3 Nephi 2–5

“Nakahanda … sa Lakas ng Panginoon”

tinitipon ng mga Nephita ang lahat ng kanilang mga tao, ari-arian at kawan sa iisang lugar upang maghanda para sa pagdating ng digmaan

Minerva Teichert (1888-1976), The Answer of Lachoneus [Ang Tugon ni Laconeo], 1949-1951, oil painting sa linen na nakakabit sa masonite, 36 x 48 pulgada. Brigham Young University Museum of Art.

Tulad ng pagharap natin sa mga hamon na patungo sa panahon ng pagbabalik ng Tagapagligtas, naharap ang mga Nephita sa mga hamon sa mga taon bago ang pagdalaw Niya sa kanila. Nagbanta ang mga tulisan ni Gadianton na lilipulin ang mga Nephita. Gayunpaman, ang mga Nephita ay “nakahanda [na] harapin sila … sa lakas ng Panginoon” (3 Nephi 4:10). Tulad ng mga Nephita, malalampasan natin ang mga hamon sa pamamagitan ng pagiging handa. Ang lesson na ito ay makatutulong sa iyo na matanggap ang lakas ng Panginoon sa pamamagitan ng pagiging handa sa espirituwal at temporal.

Paghikayat sa mga estudyante na kumilos nang epektibo at matwid. Sa pag-aaral ng mga estudyante ng mga banal na kasulatan, tulungan silang matukoy ang mga bunga ng mga pagpili at gawain na nakatala sa mga salaysay. Hikayatin ang mga estudyante na iugnay ang mga lesson na ito sa kanilang sariling buhay at alamin kung paano nila matapat na masusunod ang Tagapagligtas.

Paghahanda ng estudyante: Hikayatin ang mga estudyante na talakayin sa mga kapamilya o lider ng Simbahan ang mga pagpapalang nagmumula sa pagiging handa sa temporal o espirituwal.

Mga Posibleng Aktibidad sa Pag-aaral

Maging handa

Ang layunin ng aktibidad na ito ay tulungan ang mga estudyante na makita ang kahalagahan ng pagiging handa. Tulungan ang mga estudyante na mag-isip ng mga sitwasyon na kailangan nilang paghandaan. Maaari kang magbahagi ng isang pagkakataon na pinagpala ka dahil naging handa ka o nahirapan ka dahil hindi ka handa.

Mag-isip ng tungkol sa isang pagkakataon sa iyong buhay kung kailan nadama mong ikaw ay handa o hindi handa.

• Ano ang sitwasyong iyon, at bakit sa palagay mo ay handa o hindi ka handa?

• Kung nadama mong hindi ka handa, ano ang ginawa mo para mas makapaghanda para sa hinaharap?

• Ano ang nagawa mo para espirituwal na makapaghanda para sa mga hamong kinakaharap mo o maaaring kaharapin mo sa hinaharap?

Sa pag-aaral mo ng 3 Nephi 2–5, hingin ang patnubay ng Espiritu para malaman kung ano ang magagawa mo para maihanda ang iyong sarili sa temporal at espirituwal para sa hinaharap.

Mga Paghahanda ni Laconeo

Ipinropesiya ng propetang si Samuel na magkakaroon ng isang gabi na walang kadiliman bilang palatandaan ng pagsilang ni Jesucristo. Nang matupad ang propesiyang ito (tingnan sa 3 Nephi 1:15–19), “higit na nakararaming bahagi ng mga tao ang naniwala, at nagbalik-loob sa Panginoon” (3 Nephi 1:22). Gayunman, pagkaraan ng ilang taon, ang ilan ay nagsimulang hindi maniwala.

Para sa sumusunod na aktibidad, maaari mong hatiin ang klase sa dalawa o pagpartner-partnerin ang mga estudyante. Maaaring basahin ng kalahati ng mga estudyante ang isa sa mga sumusunod na passage at ibahagi ang nalaman nila sa klase o sa kanilang ka-partner.

Basahin ang 3 Nephi 1:27–30 at 3 Nephi 2:1–3, at alamin ang mga dahilan kung bakit lumayo ang ilang tao sa Panginoon.

• Anong mga aral ang matututunan natin mula sa mga talatang ito na makatutulong sa atin na manatiling tapat sa Panginoon sa ating panahon?

Dumami ang mga tulisan ni Gadianton at nilabanan ng mga ito ang mga Nephita. Bilang tugon, ang mga “Lamanita na nagbalik-loob sa Panginoon ay nakiisa sa kanilang mga kapatid, ang mga Nephita” (3 Nephi 2:12). Sumulat si Giddianhi, ang pinuno ng mga tulisan ni Gadianton, kay Laconeo, ang punong hukom ng mga Nephita. Dito, nagbanta siyang lilipulin ang mga Nephita kung hindi sila susuko (tingnan sa 3 Nephi 3:1–10).

Basahin ang 3 Nephi 3:11–12, at alamin kung paano tumugon si Laconeo.

• Anong katibayan ang nakikita mo sa pananampalataya ni Laconeo sa Panginoon?

Isulat ang Mga Paghahanda ng mga Nephita sa pisara. Maaari mong i-assign ang mga sumusunod na passage sa iba’t ibang miyembro ng klase o grupo. Sabihin sa mga estudyante na isulat sa pisara ang ginawa ng mga tao para makapaghanda sa temporal at espirituwal.

• 3 Nephi 3:13–16

• 3 Nephi 3:17–21

• 3 Nephi 3:22–26

• 3 Nephi 4:3–4

Upang matulungan ang mga estudyante na matukoy ang mga temporal na paghahanda, maaari mong ipaliwanag kung paano nagtayo ang mga Nephita ng mga muog, naglagay ng mga bantay, at nagtipon ng mga suplay at pagkain. Para sa mga espirituwal na paghahanda, maaari mong ipaliwanag kung paano sila nagsisi at nanalangin para maligtas.

• Alin sa mga paghahanda ang sa palagay mo ay nakatulong nang lubos? Bakit?

• Sa iyong palagay, paano nakatulong sa kanila ang mga paghahandang ito na magtiwala sa Panginoon?

Basahin ang 3 Nephi 4:7–12, at alamin kung paano pinagpala ang mga Nephita dahil sa kanilang espirituwal at temporal na paghahanda.

• Anong mga alituntunin ang matututuhan natin mula sa salaysay na ito? (Tingnan sa 3 Nephi 4:10.)

Ang isa sa mga alituntuning natutuhan natin mula sa salaysay na ito ay habang espirituwal at temporal nating inihahanda ang ating sarili, palalakasin tayo ng Panginoon upang madaig o matiis ang mga hamon.

Mga paghahanda sa ating panahon

Isulat sa pisara ang Mga Pagkakatulad sa Panahong Ito, at tulungan ang mga estudyante na gumawa ng listahan ng mga paghahandang magagawa natin sa ating panahon. Ang mga ito ay maaaring mga paghahanda na katulad ng sa mga Nephita o iba pang paghahanda na ipinayo ng mga propeta na gawin natin. Talakayin ang mga partikular na hamon na kinakaharap natin sa ating panahon at kung paano tayo matutulungan ng mga paghahandang ito na maging handa sa lakas ng Panginoon. Upang matulungan ang mga estudyante na makapag-isip ng mga ideya, maaari mong ipanood ang video na “Temporal Preparedness Resources” (3:09), na matatagpuan sa ChurchofJesusChrist.org.

• Pumili ng isa o mahigit pang paghahanda mula sa iyong listahan. Paano ito makatutulong sa atin na malampasan ang mga partikular na hamon na kinakaharap natin sa ating panahon?

• Sa iyong palagay, sa paanong paraan tayo napapalakas ng Panginoon sa pamamagitan ng ating paghahanda?

Ang mga tulisan ni Gadianton ay nabigo sa pagkubkob dahil ang mga Nephita ay tinulungan ng Diyos sa kanilang paghahanda. Kalaunan ay umatras ang mga tulisan ni Gadianton. Sila ay tinugis ng hukbo ng mga Nephita at isinuko nila ang kanilang sarili bilang mga bihag o sila ay papatayin (tingnan sa 3 Nephi 4:16–27).

Basahin ang 3 Nephi 4:30–33; 5:1–4, at alamin kung paano tumugon ang mga tao dahil pinalakas sila ng Panginoon.

• Paano ipinakita ng kanilang tugon ang kanilang pananampalataya sa Diyos?

Maaari mong ipakita ang sumusunod na paanyaya na magnilay pati na ang pahayag ni Pangulong Nelson na pag-iisipan at pagninilayan ng mga estudyante.

Isipin ang isang pagkakataon na nadama mo ang lakas ng Panginoon sa pamamagitan ng paghahanda sa temporal at espirituwal.

Pinatotohanan ni Pangulong Russell M. Nelson ang mga pagpapala ng pagiging handa:

Pangulong Russell M. Nelson

Hindi tumitigil sa pag-atake ang kaaway. Kaya, hindi tayo dapat tumigil kailanman sa paghahanda! Kapag mas nakakaasa tayo sa ating sarili—sa temporal, emosyonal, at espirituwal—mas handa tayo na mapaglabanan ang walang tigil na pag-atake ni Satanas. …

Hindi ko sinasabing magiging madali ang mga araw na darating, ngunit ipinapangako ko na magiging maluwalhati ang bukas para sa mga handa at patuloy na naghahandang maging kasangkapan sa mga kamay ng Panginoon. (Russell M. Nelson, “Yakapin ang Bukas nang may Pananampalataya,” Liahona, Nob. 2020, 75–76)

Kung kinakailangan, magbahagi ng mga halimbawa ng maaaring kailangang paghandaan ng mga estudyante—halimbawa, paglilingkod bilang missionary, mga oportunidad na makapag-aral, propesyon, mga kalamidad, o ang pagdating ng Tagapagligtas.

Mag-isip ng isang hamon, sitwasyon, o pangyayari na kailangan mong paghandaan. Pag-isipan kung gaano ka kahanda sa ngayon. Hingin ang gabay ng Espiritu habang sinasagot mo ang mga tanong na ito.

• Anong mga partikular na gagawin mo para makapaghanda?

• Paano mo maisasama ang Panginoon sa iyong mga paghahanda?

Patotohanan ang mga pagpapalang nagmumula sa pagiging handa. Hikayatin ang mga estudyante na kausapin ang kanilang pamilya tungkol sa mga hamong kinakaharap nila at kung paano maghanda sa temporal at espirituwal.

Komentaryo at Impormasyon ng Konteksto

Paano tayo makapaghahanda?

Itinuro ni Pangulong Russell M. Nelson:

Pangulong Russell M. Nelson

Ipinangako sa atin na “kung [tayo] ay handa [tayo] ay hindi matatakot” [Doktrina at mga Tipan 38:30]. Ang pangakong ito ay may matinding implikasyon ngayon. Ipinahayag ng Panginoon na sa kabila ng mahihirap na hamon sa buhay ngayon, ang mga nagtayo ng kanilang pundasyon kay Jesucristo, at natutuhan kung paano gamitin ang Kanyang kapangyarihan, ay hindi kailangang sumuko sa mga hindi pangkaraniwang problema ng panahon ngayon. (Russell M. Nelson, “Ang Templo at ang Inyong Espirituwal na Pundasyon,” Liahona, Nob. 2021, 94)

Ipinahayag ni Pangulong Dallin H. Oaks ng Unang Panguluhan:

Pangulong Dallin H. Oaks

“Dapat tayong maghanda kapwa sa temporal at sa espirituwal para sa mga kaganapang ipinropesiya sa oras ng Ikalawang Pagparito. At ang paghahandang mas malamang na makaligtaan ay ang hindi nakikita at mas mahirap—ang espirituwal. (Dallin H. Oaks, “Paghahanda para sa Ikalawang Pagparito,” Liahona, Mayo 2004, 9)

Ipinaliwanag ni Elder David A. Bednar ng Korum ng Labindalawang Apostol:

Elder David A. Bednar

Ang ating mga pagsisikap na maghanda para sa mapanubok na karanasan ng mortalidad ay dapat tumulad sa halimbawa ng Tagapagligtas na unti-unting “lumago … sa karunungan, sa pangangatawan, at naging kalugud-lugod sa Diyos at sa mga tao” [Luke 2:52]—pinagsama-sama na balanseng kahandaan sa intelektuwal, pisikal, espirituwal, at sa pakikisalamuha. (David A. Bednar, “Susubukin Natin Sila,” Liahona, Nob. 2020, 9)

Itinuro ni Elder Quentin L. Cook ng Korum ng Labindalawang Apostol:

Elder Quentin L. Cook

Ang mga unos at tukso sa buhay na ito ay kadalasang hindi madaling hulaan kung kailan darating. Ngunit ito ang tiyak na alam natin: darating ang mga ito! Upang makayanan ang mga pagsubok at tukso na tiyak na mararanasan ng bawat isa sa atin, mangangailangan ito ng mabuting paghahanda at proteksyong laan ng langit. Kailangan ay determinado tayong maging karapat-dapat sa templo anumang pagsubok at tukso ang dumating sa atin. Kung tayo ay handa, hindi tayo matatakot. (Quentin L. Cook, “Maayos at Organisadong Tulad sa Bristol: Maging Karapat-dapat sa Templo—Madali Man o Mahirap ang Panahon,” Liahona, Nob. 2015, 39)

3 Nephi 2:15. Ano ang ibig sabihin ng “ang sumpa sa kanila ay inalis mula sa kanila”?

Noong panahon ni Nephi, ang sumpa sa mga Lamanita ay sila ay “itinakwil mula sa harapan [ng Panginoon] … dahil sa kanilang kasamaan” (2 Nephi 5:20–21). Ang sumpang ito ay mananatili lamang hangga’t masasama ang mga tao. Nang kalaunan ay tinanggap ng mga Lamanita ang ebanghelyo ni Jesucristo, “ang sumpa ng Diyos ay hindi na sila sinundan pa” (Alma 23:18). Sa 3 Nephi 2, inalis ang sumpa mula sa mga Lamanita na nagbalik-loob sa Panginoon (tingnan sa 3 Nephi 2:12, 15).

Mga Karagdagang Aktibidad sa Pag-aaral

Ang halimbawa ng paghahanda ng Tagapagligtas

Maaaring makinabang ang mga estudyante sa nakikitang halimbawa ng paghahanda ng Tagapagligtas. Maaari nilang basahin ang Lucas 2:52 at ang pahayag ni Elder David A Bednar sa bahaging “Komentaryo at Pinagmulang Impormasyon”. Talakayin kung paano makapaghahanda ang mga estudyante sa mga aspetong ito. Maaari mo ring sabihin sa mga estudyante na tingnan ang mga mithiin sa personal na pag-unlad ng Mga Bata at Kabataan na maaaring itinakda nila.

3 Nephi 2:1–3. Alalahanin ang mga espirituwal na karanasan

Maaaring talakayin ang kahalagahan ng pag-alaala sa ating mga espirituwal na karanasan. Matapos basahin ang 3 Nephi 2:1–3, maaari mong talakayin kung ano ang mangyayari kung malilimutan natin ang mga naging espirituwal na karanasan natin. Pagkatapos ay hikayatin ang mga estudyante na ibahagi kung ano ang mga ginagawa nila para maalaala at mapanibago ang kanilang patotoo sa mga espirituwal na katotohanan. Maaari din nilang isulat sa kanilang study journal ang mga espirituwal na karanasan nila noon.

Para sa iba pang impormasyon tungkol sa paksang ito, tingnan ang sumusunod:

• Henry B. Eyring, “O Tandaan, Tandaan,” o Liahona, Nob. 2007, 66–69

• Ronald A. Rasband, “Baka Iyong Malimutan,” Liahona, Nob. 2016, 113–115

• Neil L. Andersen, “Mga Alaala na Espirituwal na Nagpapatibay,” Liahona, Mayo 2020, 18–22

3 Nephi 3:2–12. Inuudyukan ni Giddianhi si Laconeo

Matutulungan ng aktibidad na ito ang mga estudyante na makita kung paano gumagamit si Satanas at ang kanyang mga alagad ng labis na papuri, mga hindi totoong pangako, at mga pagbabanta para iligaw ang mga tao. Basahin ang 3 Nephi 3:2–10, at hanapin ang mga salita o parirala na naglalarawan sa taktikang ginamit ni Giddianhi para pahinain ang pananampalataya ni Laconeo. Talakayin kung paano ginagamit ang katulad na mga taktika laban sa mga kabataan ngayon. Pagkatapos ay basahin ang 3 Nephi 3:11–12, at alamin kung paano tumugon si Laconeo. Talakayin kung paano hindi kailangang katakutan ng mga matwid na lalaki at babae ang masasama o magpatangay sa kanilang pananakot.

3 Nephi 5:23–26. Ang pagtitipon ng Israel

Maaaring ihalintulad ng mga estudyante ang pagtitipon ng mga Nephita sa 3 Nephi 3–4 sa pagtitipon ng Israel. Basahin ang 3 Nephi 5:23–26 at talakayin ang pagtitipon ng Israel. Tulungan ang mga estudyante na makita na ang Israel ay natitipon dahil ang mga tao ay “[na]kikilala ang kanilang Manunubos, na si Jesucristo” (3 Nephi 5:26).

Tingnan din sa Russell M Nelson at Wendy W. Nelson, “Pag-asa ng Israel” (pandaigdigang debosyonal para sa mga kabataan, Hunyo 3, 2018), suplemento sa New Era at Ensign, ChurchofJesusChrist.org. Maaaring makatulong na panoorin ang video ng brodkast mula sa time code na 29:50 hanggang 33:36 at 38:18 hanggang 45:09.