Mamaayo ba ako gikan niini?

Ang pagkamamaayo posible. Mamaayo ka gikan sa bisan unsa nga matang sa pang-abuso uban sa tabang sa Manluluwas pinaagi sa Iyang Pag-ula.

Kon ikaw nasakitan, ang ideya nga ang sakit nga imong gidala mapulihan og kalinaw tingali hapit imposible nga katuohan. Ang imong mga samad tingali dili mamatikdan ug dili mailhan sulod sa mga katuigan. Ang uban tingali dili makahibalo sa imong sakit tungod kay gitabonan nimo ang kasakit pinaagi sa pagpahiyom ug pagpuyo sa kinabuhi ingon og walay dautang nahitabo.

Samtang si Propeta Joseph Smith nabilanggo sa Liberty Jail, misulat siya og epistola ngadto sa Simbahan, nga naglakip sa “katungdanan sa mga Santos kalabut sa ilang mga manggugukod” (tan-awa sa Doktrina ug mga Pakigsaad 123, ulohan sa seksyon). Diha sa epistola, wala niya sultihi ang mga Santos kinsa nag-antos sa pagpanggukod ug sa pisikal nga kadaot nga itago ang ilang mga kasakit diha sa ilang mga kaugalingon ug magpakaaron-ingnon nga walay nahitabo. Hinoon, siya mitudlo kanila sa pagtigum sa mga istorya sa ilang mga pag-antus ug sa pagsumbong niini ngadto sa mga awtoridad.

Ingon man, dili kinahanglan nga imong itago o magpakaaron ingnon nga walay nahitabo. Tingali bation nimo ang pagkawalay mahimo, ka walay gahom, kalibog, nag-inusara, o napahilayo. Bisan unsa pa man ang imong gihunahuna o gibati, hibaloi nga ikaw adunay walay katapusang bili ug ikaw gihigugma (tan-awa sa Doktrina ug mga Pakigsaad 18:10).

Ang Proseso sa Pagkaayo

Ang pagkaayo motabang sa pagpakunhod sa imong sakit. Kini usa ka proseso nga mokabat og panahon, apan kini posible uban sa tabang sa Manluluwas nga si Jesukristo tungod sa Iyang maulaong sakripisyo alang kanato.

Ang proseso sa pagkaayo naglakip sa mosunod nga mga lakang:

Pag-ila ug pagsubo sa nawala
Pakigbahin sa imong palas-anon ngadto sa uban
Pag-ila sa gibug-aton sa pang-abuso sa imong kinabuhi ug sa pagpangayo og propesyonal nga pagtambag kon gikinahanglan
Pagsabot nga ang imong madagmalon nga kasinatian dili mohulagway kanimo
Pagsalig diha sa kapasidad sa Dios nga moayo

Pangutan-a ang imong kaugalingon sa mosunod samtang nagbuhat ka pinaagi niini nga proseso:

Sa unsa nga paagi ang pang-abuso nakaapekto sa akong kinabuhi?
Hain ako dapit diha sa proseso sa pagkaayo?
Unsa ang makatabang kanako sa pagpadayon sa pag-uswag?

Hunahunaa ang pagtandi sa proseso sa emosyonal nga pagkaayo ngadto sa pag-atiman ug pagtambal sa pisikal nga kadaot. Hunahunaa nga sa imong pagkabata, nabali ang imong bitiis. Imbis nga moadto sa doktor aron ipatarong kini, mipadayon ka sa pagtakiang hangtod ang sakit nawala, apan sa kanunay adunay gamay nga sakit sa matag lakang nga imong himoon. Paglabay sa katuigan gusto nimong mawala ang sakit, busa miadto ka sa usa ka doktor. Ang doktor kinahanglang motarong sa bukog, molimpyo sa bisan unsay natigom nga mitubo, mosemento niini, ug mopadala kanimo ngadto sa pisikal nga therapy aron sa paglig-on a imong bitiis.

Kon nagtinguha sa pagkaayo gikan sa pang-abuso, kinahanglan gayud nga imong ilhon nga ang sakit tinuod ug nga adunay mabuhat niini. Kini naglakip sa pagdawat sa unsay nahitabo ug sa pagtugot sa mga pagbati nga nasakitan, nahadlok, ug naguol nga mamatud-an. Kasagaran makatabang ang pakigtambayayong sa usa ka propesyonal nga tigtambag nga sinati niini nga proseso sa pagkaayo. (Susiha sa imong bishop aron mahibalo kon unsa nga mga kapanguhaan ang anaa sa Pangpamilya nga mga Serbisyo [Family Services] sa inyong dapit.)

