Abuso
Unsaon sa Manluluwas Pagtabang Kanako isip usa ka Biktima sa Pang-abuso?

“Unsaon sa Manluluwas Pagtabang Kanako isip usa ka Biktima sa Pang-abuso?” Tabang alang sa mga Biktima (2018)

“Unsaon sa Manluluwas Pagtabang Kanako isip usa ka Biktima sa Pang-abuso?” Tabang alang sa mga Biktima

Unsaon sa Manluluwas pagtabang kanako isip usa ka biktima sa pang-abuso?

Ang Manluluwas makahupay ug makaayo nimo. Ang Manluluwas nakasinati sa atong kasakit, mga pag-antos, mga pagtintal, mga kahuyang, ug balatian sa matag matang (tan-awa sa Alma 7:11–12). Kahibalo Siya unsaon sa pagtabang, pagsuporta, pag-ayo, ug paghupay nimo sa higayon sa imong panginahanglan. Mahimo Niya nga wagtangon ang imong kasakit ug kaguol.

Mosalig nga ang Manluluwas Makatabang Nimo

Isip usa ka biktima sa pang-abuso, tingali mangutana ka unsaon sa Manluluwas nga makatabang sa pag-ayo nimo. Tingali maghunahuna ka nga ang maulaong sakripisyo sa Manluluwas alang lamang niadtong nakasala ug sa nagkinahanglang maghinulsol. Dili ikaw ang angay basulon sa pang-abuso nga imong nasinati, dili usab ikaw ang nagkinahanglan og pasaylo sa mga binuhatan nga gihimo sa uban batok kanimo. Mao nga unsaon man sa Manluluwas pagtabang kanimo? Tungod sa Iyang sakripisyo, Iyang masabtan kon unsay giagian sa matag usa ka tawo. Bisan kon dili gayud nato tinuoray nga mahibaloan giunsa paghimo sa Manluluwas nga mobati sa atong mga kasakit, kita makaangkon og pagtuo nga Siya nakasabut sa matag lalaki, babaye, ug bata sa hingpit nga paagi (tan-awa sa 2 Nephi 9:21). Siya makahatag og kalinaw ug kalig-on aron mopadayon sa unahan.

Makapangita ka sa makaayo nga gahum sa Manluluwas ug pagsalig nga Siya makatabang nimo.

Si Elder David A. Bednar sa Korum sa Napulog Duha ka mga Apostoles mitudlo,

“Giantus sa Manluluwas dili lamang ang alang sa atong mga sala ug mga kadautan—apan ang alang usab sa atong pisikal nga mga sakit ug pag-antos, atong mga kahuyang ug kasaypanan, atong mga kahadlok ug mga kapakyasan, atong mga kahigawad, ug kawalay kadasig, atong mga pagmahay ug pagbasol, atong pagkawalay paglaum, ang kawalay hustisya ug mga kadautan nga atong nasinati, ug ang mga sakit sa balatian nga naghasol kanato.

“Walay pisikal nga sakit, walay espiritwal nga samad, walay kasakit sa kalag o kaguol, walay balatian o kaluya nga kamo o ako sukad nakahimamat niini nga mortalidad nga wala masinati og una sa Manluluwas. Diha sa higayon sa kahuyang mahimong mosinggit kita, ‘Walay nahibalo sama sa unsa kini. Walay makasabut.’ Apan ang Anak sa Dios hingpit nga nakahibalo ug nakasabut, kay Iyang nabati ug napas-an ang atong indibidwal nga mga alantuson. Ug tungod sa Iyang walay katapusan ug mahangturong sakripisyo (tan-awa sa Alma 34:14), Siya adunay hingpit nga pagsabut ug makalugway ngari kanato sa Iyang bukton sa kalooy. Siya makakab-ot, makahikap, makaabag, makaayo, ug makalig-on kanato nga mahimong mas labaw kay sa ato mismong mahimo ug makatabang kanato sa pagbuhat niana nga kita dili gayud makahimo nga nagsalig lamang diha sa atong kaugalingong gahum” (“Makadaug sa Ilang mga Alantuson uban sa Kasayon,” Liahona, Mayo 2014, 90).

Ang Manluluwas adunay gahum sa pagtabang ug pag-ayo nimo, kon imo Siyang tugutan. Usahay Iyang tangtangon ang mga alantuson ug usahay Siya motabang nimo nga “moantus niadto nga mga kasakit, uban ang usa ka malig-on nga paglaum nga kamo usa ka adlaw makapahulay gikan sa tanan ninyo nga mga kasakitan” (Alma 34:41). Samtang tingali mabati pa gihapon nimo ang sakit, dili kinahanglan nga mag-inusara ka sa pagpas-an niini nga sakit.

