6. Zhvillimi i Ripërtëritjes Shpirtërore

Ndonjëherë misionarët reagojnë ndaj stresit të tepërt duke e vënë në dyshim vërtetësinë e ungjillit. Misionarët shpesh reagojnë në këtë mënyrë sepse u mungojnë burimet për t’u përballur me stresin e tepërt. Nëse ndiheni në këtë mënyrë, provoni sugjerimet më poshtë. Përzgjidhni ato që duken të drejta për ju. Referojuni pjesës “1. Zhvillimi i Ripërtëritjes kur Jeni në Stres” për ide shtesë.

A. Forcimi i Dëshmisë Suaj

• Kuptojeni se pyetjet janë diçka e shëndetshme. Profeti Jozef Smith mori shumë zbulesa si përgjigje ndaj pyetjeve të tij të sinqerta. Është diçka e shëndetshme që ju të keni pyetje rreth ungjillit. Ndërsa përpiqeni fort për t’i gjetur përgjigjet, kujtoni se shkrimet e shenjta, profetët, mësuesit dhe vetë aftësia juaj për të arsyetuar mund t’ju vijnë në ndihmë. Por vetëm Shpirti mund ta pohojë të vërtetën. Shpirti na tregon se Jezusi është Krishti dhe se Kisha është e vërtetë.

• Kuptojeni se çfarë është besimi. Të kesh besim është të mirëbesosh te mirësia, dashuria, urtësia dhe paanësia e përsosur e Perëndisë. Është të mirëbesosh edhe kur nuk arrijmë të kuptojmë përsosurisht. Alma dha mësim se “besim nuk është që të kesh një njohuri të përsosur të gjërave; prandaj, në qoftë se keni besim, ju shpresoni për gjëra që nuk shihen, të cilat janë të vërteta” (Alma 32:21). Juve nuk ju duhet “njohuri [e] përsosur” për të pasur besim. Studiojeni kapitullin Alma 32 që t’ju ndihmojë të ndërtoni besimin tuaj.

• Kini besim kur gjërat duhen sikur kanë dalë jashtë kontrollit. Ju mund të ndiheni i shqetësuar për rrethana ose rezultate të caktuara. Kur kjo ndodh, ushtrohuni që të jeni i/e qetë dhe i/e përqendruar tek e tashmja (shih “1. Zhvillimi i Ripërtëritjes kur Jeni në Stres”). Vini re emocionet që keni kur ndiheni sikur e keni humbur kontrollin. Ndonëse këto ndjenja mund të jenë të sikletshme, nuk mund t’ju lëndojnë. Me kalimin e kohës, do të mësoni të keni besim edhe më të madh. Ju mund të keni besim përballë pasigurisë dhe sfidës.

“Kërkoni me zell, lutuni gjithmonë e jini besimtarë dhe gjithë gjërat do të punojnë së bashku për të mirën tuaj, në qoftë se ecni drejt dhe kujtoni besëlidhjen me të cilën keni lidhur besë njëri me tjetrin.”

Doktrina e Besëlidhje 90:24

• Zbatojini urdhërimet. Ne fitojmë mirëbesim te Zoti kur ua mësojmë vlerën mësimeve të Tij. Për ta fituar këtë mirëbesim, ne duhet të bëjmë vullnetin e Tij. “Në qoftë se dikush don të dijë vullnetin e tij, do ta njohë nëse kjo doktrinë vjen nga Perëndia apo unë flas nga vetja ime” (Gjoni 7:17).

• Jini i/e duruar. Koha dhe përvoja do t’ju ndihmojnë të kuptoni disa gjëra që janë pështjelluese tani. Mbajeni mend mësimin e Nefit: “Unë e di se [Perëndia] i do fëmijët e tij; megjithatë, unë nuk e di kuptimin e të gjitha gjërave” (1 Nefi 11:17). Ndërtoni mbi atë që e dini nga Shpirti se është e vërtetë rreth Perëndisë.

B. Të Mësuarit për t’u Penduar

Pendimi përfshin përputhjen e vullnetit tuaj me vullnetin e Shpëtimtarit. Parimet në vijim do t’ju ndihmojnë ndërsa përpiqeni fort të pendoheni.

• Jini i/e ndershëm/me me presidentin tuaj të kunjit. Nëse keni mëkate të rënda me të cilat nuk jeni përballur dot, flisni me presidentin tuaj të kunjit. Jini i/e hapur dhe i/e ndershëm/me. Ai do t’ju ndihmojë t’i ndreqni këto gjëra.

