Tiunu
E pee au i te opuaraa a te Metua i te Ao ra na roto i te bapetizoraa e te haamauraa
« A haere mai outou ia’u, e bapetizohia i to’u i‘oa, ia matara ta outou mau hara, e ia faaîhia i te Varua Maitai » (3 Nephi 30:2).
A faananea i te mau mana‘o i horo‘ahia i ô nei ma te tuu atoa mai i to oe iho mana‘o. I te mau hepetoma atoa, a faanaho i te mau rave‘a no te (1) faaite i te haapiiraa tumu, (2) tauturu i te mau tamarii ia taa maitai i te reira, e (3) tauturu ia ratou ia faaohipa i te reira i roto i to ratou oraraa. A ui ia oe iho, « Eaha ta te mau tamarii e rave atu no te haapii mai, e nahea e nehenehe ai ia’u ia tauturu ia ratou ia farii i te Varua ? »
Hepetoma 1: E pee au ia Iesu Mesia na roto i te bapetizoraa e te haamauraa e te haapa‘oraa i ta’u mau fafauraa no te bapetizoraa.
Na mua a‘e te Paraimere e haamata ai, a tapu e piti hoho‘a taahiraa avae rahi maitai, a faaohipa e piti û ê. A papa‘i i ni‘a i te hoê « te bapetizoraa e te haamauraa » e i ni‘a i te tahi « te haapa‘oraa i ta’u mau fafauraa no te bapetizoraa ». A faaineine atoa i te tahi faahou mau hoho‘a taahiraa avae na‘ina‘i i roto tera na û e piti. A papa‘i i te hoê o te mau mea i muri nei i ni‘a i te hoho‘a taahiraa avae tata‘itahi no te hoê û: 8 matahiti, tatarahapa, uiuiraa a te episekopo, utuhiraa i raro i te pape, mana autahu‘araa, fafauraa, ahu uouo, Varua Maitai. I ni‘a i te mau hoho‘a taahiraa avae na‘ina‘i no te piti o te û, a papa‘i i te mau faatureraa no roto mai i « Ta’u mau parau tumu no te evanelia ». A tapiri haere i te mau hoho‘a taahiraa avae na‘ina‘i na roto i te piha.
Faaite i te haapiiraa tumu: A papa‘i i ni‘a i te tapura ereere i te parau « E pee au ia Iesu Mesia… » A tapiri i na hoho‘a taahiraa avae rahi i ni‘a i te tapura ereere, te hoê i muri mai i te tahi, e a tai‘o i te reira. A faataa’tu e, e mea faufaa roa teie mau taahiraa avae i roto i te opuaraa a te Metua i te Ao ra. Mai te mea e ti‘a, a tauturu i te mau tamarii ia maramarama eaha te hoê fafauraa no te bapetizoraa.
Te vai nei te mau hoho‘a taahiraa avae i ni‘a i te sharingtime.lds.org
Tauturu ia taa maitai e ia faaohipa (ha‘uti i te pereraa tareta faatu‘ati): A ani i te hoê tamarii ia imi i te hoê o te mau hoho‘a taahiraa avae o te û matamua. A ani ia’na ia tai‘o i te parau e aore râ te pereoda i ni‘a i te hoho‘a taahiraa avae e a tuu i te reira i ni‘a i te tapura ereere i raro a‘e i te hoho‘a taahiraa avae rahi. A ani i te mau tamarii eaha te tu‘atiraa i rotopu i te bapetizoraa e te haamauraa. A na reira faahou ia pau roa’tu te mau hoho‘a taahiraa avae no te û matamua.
A ani i te hoê tamarii ia imi i te hoê hoho‘a taahiraa avae no te piti o te û. A ani ia’na ia tai‘o i te parau e aore râ te pereoda i ni‘a i te hoho‘a taahiraa avae e a tuu i te reira i ni‘a i te tapura ereere i raro a‘e i te hoho‘a taahiraa avae rahi e tu‘ati ra. A aparau e nahea te oraraa i te mau parau tumu no te evanelia tei tapurahia i ni‘a i te hoho‘a taahiraa avae e tauturu ai i te mau tamarii ia haapa‘o i ta ratou mau fafauraa no te bapetizoraa. A na reira faahou no te tahi atu hoho‘a taahiraa avae.