Si Presidente James E. Faust mitudlo: “Kadtong kinsa nasakitan o nahiubos kinahanglan mobuhat sa unsay ilang mahimo aron makalahutay sa ilang mga pagsulay, ug ang Manluluwas ‘[mo]tabang [sa] iyang mga katawhan sumala sa ilang mga kahuyang’ [Alma 7:12]. Siya motabang kanato sa pagpas-an sa atong mga alantuson. Ang ubang mga samad sakit kaayo ug lawom nga kini dili maayo kon wala ang tabang sa mas taas nga gahum ug paglaum alang sa usa ka hingpit nga hustisya ug pagpahiuli sa sunod nga kinabuhi. Kay ang Manluluwas nag-antus man sa bisan unsa ug sa tanan nga ato gayud nga mabatyagan o masinati, makatabang Siya sa huyang aron mas molig-on. Nakasinati na Siya niining tanan sa personal nga paagi. Nakasabut Siya sa atong kasakit ug motabang nato bisan sa atong labing lisud nga mga higayon” (“The Atonement: Our Greatest Hope,” Ensign, Nob. 2001, 20).

Ang Paggamit sa Makaayo nga Gahum sa Manluluwas

Makagamit ka sa tabang ug makaayo nga gahum sa Manluluwas pinaagi sa matinud-anon ug sinsero nga pag-ampo ngadto sa Langitnong Amahan alang sa kalinaw, kahupayan, ug pagkaayo. Mahimo usab nimo kini pinaagi sa pagkat-on pa og dugang kabahin ni Jesukristo ug sa Iyang Pag-ula.

Si Presidente Russell M. Nelson mitudlo nga adunay upat ka butang nga atong mahimo aron “madawat sa atong mga kinabuhi ang gahum sa atong Ginoo ug Agalon, si Jesukristo.” Gitambagan kita niya nga:

  1. Magkat-on mahitungod sa Manluluwas.

  2. Mopili sa pagbaton og pagtuo diha Kaniya ug mosunod Kaniya.

  3. Mohimo ug motuman sa sagradong mga pakigsaad.

  4. Modangop ngadto Kaniya.

Si Presidente Nelson mipasabut, “Kon mas masayud kita sa pangalagad ug misyon sa Manluluwas—mas masabtan nato ang Iyang doktrina ug unsay Iyang gibuhat alang kanato—mas masayud kita nga Siya makahatag og gahum nga atong gikinahanglan sa atong kinabuhi” (tan-awa sa “Pagdawat sa Gahum ni Jesukristo diha sa Atong Kinabuhi,” Liahona, Mayo 2017, 39–41).

Ang Manluluwas sa Kasagaran Molihok pinaagi sa Ubang Tawo

Samtang ang Manluluwas naghatag og kalinaw ug kahupayan pinaagi sa Balaang Espiritu, Siya kanunay nga nagdapit sa ubang tawo nga moserbisyo usab kanato. Si Presidente Spencer W. Kimball mipasabut sa mosunod nga kamatuoran: “Ang Dios makamatikud kanato, ug Iya kita nga pagabantayan. Apan sa kasagaran ipaagi niya sa lain nga tawo ang pagtubag sa atong mga panginahanglan” (Spencer W. Kimball, “Small Acts of Service,” Ensign, Dis. 1974, 5).

Isip biktima sa pang-abuso, tingali bation nimo nga nag-inusara lang ka. Kon mag-ampo ka sa Langitnong Amahan, pangayo Niya alang sa katakus sa pagila kon ang mga tawo naningkamot nga motabang nimo. Dayon sa mapaubsanong paagi tuguti ang uban nga moabag nimo sa gamay ug yano nga mga paagi. Usahay kini nga tawo tingali usa ka tigpangalagad nga brother o sister, usa ka kapikas o lain nga sakop sa pamilya, o usa ka lider sa Simbahan (tan-awa sa “Where can I turn for support?”). Tuguti sila nga motabang nimo para sa ubang mga kapanguhaan alang sa proteksyon ug pagkaayo, lakip na sa medikal nga tabang, propesyonal nga mga magtatambag, ug mga lider sa Simbahan. Samtang imong hiusahon ang espirituhanong suporta ug ang propesyonal nga tabang, makabaton ka og paglaum ug pagkaayo.

Mga Kapanguhaan sa Komunidad ug sa Simbahan

May Kalabutan nga mga Artikulo