Tabang alang sa mga Biktima

Ang abuso mao ang pagpasagad o pagdaogdaog sa uban sa paagi nga makahimo og pisikal, emosyonal, o sekswal nga kadaot. Kini supak sa mga pagtulun-an sa Manluluwas. Ang Ginoo nanghimaraut sa madagmalon nga mga kinaiya sa bisan unsa nga klase.

“Ang baruganan sa Simbahan mao nga ang pang-abuso dili madawat sa bisan unsa nga klase” (Tamdanan nga Basahon 1: Mga Presidente sa Stake ug mga Bishop [2010], 17.3.2). Ang pang-abuso naglapas sa mga balaod sa Dios ug mahimo usab nga usa ka kalapasan sa mga balaod sa katilingban. Ang Ginoo nagpaabot kanato nga magmabinantayon sa pagpugong sa pang-abuso ug sa pagpanalipod ug pagtabang niadto kinsa nabiktima sa pang-abuso. Walay usa nga gidahom sa paglahutay og madagmalon nga kinaiya.

Kon ikaw gi-abusohan karon o naabusohan kaniadto, dili ka kinahanglan nga moatubang niini nga mag-inusara. Mahimong bation nimo ang kalibug, kawalay gahom, kahadlok, nag-inusara, naulaw, o ingon og ikaw nawad-an sa imong bili. “Hinumdomi ang bili sa [imong kalag] mahinungdanon sa panan-aw sa Dios” (Doktrina ug mga Pakigsaad 18:10), ug ikaw “sama ka bililhon sa iyang panan-aw ingon sa [bisan kinsa] uban” (Jacob 2:21). Mga higala, pamilya, mga pangulo sa Simbahan, ug ubang makakonektar kanimo ngadto sa mga kapanguhaan nga motabang kanimo sa pagbati nga luwas aron ikaw mamaayo ug mahinumdom sa imong bili. Ikaw gihigugma, ug makakaplag ka og paglaum ug pagkaayo pinaagi sa Manluluwas nga si Jesukristo tungod sa Iyang maulaong sakripisyo.

Kini nga sulod [content] gihimo aron sa pagtabang niadtong kinsa nabiktima sa pang-abuso ug aron sa pagtabang sa mga pangulo ug sa uban sa pagpangalagad ngadto sa mga indibidwal ug sa ilang mga pamilya nga grabeng naapektohan sa pang-abuso. Adunay nagkalainlain nga mga pulong nga gigamit sa paghulagway sa mga tawo kinsa nakasinati og pang-abuso. Alang niini nga kahimtang, ang pulong nga biktima gigamit sa paghulagway ni bisan kinsa nga tawo kinsa nakasinati o nagsinati og pang-abuso.

Kini nga impormasyon naghatag og paggiya ug kapanguhaan ngadto sa:

• Pagtabang sa mga biktima sa pang-abuso sa pagpangita og paglaum, panabang, ug pagkaayo.

• Tabangi ang mga sakop sa pamilya, mga higala, o uban sa pag-ila og pang-abuso ug pagkamakahibalo kon unsa ang buhaton aron sa pagkuha og tabang alang sa mga biktima.

• Pagtabang sa mga ginikanan sa pagsulti ngadto sa ilang mga anak mahitungod sa pang-abuso.

Pagpakitambag nga mga kapanguhaan ug impormasyon alang sa mga miyembro sa konseho sa ward kabahin sa mga hisgotanan sa pang-abuso makit-an diha sa CounselingResources.org.

Ang mga lider kinahanglan nga maghunahuna og mga paagi sa pagsiguro nga ang mga miyembro nakahibalo niini nga mga kapanguhaan. Ang mga miyembro ug mga lider giawhag sa pagkat-on ug sa paggamit og kasaligan nga lokal nga mga kapanguhaan alang sa krisis nga tabang ingon man sa taas nga panahon nga suporta.