Asa ako moduol alang sa suporta?

Ang suporta moabut sa daghang klase ug gikan sa nagkalainlaing mga tinubdan. Ang Langitnong Amahan kasagaran nagtubag sa atong mga pag-ampo pinaagi sa paghatag og suporta nga ipaagi sa uban. Ang Manluluwas mismo nakadawat og suporta gikan sa mga disipulo ug mga higala. Gani nadawat Niya ang kalig-on gikan sa anghel samtang nag-antos didto sa Tanaman sa Getsemani (tan-awa sa Lucas 22:43). Ang pagdawat sa gugma ug suporta importante sa pagtabang kanimo nga maayo.

Mga Tinubdan sa Suporta

Kon gibati nimo ang pag-inusara, hibaloi nga adunay mga tawo kinsa nahigugma kanimo ug gusto nga motabang kanimo, lakip ang imong Langitnong mga Ginikanan, ang Manluluwas, si Jesukristo, ug ang Espiritu Santo. Sila ang mahimo nimong labing dako nga mga tinubdan sa suporta. Nasinati sa Manluluwas ang tanan nimong mga sakit ug kasakit, bisan kadtong gihimo sa uban, ug nahibalo Siya kon unsaon sa pagtabang kanimo (tan-awa sa Alma 7:11–12). Ang Espiritu Santo makahatag kanato og kahupayan, kalinaw, ug espiritwal nga kalig-on aron makapadayon sa unahan. Pinaagi sa pag-ampo ngadto sa imong Langitnong Amahan, pangayo og tabang, ug ikaw magiyahan ngadto sa mga tawo kinsa makahatag og suporta.

Ang paghukom kon kanus-a ug kang kinsa mangayo og suporta usa ka personal nga desisyon. Sa sinugdan, mahimo nga ikaw lisdan sa pagduol ngadto sa pamilya ug mga higala o sa mga pangulo sa Simbahan alang sa tabang. Mahimo nga mas sayon kini ipakigbahin ngadto sa usa ka grupo nga tigsuporta o sa tigtambag (tan-awa sa “Kinahanglan ba akong mokuha og propesyonal nga tabang?”). Ang pagpangayo og tabang makahadlok, apan samtang ikaw nagbuhat, matingala ka sa gidak-on sa gugma ug pagdawat nga imong gibati.

Pagpili og mga tawo kinsa nagdapig sa mga baruganan sa ebanghelyo. Ang propesyonal nga mga tigtambag kinahanglan nga may lisensya (diin gikinahanglan) ug makasarang sa pagtabang sa mga kaso sa pang-abuso.

Mga Kapanguhaan sa Komunidad ug sa Simbahan

(Pipila sa mga kapanguhaan nga gilista sa ubos wala gimugna, gipalambo, o gikontrolar sa Ang Simbahan ni Jesukristo sa mga Santos sa Ulahing mga Adlaw. Samtang kini nga mga materyal gituyo aron magsilbi isip dugang nga mga kapanguhaan, ang Simbahan wala magsuporta sa bisan unsa nga sulod [content] nga dili pinasubay sa mga doktrina ug mga pagtulun-an niini.) Ang uban niini nga mga kapanguhaan mahimong anaa sa Iningles lamang.

Anaa sa Krisis? Pakigsulti Karon.
“Connect Directory,” Victim Connect nga sentro sa kapangohaan
“Suporta nga mga Grupo,” Organizations for Adult Survivors of Abuse,” Pangita og Suporta nga mga Grupo | Mental Health America healthfinder.gov
“Pangita og Suporta nga mga Grupo,” mhanational.org
Panambag sa Pangpamilya nga mga Serbisyo [Family Services]