitai tei tae mai i to ratou aau, no ô mai ïa i te Varua Mairai o te parau nei ia ratou e, e tamarii mau ratou na te Atua ra. A faataa’tu e, te iteraa e, e parau mau te reira, o te reira ïa te auraa ia farii i te hoê iteraa papû. A faataa’tu e, e rave rahi rave‘a no te ite e, e tamarii tatou na te Atua. A ui: « Nahea outou e ite e, e tamarii outou na te Atua ? »
Tauturu ia faaohipa (faaroo i te iteraa papû): A ui i te mau tamarii e, « No te aha e mea faufaa ia farii tatou i te iteraa papû e, e tamarii tatou na te Atua ? Nahea te fariiraa i te hoê iteraa papû e tauturu ai ia tatou ia rave i te mau ma‘itiraa maitai ? A faaite i to oe iteraa papû e a ani manihini i te tahi mau tamarii e te taata paari ia faaite mai i to ratou iho iteraa papû e, e tamarii tatou na te Atua.