Novema
E ti‘a ia tatou ia haamauruuru i te Atua no te mau mea atoa
« E ua faaue atu hoi oia ia… haamaitai hoi i te Fatu i to ratou Atua i te mau mahana atoa » (Mosia 18:23).
A faananea i te mau mana‘o i horo‘ahia i ô nei ma te tuu atoa mai i to oe iho mana‘o. I te mau hepetoma atoa, a faanaho i te mau rave‘a no te (1) faaite i te haapiiraa tumu, (2) tauturu i te mau tamarii ia taa maitai i te reira, e (3) tauturu ia ratou ia faaohipa i te reira i roto i to ratou oraraa. A ui ia oe iho, « Eaha ta te mau tamarii e rave atu no te haapii mai, e nahea e nehenehe ai ia’u ia tauturu ia ratou ia farii i te Varua ? »
Hepetoma 1: Ua mauruuru vau no to’u nei tino, e ua ite au e hiero te reira.
Faaite i te haapiiraa tumu (hi‘o i te hoho‘a e tai‘o i te hoê papa‘iraa mo‘a): A pia i te hoê hoho‘a no te hoê tamarii e te hoê hoho‘a no te hoê hiero. A tai‘o amui e a tai‘o puai 1 Korinetia 3:16. A ui: « Eaha ta tatou e haapii nei no ni‘a i to tatou tino i roto i teie papa‘iraa mo‘a ? » A papa‘i « E hiero to’u tino » i ni‘a i te tapura ereere.
Tauturu ia taa maitai (tai‘o i te papa‘iraa mo‘a): A aparau no te tahi mau rave‘a o te faaite nei ia tatou i te Metua i te Ao ra e, ua mauruuru tatou no to tatou nei tino ; ei hi‘oraa, te aupuru nei tatou e te tamâ atoa nei tatou i te reira. A faataa’tu e, ua a‘o mai te mau peropheta ia tatou ia aupuru i to tatou nei tino na roto i te haapaeraa i te pupuhiraa avaava e te faaohiparaa i te ava taero e te mau raau taero, e aore râ na roto i te tatauraa i te tino. A tapŭpŭ i te mau tamarii, e a ui i te pŭpŭ tata‘itahi ia tai‘o e ia aparau mai i te hoê e aore râ hau atu o te mau papa‘iraa mo‘a i muri nei: Te Parau Haapiiraa e te mau Parau Fafau 88:124; 89:7, 8, 9, 10–11, 12, 16–17. A ani manihini i te pŭpŭ tata‘itahi ia faaite mai eaha ta ratou i haapii mai mai roto mai i teie mau papa‘iraa mo‘a no ni‘a e nahea ratou ia aupuru i to ratou nei tino.
Tauturu ia faaohipa (faataa i te hoê opuaraa): A ani i te mau tamarii ia papa‘i e aore râ ia papa‘i hoho‘a i te hoê mea o ta ratou i rave i te roaraa o te hepetoma no te aupuru i to ratou nei tino.
Hepetoma 2: Ua mauruuru vau no te mau haamaitairaa pae tino.
Faaite i te haapiiraa tumu: A papa‘i i ni‘a i te tapura ereere, « Ua mauruuru vau no te mau haamaitairaa pae tino ». A ani i te mau tamarii ia faahiti mai i teie parau. A faataa’tu e, te mau haamaitairaa pae tino, e haamaitairaa ïa ta tatou e nehenehe e ite, e tape‘a, e faaroo, e tamata, e aore râ e hau‘a.
Tauturu ia taa maitai (faahiti i te hoê piri): A faaite i te tahi mau tao‘a e aore râ hoho‘a e faaite ra i te mau haamaitairaa pae tino (ei hi‘oraa, te tino, te fare, te maa, te pape, te ahu, te ea, te mahana, te ava‘e, te mau feti‘a, te ao, te mau animara, te mau raau, te utuafare, te mau hoa, te mau ha‘uti, te mua buka e te fare haapiiraa). A horo‘a i te mau faaiteraa o te faahoho‘a nei i te hoê o te mau haamaitairaa, e a ani i te mau tamarii ia feruri eaha râ te haamaitairaa ta oe e faahoho‘a ra. No te mau tamarii paari a‘e, a papa‘i i te haamaitairaa tata‘itahi i ni‘a i te hoê api parau e a tuu i te mau api parau i roto i te hoê faarii. A ani manihini i te hoê tamarii ia ma‘iti hoê e ia parau i te faaiteraa i te tahi atu mau tamarii. Ia ite mai te mau tamarii i te hoê haamaitairaa, a papa‘i i te reira i ni‘a i te tapura ereere, e a ui i te hoê tamarii ia faaite mai no te aha oia i mauruuru no te reira.
