Abuso
Makasalig ba Ako sa Akong Kaugalingon o sa Akong Kaugalingong Paghukom?

“Makasalig ba Ako sa Akong Kaugalingon o sa Akong Kaugalingong Paghukom?” Tabang alang sa mga Biktima (2018)

“Makasalig ba Ako sa Akong Kaugalingon o sa Akong Kaugalingong Paghukom?” Tabang alang sa mga Biktima

Makasalig ba ako sa akong kaugalingon o sa akong kaugalingon nga paghukom?

Oo, ikaw makakat-on sa pagsalig sa imong kaugalingon. Kini sagad alang sa mga biktima sa pang-abuso nga mawad-an og pagsalig sa ilang kaugalingon nga paghukom o sa pagkakulang og kompyansa kon maghimo og mga desisyon. Ikaw makaangkon sa kompyansa nga imong gikinahanglan sa pagsalig sa imong kaugalingon. Miingon si Elder Dieter F. Uchtdorf, “Adunay solusyon bisan ang tumang kawalay paglaum, ug kasagmuyo nga lagmit inyong gibati. Kini nga paglaum makita diha sa makapausab nga gahum sa ebanghelyo ni Jesukristo ug sa makatubos nga gahum sa pag-ayo sa sakit sa atong kalag” (“Motuo, Mohigugma, Mobuhat,” Liahona, Nob. 2018, 47).

Ngano nga malisud ang pagsalig sa inyong paghimo og desisyon

Ang mga naghimo sa sala kasagaran mohimo o mosulti og mga butang nga dili mga tinuod o nga walay kaangayan aron sa pagpasakit sa mga biktima ug sa pagpabuhat kanila sa unsay ilang gusto. Kini gitawag og pagmaniobra o pagdatong. Samtang ang naghimo sa sala naninguha sa pag-angkon sa imong pagsalig, may kalagmitan nga motuo o mosalig ka kaniya. Mahimong mahinumduman nimo ug motuo nga ikaw makahimo pa unta og daghan sa paghunong sa pang-abuso ug sa pagpanalipod sa imong kaugalingon, nga makadugang og mga pagbati sa pagduda sa kaugalingon. Kini mahimong mogiya kanimo sa pagduda sa imong kaugalingong paghukom ug abilidad sa paghimo og mga pagpili.

Mahimong dili ka mosalig sa imong abilidad sa paghimo og mga desisyon mahitungod sa yanong inadlaw nga mga buluhaton. Kini nga walay pagsalig mahimong molugway ngadto sa mas dagko nga mga desisyon sama sa mga pagpili mahitungod sa mga relasyon o pang-empleyo. Kini makawala og kadasig, ug mahimo kang mobati nga walay paglaum mahitungod kon makahimo ka pa ba sa pagsalig sa imong kaugalingon pag-usab.

Pagtukod og Balik sa Kompyansa sa Imong Kaugalingon

Makasugod ka sa pagtukod og pagsalig diha sa imong kaugalingon pinaagi sa paghimo og gagmay ug yanong mga lakang. Diha sa mga kasulatan atong mabasa, “Pinaagi sa gagmay ug yano nga mga butang ang mga dagko nga butang ipahinabo” (Alma 37:6).

Makasugod ka sa pag-angkon og balik sa imong abilidad sa pagsalig sa imong kaugalingon pinaagi sa paghimo og yano nga mga desisyon. Gamita, sama, pananglit, ang pagpili og pagkaon nga paliton sa restawran. Makahimo ka niana nga desisyon ug mosalig nga kana usa ka madawat nga desisyon. Barugi ang imong desisyon ug pahinumdumi ang imong kaugalingon nga walay husto o sayop nga tubag, bisan kon kini wala mahimo ingon sa imong gipaabut.

Ilha ang imong mga paningkamot sa paghimo og desisyon ug sa pagkamay tulubagon. Samtang ikaw nagpalambo sa abilidad sa paghimo og gagmay nga mga desisyon, makahimo usab ikaw og makahuluganong mga desisyon. Panid-i ang imong mga pagbati. Samtang imong buhaton, mahimo kang mas may pagsalig.

Mahimo kang maghunahuna mahitungod sa imong mga desisyon ug ang posibilidad nga mga resulta. Ang pagbaton og suporta sa usa ka sinaligan nga higala makatabang kanimo niini nga proseso. Siya makatabang kanimo sa pagtino hain nga desisyon ang dili kaayo importante ug hain ang mas importante. Ang usa ka higala makahatag usab og panghimatuod nga kini OK sa paghimo og desisyon nga imong gusto nga himoon ug nga ikaw makasalig sa imong kaugalingon.

Samtang ikaw nagtukod og pagsalig sa imong kaugalingon, makat-unan mo ang mosunod:

  • Makasalig ka sa imong mga panghunahuna.

  • Makadawat ka sa imong kaugalingon nga pagpadayag ug inspirasyon.

  • Ang imong mga pagpaniid mahimong tukma ug tinuod.

  • Ang imong mga hunahuna ug mga pagtuo importante.

  • Ang imong mga hunahuna ug mga pagbati mas importante kay sa uban.

Ang pag-angkon og kompyansa sa imong kaugalingon mokabat og panahon. Kana normal. Si Elder Jeffrey R. Holland mitudlo, “Busa kamo kinahanglan magmahingpit—sa katapusan” (“Busa Kamo Kinahanglan Magmahingpit—sa katapusan,” Liahona, Nob. 2017, 40–42). Ang gugma sa Manluluwas nagpasabut nga bisan kon kita naghimo og mga kasaypanan, makakat-on kita gikan kanila ug makapadayon sa buhat sa pagtukod og kompyansa ug pagsalig.

Sa pagdugang, gipanalanginan kita og tabang sa Espiritu Santo, nga nagtabang kanato sa pag-ila tali sa husto ug sa sayop. “Isip mga miyembro sa Simbahan, mahimo natong masinati ang pakig-uban sa Espiritu Santo sa kanunay. … Ang Espiritu Santo naghatag og personal nga pagpadayag sa paghimo og dagkong mga desisyon sa kinabuhi” (Robert D. Hales, “Ang Espiritu Santo,” Liahona, Mayo 2016, 105). Ang Langitnong Amahan ug ang Manluluwas gusto nga kita mogamit sa gasa sa Espiritu Santo diha sa atong mga kinabuhi. Ang pagtukod ug paglig-on sa pagsalig diha sa Langitnong Amahan ug ni Jesukristo makadugang sa imong kompyansa sa pagpangita sa impluwensya sa Espiritu Santo.

Mga Kapanguhaan sa Komunidad ug sa Simbahan

(Pipila sa mga kapanguhaan nga gilista sa ubos wala gimugna, gipalambo, o gikontrolar sa Ang Simbahan ni Jesukristo sa mga Santos sa Ulahing mga Adlaw. Samtang kini nga mga materyal gituyo aron magsilbe isip dugang nga mga kapanguhaan, ang Simbahan wala magsuporta sa bisan unsa nga sulod [content] nga dili pinasubay sa mga doktrina ug mga pagtulun-an niini.)Ang uban niini nga mga kapanguhaan mahimong anaa sa Iningles lamang.