Mati
O Iesu Mesia to tatou Faaora.
« A faaroo mai na outou i teie nei mau parau. Inaha, o Iesu Mesia vau, te Faaora no te ao nei » (PH&PF 43:34).
A faananea i te mau mana‘o i horo‘ahia i ô nei ma te tuu atoa mai i to oe iho mana‘o. I te mau hepetoma atoa, a faanaho i te mau rave‘a no te (1) faaite i te haapiiraa tumu, (2) tauturu i te mau tamarii ia taa maitai i te reira, e (3) tauturu ia ratou ia faaohipa i te reira i roto i to ratou oraraa. A ui ia oe iho, « Eaha ta te mau tamarii e rave atu no te haapii mai, e nahea e nehenehe ai ia’u ia tauturu ia ratou ia farii i te Varua ? »
Hepetoma 1: Ua haapii Iesua Mesia i te evanelia e ua faaite mai i te hoê hi‘oraa no tatou.
Faaite i te haapiiraa tumu (himene i te hoê himene): A himene amui i te himene « C’est amusant » (CPE, 129), a himene faahou e faahou â i te reira ma te ani i te tahi mau tamarii ia faaite mai i te ohipa e rave. A faataa’tu e, ia pee ana‘e tatou i te mau ohipa a te tahi taata, te pee ra tatou i to’na hi‘oraa. A ui e, o vai tei faaite i te hi‘oraa maitai roa a‘e no tatou no te pee atu (Iesu Mesia). A ani manihini i te mau tamarii ia parau amui, « ua faaite mai Iesua Mesia i te hoê hi‘oraa no tatou ».
Tauturu ia taa maitai (tai‘o i te papa‘iraa mo‘a): A pia i te mau hoho‘a no te mau ohipa tei tupu i muri nei: te bapetizoraa o Iesu Mesia, te Mesia e te mau tamarii, te Mesia e pure ra, te Mesia e haapii ra. A tai‘o amui i te hoê o te mau papa‘iraa mo‘a i muri nei, e a ani i te mau tamarii ia faataa mai i te mea ta te Mesia e haapii mai i roto i taua papa‘iraa ra: Mareto 16:15; Ioane 13:34–35; 3 Nephi 11:37; 3 Nephi 18:19. A faatoro mărû noa i te hoho‘a tata‘itahi e a ani manihini i te mau tamarii ia ti‘a mai i ni‘a ia faatoro ana‘e oe i te hoho‘a e faaite maitai nei i te Mesia e rave ra i te mea Ta’na i haapii ia tatou i roto i te papa‘iraa ta outou i tai‘o. A na reira faahou e te toe‘a o te mau papa‘iraa mo‘a.
E vai tura a‘e te mau tamarii ia titau-ana‘e-hia ratou ia rave i te hoê tuhaa o te haapiiraa. I roto i teie ohiparaa, e mea au roa ia ti‘a e ia parahi te mau tamarii ma te tura, na te reira e tauturu ia tape‘a mai i to ratou ara maitai.
Tauturu ia faaohipa (papa‘i i te hoê hoho‘a): A horo‘a i te tamarii tata‘itahi i te hoê api parau, e a ani manihini ia ratou ia papa‘i i te hoê hoho‘a no ratou iho e pee ra i te hi‘oraa o te Mesia. Ei hi‘oraa, e papa‘i te hoê tamarii i te hoho‘a no’na e bapetizohia ra, e haapii ra i te hoê hoa i te evanelia, e aore râ e tauturu ra i te hoê taata. A ani manihini i te tahi mau tamarii ia faaite i ta ratou mau hoho‘a papa‘i i te tahi atu mau tamarii, e a faaitoito ia ratou ia faaite i ta ratou hoho‘a papa‘i i to ratou utuafare.
Hepetoma 2: Aua‘e te Taraehara a te Mesia, e nehenehe ai ia‘u e tatarahapa e e ora faahou i piha‘i iho i te Atua.
