Abuso
Ako ba Makatukod og Luwas, Maayo nga mga Relasyon?

“Ako ba Makatukod og Luwas, Maayo nga mga Relasyon?” Tabang alang sa mga Biktima (2018).

“Ako ba Makatukod og Luwas, Maayo nga mga Relasyon?” Tabang alang sa mga Biktima.

Ako ba makatukod og luwas, maayo nga mga relasyon?

Ikaw makatukod og malipayon ug masaligan nga mga relasyon, bisan og dili nimo bation nga kini posible tungod sa pang-abuso nga imong giantus. Pinaagi sa panahon ug paningkamot, makasinati ka og katumanan ug hingpit nga kalipay sa imong mga pakigbinayloay sa uban.

Pagtukod og Maayong mga Relasyon

Ang pagtukod og mga relasyon susama ngadto sa pagtanom ug pagpatubo og mga liso. Gitudlo ni Presidente Spencer W. Kimball nga ang relasyon “sama sa usa ka bulak, ug, sama sa lawas, nagkinahanglan kini ug kanunay nga pagpakaon” (“Marriage and Divorce” [Debosyonal sa Brigham Young University, Sept. 7, 1976], 6, speeches.byu.edu). Ang pagpasagad o pag-abuso sa usa ka relasyon makahimo niini nga malawos ug posible nga mamatay, susama ngadto kon unsaon ang pagkakulang sa pag-amuma ug pag-atiman makapatay sa tanom. Ang duha ka tawo nga may relasyon nagkinahanglan nga mohatag og walay hunong nga paningkamot sa pagtukod og usa ka masaligan ug makahuluganong koneksyon. Ang matag relasyon nagkinahanglan og paningkamot sa pagtukod, pag-amping, o gani pag-ayo niana nga koneksyon.

Ang maayo nga mga relasyon naglakip og mga kinaiya sama sa mosunod:

  • Pagrespeto sa kabubut-on ug kagawasan sa usag usa

  • Pagkamatinuoron

  • Pagsalig

  • Pakig-uyon sa pagtubag sa mga panginahanglan sa usag usa

  • Bukas nga pagpahayag sa mga hunahuna ug mga pagbati

  • Pagtahud sa mga kalainan ug mga kalig-on

  • Pagsinuportahay sa usag usa

  • Responsibilidad ug pagkamay-tulubagon

  • Tataw, pinahimutang nga mga utlanan

  • Pagtahud sa mga utlanan sa uban

Tingali ang labing importanting butang nga imong mahimo sa pagtukod og mga relasyon ngadto sa uban mao ang paglig-on sa imong relasyon sa imong kaugalingon ug ngadto sa Dios. Pagsugod pinaagi sa pagkat-on og tan-aw sa imong kaugalingon sa paagi nga ang Dios nagtan-aw kanimo—may mahinungdanong mahangturon nga potensyal.

Gitudlo ni Presidente Dieter F. Uchtdorf: “Mogahin og gamayng panahon nga mas maila-ila ninyo ang inyong kaugalingon. … Kat-uni ang pagtan-aw sa imong kaugalingon sama sa pagtan-aw sa Langitnong Amahan kanimo—isip Iyang bililhon nga mga anak nga babaye o lalaki nga adunay balaang potensyal” (“Kabahin sa mga Butang nga Mahinungdanon,” Liahona, Nob. 2010, 22).

Sa ngadto ngadto ug sa tabang gikan sa uban, makakita ka og sugod sa imong kaugalingon sa lahi nga paagi ug makatagad sa imong kaugalingon nga may pailub, kalooy, pagtahud, ug pagpasaylo. Makakat-on ka sa pag-usab sa imong dili maayo nga mga tinuohan ug mga emosyon. Kon ikaw nakigbisog sa imong mga paningkamot, mahimo nimong hunahunaon ang propesyonal nga pagpakitambag. Mahimo usab nga kinahanglanon nimo ang paghimo o paghimog usab og sistema sa pagsuporta.

Samtang ikaw naglig-on sa imong relasyon sa imong kaugalingon ug sa Dios, makat-unan nimo kon unsaon nimo paggamit ang sama nga mga baruganan sa pagtukod og maayo nga mga relasyon ngadto sa uban. Ang paghimo og paningkamot sa pagmugna og makalipay, makaamuma, ug maghinatagay nga mga relasyon magdala og hingpit nga kalipay.

Mga Kapanguhaan sa Komunidad ug sa Simbahan

(Pipila sa mga kapanguhaan nga gilista sa ubos wala gimugna, gipalambo, o gikontrolar sa Ang Simbahan ni Jesukristo sa mga Santos sa Ulahing mga Adlaw. Samtang kini nga mga materyal gituyo aron magsilbe isip dugang nga mga kapanguhaan, ang Simbahan wala magsuporta sa bisan unsa nga sulod [content] nga dili pinasubay sa mga doktrina ug mga pagtulun-an niini.).Ang uban niini nga mga kapanguhaan mahimong anaa sa Iningles lamang.

May Kalabutan nga mga Artikulo