Samtang ikaw naghimo pinaagi sa pagkaayo, ang imong mga panumdoman sa pang-abuso mahimong magpabilin, hinoon, ang gibug-aton sa pagbati ug ang ngil-ad nga epekto niini nga mga kasinatian diha sa imong kinabuhi mokunhod ug sa ngadto-ngadto mahimong mawala.

Maanaa o wala kay maduol nga propesyonal nga tabang, kini makatabang nga mag-ampo, magtuon sa kinabuhi sa Manluluwas ug sa Iyang Pag-ula, magkuha og suporta gikan sa uban, ug sa pagpangayo og espiritwal nga tabang gikan sa usa ka pangulo sa Simbahan (tan-awa sa “Asa ako moduol alang sa suporta?”). Ang mga pangulo sa Simbahan mahimong motabang sa pagpagaan sa imong palas-anon, ug makadawat sila og inspirasyon sa pagtabang kanimo sa pagsabot sa imong balaang bili ug relasyon ngadto sa imong Amahan sa Langit ug sa Manluluwas.

Si Elder Richard G. Scott sa Korum sa Napulog Duha ka Apostoles mipahayag: “Ligdong akong nagpamatuod nga kon ang mga buhat sa uban nga kapintas, kahiwi, o panghilawas sa duol nga kabanay makapasakit kanimo og maayo, nahisupak sa imong kabubut-on, ikaw dili responsable ug kinahanglan nga dili ka gayud mobati nga nakasala. Kamo mahimong magpabilin nga adunay uwat sa pang-abuso, apan kadto nga mga uwat dili kinahanglang ma-permanente. …

“Sabta nga ang pagkaayo mokabat og dugay nga panahon. Ang pagkaayo sa kinatibuk-an nagsunod og mga lakang. Kini madali kon ang pagpasalamat ipahayag ngadto sa Ginoo alang sa matag matang sa pag-uswag nga makita” (“Healing the Tragic Scars of Abuse,” Ensign, Mayo 1992, 32).

Paghatag og Pasaylo

Samtang ikaw naningkamot pinaagi sa proseso sa pagkaayo, ikaw makahimo, uban sa tabang sa Manluluwas, pagpalambo sa kapasidad sa pagpasaylo niadtong kinsa nakapasakit kanimo.

Kabahin sa pagkaayo mao ang pagkamoabut sa punto diin ikaw dili na mohunahuna kon unsaon sa nakasala pagtubag sa iyang mga lihok. Patubagon o dili ang tawo sa sibil nga mga awtoridad, ang matag nakasala usa ka adlaw niana kinahanglan nga moatubang sa Dios (Doktrina ug mga Pakigsaad 137:9).

Walay pagsapayan kanus-a o sa unsa nga paagi ang nakasala patubagon, makasiguro ka nga ang “paggamit [ni bisan kinsa] sa gahum o kamandoan o pagpugos sa pagbati sa mga katawhan, bisan unsa nga matang sa pagkadili matarung, tan-awa, ang mga langit sa ilang mga kaugalingon mobiya; ang Espiritu sa Ginoo maguol” (Doktrina ug mga Pakigsaad 121:37). Tan-awa “Posible ba ang pagpasaylo?” alang sa dugang nga tabang.

Mga Kapanguhaan sa Komunidad ug sa Simbahan

(Pipila sa mga kapanguhaan nga gilista sa ubos wala gimugna, gipalambo, o gikontrolar sa Ang Simbahan ni Jesukristo sa mga Santos sa Ulahing mga Adlaw. Samtang kini nga mga materyal gituyo aron magsilbi isip dugang nga mga kapanguhaan, ang Simbahan wala magsuporta sa bisan unsa nga sulod [content] nga dili pinasubay sa mga doktrina ug mga pagtulun-an niini.) Ang uban niini nga mga kapanguhaan mahimong anaa sa Iningles lamang.

“Healing from Sexual Abuse,” Chieko N. Okazaki, debosyonal sa BYU, Okt. 23, 2002 (PDF) (video)
“To Be Free of Heavy Burdens,” Richard G. Scott, Ensign o Liahona, Nob. 2002
“Bridge to Hope and Healing,” Nanon Talley, Ensign, Abr. 2017
“Healing the Tragic Scars of Abuse,” Richard G. Scott, Ensign, Mayo 1992
“Ang Pag-ula Moayo sa Tanang Kasakit,” Kent F. Richards, Liahona, May 2011
“Ang Gamhanan nga Tig-ayo,” Carole M. Stephens, Liahona, Nob. 2016
Overcoming Trauma, Elizabeth Smart, The Daily Goalcast