• Faleni veten pas pendimit. Ndonjëherë njerëzit ndihen ende fajtorë dhe të turpëruar pasi pendohen. Mbajeni mend që të gjithë ne ndiejmë keqardhje për mëkatet dhe gabimet e kaluara. Mirëbesoni se Shlyerja e Krishtit është e mjaftueshme edhe për ju. Mbajeni mend që pendimi nuk është thjesht plani rezervë. Pendimi është plani i lumturisë për çdo person.

• Përqendrohuni te gjërat që kanë vërtet rëndësi. Bëni më të mirën tuaj për t’u penduar çdo ditë. Më pas sigurohuni që gjërat për të cilat shqetësoheni, të jenë gjëra që kanë vërtet rëndësi. Një shembull mund të jetë shërbimi me dashuri. Mos u shqetësoni për çështjet e krenarisë vetjake, e tillë si ajo që të tjerët mendojnë për ju.

• Kuptojeni rolin e rrëfimit. Nuk është e nevojshme të rrëfeni mëkate më pak të rënda ose të rrëfeni vazhdimisht të njëjtin mëkat. Udhëheqësit e priftërisë do t’ju tregojnë se kur është i mjaftueshëm rrëfimi juaj. Të vazhdosh të ndiesh keqardhje dhe trishtim për mëkatet e kaluara është diçka normale. Por kjo nuk do të thotë se keni nevojë të rrëfeheni vazhdimisht për të njëjtën gjë. Shpërqendroheni veten nga mendime të tilla me aktivitete të tjera. Bëni zgjedhjen e qëllimshme për të besuar te falja e Zotit. Shpërfilleni tundimin për të qenë në ankth ose turpëruar.

• Flisni me presidentin tuaj të kunjit ose peshkopin nëse vazhdoni të keni probleme.

Detaj nga Christ and the Rich Young Ruler [Krishti dhe i Riu Pasanik], nga Heinrich Hofmann

“Rri qet’, o shpirt: Per’ndia zotohet, Si në të shkuarën, udh’heq t’ardhmen. Shpresa, besimi yt t’mos tronditen; Ç’ësht’ sot e fshehur, në fund do t’shkëlqej’. Rri qet’, o shpirt: Valët, er’rat njohin, Zën’ e Tij q’sundoi, kur k’tu Ai jetoi.”

“Rri Qet’, O Shpirt” (Himne, nr. 64)

C. Të Mësuarit për t’u Lutur me Qëllim të Vërtetë

• Përpiquni të luteni me zë, edhe nëse vetëm pëshpëritni. Përpiquni të përgatiteni për lutjen duke i shkruar pyetjet ose shqetësimet tuaja. Përfytyrojeni Perëndinë pranë. Pyeteni Atë se çfarë mund të bëni për Të sot. Më pas veproni sipas ideve që ju vijnë në mendje. Me raste, përdoreni lutjen vetëm për ta falënderuar Perëndinë. Falënderojeni Atë për të gjitha të mirat që ju ka dhënë.

  

D. Të Mësuarit për t’i Pëlqyer Shumë Shkrimet e Shenjta

• Lutuni veçanërisht për ndihmë për t’i kuptuar dhe për t’u kënaqur me shkrimet e shenjta. Përdoreni një pjesë të kohës suaj të studimit për të shkruar ndjenjat rreth shkrimeve të shenjta dhe reagimet tuaja ndaj tyre. Shkruajeni atë që mësoni ose mbresat shpirtërore që merrni.

E. Të Mësuarit për t’u Mbështetur te Shpirti

• Ushtrohuni me durim. Të mësuarit për ta dalluar zërin e Shpirtit është e ngjashme me të mësuarit e një gjuhe. Kërkon ushtrim, durim dhe përulësi. Përpiquni fort të mësoni nga gabimet pa hequr dorë.

• Mësoni nga konferencat e përgjithshme. Për ide mbi mënyrën se si të mund të merrni zbulesë vetjake, studojini bisedat e konferencës së përgjithshme për këtë temë.

Burime nga Shkrimet e Shenjta

Studiojini fragmentet në vijim të shkrimeve të shenjta. Ato do ta forcojnë besimin tuaj se Perëndia do t’ju sigurojë ngushëllim dhe ndihmë. Ndihuni të lirë të shtoni edhe fragmentet tuaja të parapëlqyera të shkrimeve të shenjta. Ndërsa kujtoni Shpëtimtarin, ju “mund të ken[i] Shpirtin e tij me [vete]” (Doktrina e Besëlidhje 20:79).

