Unsa kaha kon ako nakigbisog sa pagsalig sa uban?

Kon ikaw nahimong biktima sa pang-abuso, bation nimo sama og ikaw dili na gayud makahimo sa pagsalig og usab ni bisan kinsa. Tingali makapangutana ka kon ikaw makasalig pa ba sa uban, sa imong kaugalingon, o gani sa Dios sa paghimo nimo nga luwas. Ang pagbati nga giluiban gumikan sa pang-abuso mahimong ilabi ka lisud sa pagbuntog kon ang tigpasipala usa ka tawo nga suod nimo, ug usahay labaw pa gani kon kini usa ka tawo nga imong gisaligan sa pagpanalipod kanimo.

Ang ka seryoso sa pipila ka mga kalapasan makapasabut kon nganong madugay kaayo ang pagtukod og balik sa pagsalig ug sa pagpahiuli og pagbati nga luwas human sa pang-abuso. Usab, ang makahugno nga kinaiyahan sa pag-abuso kanimo mahimong mopugong kanimo nga makatukod og usab sa pasalig ngadto sa tigpasipala. Hinumdumi nga ang pagpasaylo og usa ka tawo wala magpasabut nga kinahanglan gayud nimo siyang saligan.

Pagtukod og Pagsalig diha sa Bag-o o Anaa nang Daan nga mga Relasyon

Ang maayo nga mga relasyon, bag-o ug anaa nang daan, gitukod diha sa pagsalig. Makapili ka sa pagsalig sa uban kon sila andam sa pagbuhat og mga butang nga motukod o motukod pag-usab sa pagsalig kanimo. Ang pagkat-on sa pagsalig sa uban nagkinahanglan og panahon ug kanunay nga pag-amuma.

Ang pagtukod og pagsalig sama sa usa ka pundo sa bangko nga nagtubo o nagkagamay nag-agad sa mga deposito o pagkuha nga gihimo. Samtang ikaw nagtukod og pundo sa pagsalig ngadto sa uban, hunahunaa ang mosunod nga mga baruganan:

Ikaw ang tag-iya sa imong pundo—magpili ka kon kinsa ang modawat sa imong pagsalig.
Pagtukod og pagsalig sa imong kaugalingon nga gidugayon—kinahanglan nga dili ka mobati nga gipugos sa pagsalig sa usa ka tawo nga dili pa ikaw andam.
Tinoa kon unsa nga mga panglihok ang mga deposito (sama sa pagkamatinahuron ug pagkamatinuoron) ug ang mga pagkuha (sama sa pagkadili matinuoron ug motago o motabon og mga sayop).
Klaroha sa uban kon unsa nga mga panglihok ang makadugang ngadto o makakuha sa imong pagsalig.
Pagbaton og kompyansa sa pagka-eksakto sa imong kaugalingon nga mga paniid sa mga panglihok sa uban.
Ipahiangay ang pagkasuod sa imong mga relasyon ngadto sa uban pinasikad sa matang sa pagsalig nga gitukod.

Kon mohukom ka sa pagtukod og pagsalig ngadto sa uban, tinoa ang mga kinutuban nga gikinahanglan aron ikaw luwas. Ang uban nga mga tawo mopili sa dili paghimo sa ilang bahin sa pagtukod sa pagsalig ug sila dili takus sa imong pagsalig. Nagtambag ang Ginoo kanato nga “magmasinabuton ingon sa bitin, ug magmalumo ingon sa mga salampati” (Mateo 10:16).

Samtang ang uban mahimong dili kasaligan, ikaw makasalig kanunay nga ang Ginoo mohigugma kanimo ug motabang nga ikaw mamaayo. Kon ikaw mangayo sa tabang sa Dios, imong madiskubrehan ang “kadako sa iyang malumo nga mga kalooy” (1 Nephi 8:8) nga mga ebidensya nga ikaw makasalig Kaniya. “Ang Iyang kalooy mao ang gamhanan nga mananambal, bisan sa inosenting samaran” (Boyd K. Packer, “Ang Rason sa Atong Paglaum,”” Liahona, Nob. 2014, 7).

Kon ikaw sa gihapon nakigbisog sa imong abilidad sa pagtukod og pagsalig, pangayo og tabang gikan sa hingkod og hunahuna ug kasaligan nga indibidwal, sama sa ginikanan, sakop sa pamilya, higala, pangulo sa Simbahan, magtutudlo, o tigtambag. Makapangayo usab ikaw og tabang gikan sa usa ka propesyonal nga tigtambag aron pagtukod og balik sa pagsalig sa imong kaugalingon ug sa uban.

Mga Kapanguhaan sa Komunidad ug sa Simbahan

(Pipila sa mga kapanguhaan nga gilista sa ubos wala gimugna, gipalambo, o gikontrolar sa Ang Simbahan ni Jesukristo sa mga Santos sa Ulahing mga Adlaw. Samtang kini nga mga materyal gituyo aron magsilbe isip dugang nga mga kapanguhaan, ang Simbahan wala magsuporta sa bisan unsa nga sulod [content] nga dili pinasubay sa mga doktrina ug mga pagtulun-an niini.) Ang uban niini nga mga kapanguhaan mahimong anaa sa Iningles lamang.

“Aron Pag-alim sa Makadaot nga mga Resulta sa Pang-abuso,” Richard G. Scott, Liahona, Mayo 2008, 40–43
“Ang Pag-ula Moayo sa Tanang Kasakit,” Kent F. Richards, Liahona, Mayo 2011, 15–17
“Pagdawat sa Gahum ni Jesukristo diha sa Atong Kinabuhi,” Russell M. Nelson, Liahona, Mayo 2017, 39–42
“Trust,” Help for Adult Victims of Child Abuse (HAVOCA)
“Trust,” The National Domestic Violence Hotline