May Bili pa ba Ako?

Oo, ikaw adunay mahinungdanong bili (tan-awa sa Doktrina ug mga Pakigsaad 18:10). Ikaw adunay walay katapusan ug mahangturon nga bili isip usa ka anak sa Dios, ug ang abuso dili makakunhod o makakuha sa imong bili.

Kon ikaw naabuso, mahimo nga mibati ka nga dili takus sa atensyon o gugma gikan sa uban, lakip sa Langitnong Amahan. Mahimo usab nga maghunahuna ka nga ang pang-abuso nakahimo kanimo sa pagwagtang sa imong pagkatakus sa pagdawat sa mga panalangin sa ebanghelyo. Bisan pa niana, ang imong bili wala matino pinaagi sa bisan unsa ang nahitabo kanimo.

Si Sister Joy D. Jones, Kinatibuk-ang Presidente sa Primary, mipasabut nga ang “espirituhanong bili nagpasabut sa paghatag og bili sa atong kaugalingon sama sa paghatag og bili sa Langitnong Amahan kanato, dili sama sa paghatag og bili kanato sa kalibutan. Ang atong bili natino na sa wala pa kita moanhi niini nga yuta” (“Bili nga dili Masukod,” Liahona, Nob. 2017, 14).

Ang pang-abuso makamugna og kalibug sa imong kasingkasing ug hunahuna, naghimo kanimo sa pagpangutana sa imong bili o katakus. Bisan pa niana, ang pang-abuso dili makapakunhod o makakuha sa imong bili tungod kay ang imong bili dili gayud mausab.

Pagsabut sa Imong mga Hunahuna ug mga Pagbati

Mahimo nga ikaw adunay pipila sa mosunod nga mga hunahuna o mga pagbati:

Dili ako takus.
Napugngan ko unta kini.
Ako nakasala.
Ang Dios wala na mahigugma kanako.
Walay na gyuy mahigugma kanako.
Ako nadaot na nga dili na gyud mamaayo.
Ang Pag-ula sa Manluluwas magamit ngadto sa uban, apan dil kanako.
Ako kinahanglan nga mahingpit.

Kini nga mga pagbati sagad, apan kini mga bakak nga gikan sa kaaway. Ang gugma sa Langitnong Amahan ug sa Manluluwas alang kanimo dili gayud mokunhod. Ikaw takus sa gugma. Hunahunaa ang mga pulong ni Apostol Pablo:

“Kay masaligon ako nga walay kamatayon, o kinabuhi, o mga manolunda, o mga punoan, o mga butang karon, o mga butang umaabut, o mga gahum,

“O kahabugon, o giladmon, o bisan unsa diha sa tibuok kabuhatan, nga arang makapahimulag kanato gikan sa gugma sa Dios, sa gugma nga anaa kang Kristo Jesus nga atong Ginoo” (Mga Taga-Roma 8:38–39).

Nahibalo sa tinubdan sa tanang kamatuoran, ang atong Amahan sa Langit, makatabang kanimo sa pagwagtang sa imong mga kahadlok o ngil-ad nga mga hunahuna.

Ang mga kasulatan nagtabang kanato sa pagsabut kon unsaon nato pag-ila og inspirasyon ug direksyon gikan sa atong Langitnong Amahan: “Busa, ang tanan nga mga butang nga maayo nagagikan sa Dios; ug kana nga mga dautan nagagikan sa yawa; kay ang yawa kaaway ngadto sa Dios” (Moroni 7:12).

Mahimo nga nanginahanglan ka og tabang gikan sa uban sa pagsulbad sa imong dili maayo nga mga hunahuna ug mga pagbati. Kon mas dali ka nga makakuha og tabang, mas sayon kini sa pagpalambo og gahum ibabaw niining sayop nga mga tinuohan. Dili pa gayud ulahi sa pagkuha og tabang ug suporta nga imong gikinahanglan sa pagsulbad ug sa pagwagtang niini nga mga tinuohan.

Pagsabut sa Imong Katakus

Ang imong katakus dili matino sa bisan unsa ang mahitabo kanimo, ug wala ka manginahanglan sa paghinulsol alang sa unsay nabuhat sa usa ka tawo diha kanimo.

Alang niadto kinsa naabuso sa sekswal nga paagi, mahimo kang mobati nga ikaw sa moral nga paagi hugaw ug nga imong nalapas ang balaod sa kaputli. “Ang mga biktima sa sekswal nga pang-abuso walay sala. … Kon ikaw biktima sa pang-abuso, hibaloi nga ikaw inosente ug nga ang Dios nahigugma kanimo” (Alang sa Kalig-on sa mga Kabatan-onan [booklet, 2011], 36). Ang imong hiyas dili makuha gikan kanimo pinaagi sa mga lihok sa uban.

Ang Imong Katakus Dili Mokunhod

Uban sa labing importanting mga kamatuoran nga atong mahibaloan ug masabtan niini nga kinabuhi mao ang kinsa ang atong Langitnong Amahan; kinsa ang Iyang Anak, nga si Jesukristo, kinsa kita isip mga anak sa Dios; ug unsa ang atong relasyon ngadto sa Amahan ug sa Anak (tan-awa sa Juan 15:1–5; Mga Taga–Roma 8:16–17; Doktrina ug mga Pakigsaad 50:41).

Si Elder D. Todd Christofferson mipahayag, “Ang gugma sa Dios walay sukod ug kini mohangtud” (“Magpabilin Kamo sa Akong Gugma,” Liahona, Nob. 2016, 48). Ang Dios gusto kanato nga mobati og “gugma,kalipay, kalinaw, pailub, pagkamapuanguron, pagkamaayo, hugot nga pagtuo, kaaghop, [ug] pagpugong sa kaugalingon” (Mga Taga–Galacia 5:22–23). Samtang ikaw nakasabut nga ang Langitnong Amahan nahigugma kanimo, magsugod ka sa pagsabut ug sa pagtuo sa imong mahinungdanong bili.

Walay mahitabo niini nga kinabuhi, lakip ang mga lihok sa uban, nga adunay gahum sa pagpakunhod sa imong bili.

Si President Thomas S. Monson miingon: “Ang inyong Langitnong Amahan nahigugma kaninyo—matag usa kaninyo. Kana nga gugma dili gayud mausab. … Anaa ra kini. Anaa kini alang kaninyo kon kamo naguol o malipayon, nawad-an sa paglaum o malaumon. Ang gugma sa Dios anaa alang kaninyo dili igsapayan kon mobati man kamo nga angayan o dili sa gugma. Anaa ra kini kanunay” (“Wala Kita Mag-inusara,” Liahona,Nob. 2013, 123–24).

Mga Kapanguhaan sa Simbahan

“Ang Dako ug Katingalahan nga Gugma,” Anthony D. Perkins, Liahona, Nob. 2006
“Satan—The Great Deceiver,” Marion G. Romney, Ensign, Hulyo 1971
“Knowing Who You Are—and Who You Have Always Been,” Sheri Dew, BYU Women’s Conference
“Our Identity and Our Destiny,” Tad R. Callister (debosyonal sa Brigham Young University devotional, Ago. 14, 2012)