Faaite i te haapiiraa tumu (faaî i te mau area uouo): Na mua a‘e te Paraimere e haamata ai, a papa‘i i ni‘a i te tapura ereere, « Aua‘e te _______ a te Mesia, e nehenehe ai ia’u e _______ e e ora faahou i piha‘i iho i te _______ ». A papa‘i i te mau ta‘o Taraehara, tatarahapa, e Atua i ni‘a e toru api parau taa ê e a tapiri i te reira i raro a‘e e toru parahiraa i roto i te piha. A ani manihini i te mau tamarii ia imi i na api parau, e ia tapiri i te reira i te vahi tano i ni‘a i te tapura ereere. A tai‘o amui i te irava.
Tauturu ia taa maitai (tai‘o i te papa‘iraa mo‘a e pahono i te uiraa): A pia i te mau hoho‘a o te Mesia i te ô no Gesetemane e te Faasatauroraa i ni‘a i te tapura ereere. A tapo‘i i te mau hoho‘a i te tahi mau api parau tapupu. I ni‘a i te tahi api parau, a papa‘i i te hoê uiraa no ni‘a i te aamu o te hoho‘a e te hoê papa‘iraa mo‘a mai te Mataio 26–27 e aore râ mai te Luka 22–23 i reira te pahonoraa e itehia ai. (Ei hi‘oraa: O vai te i‘oa o te vahi i reira Iesu i te haereraa e pure ? Mataio 26:36.) A tapŭpŭ i te mau tamarii, e a ani i te pŭpŭ tata‘itahi ia tuatapapa i te mau papa‘iraa mo‘a e ia imi i te pahonoraa o te uiraa. A titau i te mau pŭpŭ ia faaite mai i te pahonoraa i ta ratou uiraa e a iriti i te mau api parau tapupu e tapo‘i ra i te mau hoho‘a.
No te faatano i te ohiparaa no te tai‘oraa i te papa‘iraa mo‘a no te mau tamarii rii, a ani ia ratou ia faaroo mai a tai‘o ai oe e e ti‘a mai ratou ia faaroo ana‘e ratou i te hoê parau taa ê e aore râ te hoê pereoda.
Tauturu ia faaohipa (hi‘o i te hoê haapiiraa tao‘a): A tauaparau e te mau tamarii i te auraa o te mau parau Taraehara e tatarahapa, e a faataa nahea te Taraehara e nehenehe ai e haamaitai ia tatou (a hi‘o Mau Maite i te Faaroo : Hoê Faahororaa no te Evanelia [2004], 14–20, 132–35). A faaite i te mau tamarii i te hoê tao‘a horo‘a. A ani i te hoê tamarii ia tamata i te horo‘a i te tao‘a horo‘a i te tahi tamarii, e a ani i te piti o te tamarii ia pato‘i i te reira. A faataa’tu e, ia ore ana‘e tatou e farii i te hoê tao‘a horo‘a, eita atoa ïa tatou e nehenehe e fana‘o i te haamaitairaa o taua tao‘a horo‘a ra. A ani i te mau tamarii ia faaroo mai eaha te ti‘a ia ratou ia rave no te farii i te tao‘a horo‘a no te Taraehara a tai‘o amui ai outou i Te Parau Haapiiraa e te mau Parau Fafau 19:16.
Hepetoma 3: No te mea ua ti‘afaahou mai Iesu, e na reira atoa vau.
Faaite i te haapiiraa tumu (faaroo i te hoê aamu): A faaohipa i te faaiteraa i te api 123 i roto i te buka haapiiraa no te piha haapa‘oraa tamarii rii (a hi‘o i te mau arata‘iraa i te api 121) no te faati‘a i te aamu no te Ti‘a-faahou-raa (a hi‘o Ioane 19:41–42; 20:1, 11–18). A faataa’tu e, i to Iesu Mesia ti‘a-faahou-raa mai, ua tahoê-faahou-hia To’na tino e To’na varua ; na te reira i iriti i te ti‘a-faahou-raa no te mau taata atoa. A ani i te mau tamarii ia faahiti mai i te parau, « No te mea ua ti‘afaahou mai Iesu, e na reira atoa vau ».