Hepetoma 2: Ia ora ana‘e au i roto i te parau-ti‘a, e tauturu mai te Varua Maitai ia’u ia ma‘iti i te maitai.
Faaite i te haapiiraa tumu (himene i te hoê himene): A ani i te mau tamarii eaha te tao‘a horo‘a tei fariihia i muri mai i te bapetizoraa. A himene i te piti o te irava no te himene « Le Saint-Esprit » (CPE, 56). Na mua oe e himene ai, a ani i te mau tamarii ia faaroo i te pahonoraa i te uiraa i muri nei: Eaha te mea ta te Varua Maitai e tauturu ia tatou ia rave ? A tauturu i te mau tamarii ia maramarama e, te reo iti ha‘iha‘i e te mărû o te Varua Maitai ïa, e te tauturu nei Oia ia tatou ia ma‘iti i te maitai.
Tauturu ia taa maitai (hi‘o i te hoê haapiiraa tao‘a): A faataa’tu e, e ti‘a ia tatou ia haapii ia faaroo i te muhumuhu a te Varua Maitai na roto i te vai-ara-raa i te mau mana‘o i roto i to tatou feruriraa e te mea i to tatou nei aau (a hi‘o PH&PF 8:2). A ani i te hoê tamarii ia tuu i te hoê toata i roto i te hoê mohina hi‘o e a ueue atu ai. A vaiho i te mau tamarii ia faaroo papû maitai i te ta‘iraa. A ani i te mau tamarii e ano‘i atu i te tahi taipu repo, taipu raiti, taipu one e aore râ te tahi vavai i roto i te mohina. I muri mai i te taipu tata‘itahi, a ani i te hoê tamarii ia ueue i te mohina, e a vaiho i te mau tamarii ia parau e nahea teie mea e taui ai te ta‘iraa. A tamau noa te ano‘iraa e tae noa ua mo‘e roa te ta‘iraa o te toata i te tari‘a o te mau tamarii. A faahoho‘a te reira i te haafifiraa no te faaroo i te Varua Maitai ia î ana‘e to tatou oraraa i te arearearaa e te hara. A manii haapau i te mohina e a faaite faahou i te ta‘iraa papû o te toata. A faaite papû e, e tauturu te haapa‘oraa i te mau faaueraa e te tarahaparaa ia tatou ia faaroo atu i te muhumuhu o te Varua Maitai.
E tauturu te faaauraa i te hoê haapiiraa tumu e te hoê faahi‘oraa i te mau tamarii ia haamana‘o i te haapiiraa tei haapiihia mai.
Tauturu ia faaohipa (faaite i te mana‘o): A tapŭpŭ i te mau tamarii e a ani i te pŭpŭ tata‘itahi ia faatere na roto i to ratou na rima i te hoê tao‘a a himene noa ai oe e aore râ a faahiti noa ai oe i te mau irava o te himene « Le Saint-Esprit ». A tape‘a haere i te himene e a ani i te tamarii e mau nei i te tao‘a ia parau i te hoê mea ta ratou e nehenehe e rave no te faaroo papû a‘e i te Varua Maitai. A faaoti na roto i te himene-amui-raa i te himene « Le Saint-Esprit ».
Hepetoma 3: Ia amu ana‘e au i te oro‘a mo‘a, te faaapî ra ïa vau i ta’u mau fafauraa no te bapetizoraa.
Faaite i te haapiiraa tumu (hi‘o i te hoho‘a): A faaite i te hoê hoho‘a no te bapetizoraa e te hoê hoho‘a no te oro‘a e a ani te tu‘atiraa o na hoho‘a e piti. A faahaamana‘o i te mau tamarii e, e rave tatou i te mau fafauraa e te Metua i te Ao ra ia bapetizo-ana‘e-hia tatou, e a faataa’tu e, ia rave ana‘e tatou i te oro‘a mo‘a, te faaapî ra tatou i ta tatou mau fafauraa no te bapetizoraa.
Tauturu ia taa maitai (faaroo e tauaparau): A ani manihini i te mau tamarii ia faatoro i te rima i ni‘a ia ratou iho, e aore râ, i ni‘a i te ra‘i no te faaite o vai te rave ra i te fafauraa a tai‘o ai oe i te faahitiraa i muri nei no ni‘a i te pure oro‘a (a hi‘o PH&PF 20:77): « rave i te i‘oa o to Tamaiti » ; « haamana‘o â ia’na » ; « haapa‘o maitai i ta’na mau faaue » ; « vai noa to’na Varua i roto ia ratou ». A aparau i te auraa o te pereoda tata‘itahi.
Tauturu ia faaohipa (rave i te faaiteraa): A ani i te mau tamarii ia feruri i te hoê ohipa no te faahaamana‘o ia ratou i te mau tuhaa atoa o te fafauraa ta tatou e faaroo nei i roto i te pure oro‘a, mai te tuuraa i to ratou na rima i ni‘a i te mafatu (rave i te i‘oa o to Tamaiti) ; te faatororaa i to ratou upoo (haamana‘o â ia’na ) ; te hohoraraa i to ratou na rima mai te hoê buka (haapa‘o maitai i ta’na mau faaue) ; e te tauahiraa ia ratou iho (vai noa to’na Varua i roto ia ratou). A faahiti faahou â na maha fafauraa e te mau faaiteraa e rave rahi taime. A faaitoito i te mau tamarii ia feruri faahou i teie mau faaiteraa ia faaroo ratou i te mau pure no te oro‘a.
Hepetoma 4: Ia tatarahapa vau, e faaorehia ta’u hapa.
Faaite i te haapiiraa tumu (tatara i te parau): A ani i te mau tamarii ia faataa i te auraa no te mau parau tatarahapa e faaoreraa hapa. A horo‘a i te piha tata‘itahi i te hoê vehi rata tei roto te mau parau i muri nei, tera parau to’na api parau: Ia, tatarahapa, vau, e faaorehia, ta’u, hapa. A ani manihini i te piha tata‘itahi ia apapa afaro mai i te mau parau. Ia oti, a ani i te mau tamarii ia tai‘o amui i te pereota.
Tauturu ia taa maitai (ha‘uti i te aamu i roto i te papa‘iraa mo‘a): A faati‘a i te aamu no te tamaiti tei haere i te fenua roa (a hi‘o Luka 15:11–24) ma te faaohipa i te tahi mau faaiteraa (ei hi‘oraa, faaite e piti manimani rima no te faahoho‘a i na tamaiti e piti, tape‘a i te opu no te faaite i te poi‘a). A ani manihini i te mau tamarii ia faaroo i te aamu e ma te maniania ore ia rave i te mau faaiteraa na muri ia oe. A faaite i te hoê hoho‘a e faaite ra i te tamaiti tei haere i te fenua roa e a ani eaha te tu‘atiraa i rotopu i te metua tane e to tatou Metua i te Ao ra. A faataa’tu e, mai teie metua tane, ua here to tatou Metua i te Ao ra ia tatou e ua hinaaro ia ho‘i tatou Ia’na ra ; e faaore Oia i ta tatou atoa mau hapa mai te peu e tatarahapa tatou.
Tauturu ia faaohipa (tai‘o i te hoê papa‘iraa mo‘a): A ani i te hoê tamarii ia tai‘o mai Mosia 26:30. A ani i te mau tamarii ia faaroo e hia taime e nehenehe ai i te hoê taata e roaa te faaoreraa hapa. A ani manihini ia ratou ia feruri ma te maniania ore i te mea ta ratou e rave araua‘e ia rave ratou i te tahi mea hape.