Tauturu ia faaohipa (faaite i te mana‘o): A ani i te mau tamarii ia feruri i te mea ta ratou e nehenehe e rave no te faaite i to ratou mauruuru no te hoê o te mau haamaitairaa tei aparauhia. A ani i te tahi mau tamarii ia faaite mai i to ratou mana‘o.
E haapii maitai mai te mau tamarii ia faaohipa-ana‘e-hia te mau rave‘a huru rau no te haapiiraa. A ma‘iti i te mau ohiparaa e te mau rave‘a haapiiraa o te faaamui mai te mau tamarii atoa.
Hepetoma 3: Ua mauruuru vau no te mau haamaitairaa pae varua.
Faaite i te haapiiraa tumu e tauturu ia taa maitai (tai‘o i te papa‘iraa mo‘a): A faaineine i te hoê tao‘a horo‘a ma te tuu atu i roto te hoho‘a o te Faaora e te papa‘iraa mo‘a i muri nei: Moroni 10:8–17. A papa‘i i ni‘a i te tapura ereere, « Ua mauruuru vau no te mau haamaitairaa pae varua ». A faataa’tu e, e rave rahi haamaitairaa pae varua ta te Fatu e horo‘a nei no ratou ; te horo‘a nei Oia i teie mau haamaitairaa ia tatou na roto i te mana o te Varua Maitai. A ani i te hoê tamarii ia tatara i te tao‘a horo‘a e ia faaite atu i te mea i roto. A ani i te mau tamarii ia imi mai i te papa‘iraa e te mau haamaitairaa pae varua ta te Fatu e horo‘a nei ia tatou, e a papa‘i i te reira i ni‘a i te tapura ereere. A aparau i te tahi o teie mau haamaitairaa, e a faataa’tu e, e ti‘a ia tatou ia faaohipa i te reira no te tauturu ia vetahi ê.
Hepetoma 4: E ti‘a ia tatou ia haamauruuru i te Metua i te Ao ra no ta tatou mau haamaitairaa atoa.
Faaite i te haapiiraa tumu: A faaite i te mau tamarii i te hoê e aore râ e piti tao‘a ta te hoê taata i horo‘a na oe. A faataa’tu e, e mea faufaa teie mau tao‘a horo‘a no oe e ua parau oe « mauruuru roa » no te reira. A ani i te mau tamarii ia faaite mai i te tahi atu rave‘a e nehenehe tatou e faaite i to tatou mauruuru rahi no te mau horo‘araa ta tatou i farii. A ani i te mau tamarii o vai ta tatou e haamauruuru no to tatou mau haamaitairaa atoa. A aparau no te mau tumu e ti‘a ia tatou ia haamauruuru i te Metua i te Ao ra no to tatou mau haamaitairaa atoa.
Te aniraa i te mau tamarii ia faaite i roto i te mau pŭpŭ na‘ina‘i e horo‘a i te mau tamarii e rave rahi rave‘a ia amui mai. E nehenehe ta te mau orometua haapii pŭpŭ e haapuai i te amuiraa mai o te mau tamarii e e tape‘a maite i te faaturaraa.
Tauturu ia taa maitai (hamani i te tapura): I roto e pae pute taa ê, a tuu i te hoê api parau, te hoê penitara, e te hoê o te mau tao‘a i muri nei: te hoê hoho‘a no te hoê fare pureraa a te Ekalesia, te hoê ahu, te mau papa‘iraa mo‘a, te hoê hoho‘a no te hoê utuafare, e te hoê hoho‘a no te Faaora. A tapŭpŭ i te mau tamarii, e a horo‘a i te pŭpŭ tata‘itahi i te hoê pute. A ani i te pŭpŭ tata‘itahi ia hi‘o mai i te tao‘a i roto i ta ratou pute e ia papa‘i ratou i ni‘a i te api parau i te hoê rave‘a e ti‘a ia ratou ia faaite i to ratou mauruuru rahi no te reira. I muri iho, a ani ia ratou ia faaho‘i i te tao‘a i roto i te pute, na reira atoa te api parau e te penitara e ia horo‘a i te pute i te tahi atu pŭpŭ. A ani i te pŭpŭ tata‘itahi ia faatere te pute tata‘itahi na roto i te mau pŭpŭ atoa, e i muri iho, a ani manihini i te pŭpŭ tata‘itahi ia faaite mai i te mea i papa‘ihia i ni‘a i te tapura i roto i ta ratou pute.
Tauturu ia faaohipa (faaite i te mana‘o): A ani i te tahi mau tamarii ia faaite mai i te mea ta ratou i apo mai na roto mai i teie ohiparaa e eaha te mea ta ratou e rave atu no te faaohipa i te reira i roto i to ratou nei oraraa.