Tauturu ia taa maitai (faaite i te aehuehuraa): I ni‘a i te tapura ereere, a tapura i te mau parau e faahoho‘a nei i te huru o te mau pĭpĭ i te poheraa o Iesu (mai te mauiui, te pe‘ape‘a, te oto, e hepohepo rahi). A ani i te mau tamarii ia horo‘a mai i te pato‘iraa o te reira mau parau (mai te popou,te oaoa, te ti‘aturi, e te faaroo), e a papa‘i i te reira i ni‘a i te tapura ereere. A faataa’tu e, teie mau aehuehuraa o te mea ia ta te mau pĭpĭ i farii i te ti‘a-faahou-raa o Iesu. Tauaparau i te tahi o te mau haamaitairaa e tae mai no te iteraa e, e ti‘afaahou mai tatou (a hi‘o Isaia 25:8; Alama 22:14).
Tauturu ia faaohipa (faaite i te aehuehuraa): A papa‘i i ni‘a i te tapura ereere, « ua mauruuru vau no to Iesu ti‘a-faahou-raa no te mea… » A ani manihini i te hoê melo o te paroisa tei faaruru i te pohe o tei herehia ia haere mai i te Paraimere no te faaite poto mai i te tumu no to’na mauruuru rahi no te Ti‘a-faahou-raa. A ui i te mau tamarii e ua matau anei ratou i te hoê taata tei pohe, e a ani manihini ia ratou ia tapiri i to ratou mata e ia feruri i taua taata ra. A ani manihini i te tahi mau tamarii ia ti‘a mai e ia faaoti i te parau i ni‘a i te tapura ereere e ia faaite mai eaha te auraa no te Ti‘a-faahou-raa no ratou.
Hepetoma 4: O Iesu Mesia to tatou Faaora.
Faaite i te haapiiraa tumu (tauaparau i te ta‘o « Faaora »): A faaite i te tahi mau tao‘a e aore râ mau hoho‘a o te faahoho‘a ra i te mau taata o te nehenehe e faaora ia tatou (mai te hoê taote, te hoê muto‘i, e aore râ te hoê tia‘i hapuraa miti), e ia aparau nahea ratou e nehenehe ai e faaora ia tatou. A faaite i te hoê hoho‘a no Iesu, e a faataa’tu e, o Oia ana‘e te mau nei i te mana no te faaora ia tatou mai roto mai i te mau faahopearaa mure ore o te pohe e te hara. A papa‘i i ni‘a i te tapura ereere, « O Iesu Mesia to tatou Faaora », e a tai‘o i te reira e te mau tamarii ma te faananea i te parau « Faaora ».
Tauturu ia taa maitai e ia faaohipa (faaroo i te aamu no te papa‘iraa mo‘a): A faati‘a i te mau tamarii i te tahi o te mau aamu no te papa‘iraa mo‘a no ni‘a i te mau taata tei faaorahia mai roto mai i te hara e te Faaora. (ei hi‘oraa, Alama tamaiti [a hi‘o Alama 36:6–24], Enosa [a hi‘o Enosa 1:1–8], Zeezeroma [a hi‘o Alama 15:3-12], te metua tane o Lamoni [a hi‘o Alma 22:1–26], e aore râ te taata tei hopoihia ia Iesu ra [a hi‘o Luka 5:17–26]). A faataa’tu e, na roto i te Taraehara a Iesu Mesia, e nehenehe tatou paatoa e faaorahia mai te hara mai. A faaite papû e, o Iesu Mesia to tatou Faaora, e a ani manihini i te tahi mau tamarii ia faaite mai i to ratou iteraa papû no ni‘a Ia’na.