• Isaia 41:10: “Mos ki frikë, sepse unë jam me ty, mos e humb, sepse unë jam Perëndia yt. Unë të forcoj dhe njëkohësisht të ndihmoj dhe të mbaj me dorën e djathtë të drejtësisë sime”.

• Gjoni 14:27: “Unë po ju lë paqen, po ju jap paqen time: unë po jua jap, por jo si e jep bota; zemra juaj mos u trondittë dhe mos u frikësoftë”.

• 1 Nefi 1:20: “Mëshirat e dhembshura të Zotit janë mbi të gjithë ata që ai ka zgjedhur, për shkak të besimit të tyre, për t’i bërë ata të pushtetshëm, madje, deri në fuqinë e çlirimit”.

• Jakob [LiM] 3:1: “Ai do t’ju ngushëllojë në pikëllimet tuaja dhe ai do të mbrojë çështjen tuaj”.

• Jakob [LiM] 4:7: “Zoti Perëndi na tregon dobësinë tonë, që ne të mund të dimë se nëpërmjet hirit të tij dhe denjimit të tij të madh ndaj fëmijëve të njerëzve, ne kemi fuqi t’i bëjmë këto gjëra”.

• Mosia 4:27: “Dhe shikoni, që të gjitha këto gjëra të jenë bërë në urtësi dhe rregull; pasi nuk është e nevojshme që një njeri duhet të vrapojë më shpejt sesa ai ka fuqi”.

• Mosia 24:14: “Dhe unë do t’ju lehtësoj gjithashtu barrat që ju janë vënë mbi shpatulla, që ju të mos i ndjeni në shpinat tuaja, madje ndërsa jeni në robëri; dhe këtë do ta bëj që ju të qëndroni si dëshmitarë për mua në të ardhmen dhe që ju të dini me siguri se unë, Zoti Perëndi, i vizitoj njerëzit e mi në pikëllimet e tyre”.

• Alma 7:12: “Ai do të marrë përsipër dobësitë e tyre, që zemra e tij të mund të mbushet me mëshirë, sipas mishit, që ai të mund të dijë, sipas mishit, se si të ndihmojë popullin e tij sipas dobësive të tyre”.

• Alma 26:27: “Kur zemrat tona ishin të dëshpëruara dhe ishim gati të ktheheshim prapa, vini re, Zoti na ngushëlloi dhe tha: … mbani me durim vuajtjet tuaja dhe unë do t’ju jap juve sukses”.

• Alma 38:5: “Se aq sa të vësh besimin tënd në Perëndi, po aq do të çlirohesh nga sprovat e tua dhe shqetësimet e tua dhe pikëllimet e tua”.

• Ethëri 12:27: “Dhe në qoftë se njerëzit vijnë tek unë, unë do t’u tregoj atyre dobësinë e tyre. Unë u jap njerëzve dobësi, që ata të jenë të përulur dhe hiri im është i mjaftueshëm për të gjithë njerëzit që përulen para meje; pasi në qoftë se ata përulen para meje dhe kanë besim tek unë, atëherë unë do të bëj që gjërat e dobëta, të bëhen të forta në ta.”

• Doktrina e Besëlidhje 6:32, 34–36: “Madje kështu siç jam unë në mes jush. … Prandaj, mos ki frikë, tufë e vogël; bëni mirë; le të bashkohen toka e ferri kundër jush, sepse, nëse ju ndërtoheni mbi shkëmbin tim, ato s’mund të triumfojnë. Vini re, unë nuk ju dënoj. … Shihni tek unë në çdo mendim; mos dyshoni, mos kini frikë.”

• Doktrina e Besëlidhje 58:2–4: “Ai që është besnik në mundime, shpërblimi i po atij është më i madh në mbretërinë e qiellit. Ju nuk mund të shihni me sytë tuaj natyrorë, në këtë kohë, planin e Perëndisë tuaj lidhur me ato gjëra që do të vijnë më pas dhe me lavdinë që do të pasojë pas shumë mundimesh. Sepse pas shumë mundimesh vijnë bekimet.”

• Doktrina e Besëlidhje 84:88: “Do të shkoj përpara fytyrës suaj. Unë do të jem në të djathtën e në të majtën tuaj dhe Shpirti im do të jetë në zemrat tuaja e engjëjt e mi përreth jush, për t’ju ngritur lart.”

• Doktrina e Besëlidhje 122:7–9: “Gjithë këto gjëra do të të japin përvojë dhe do të jenë për të mirën tënde. Biri i Njeriut ka zbritur nën këto të gjitha. … Qëndro në udhën tënde.”

• Fragmente të tjera të shkrimeve të shenjta: