2. Ang Plano sa Kaluwasan

2.1. Sa premortal nga kinabuhi ang Langitnong Amahan mipaila sa plano aron kita mahimong sama Kaniya ug maangkon ang pagka-imortal ug ang kinabuhi nga dayon (tan-awa sa Moises 1:39). Aron matuman kini nga plano ug mahimong sama sa atong Amahan sa Langit, kinahanglan gayud nga makaila kita Kaniya ug sa Iyang Anak, si Jesukristo, ug makabaton og eksaktong panabut sa Ilang kinaiyahan ug mga hiyas (tan-awa sa Juan 17:3).

2.2. Ang mga kasulatan nagpunting ngadto sa plano sa Langitnong Amahan isip plano sa kaluwasan, ang talagsaong plano sa kalipay, ang plano sa katubsanan, ug ang plano sa kalooy. Kini nga plano naglakip sa Paglalang, sa Pagkapukan, sa Pag-ula ni Jesukristo, ug sa tanang mga balaod, mga ordinansa, ug mga doktrina sa ebanghelyo. Moral nga kabubut-on—ang abilidad sa pagpili ug paglihok sa atong mga kaugalingon—importante usab sa plano sa Langitnong Amahan. Ang atong mahangturon nga paglambo mag-agad kon giunsa nato sa paggamit kini nga gasa (tan-awa sa Josue 24:15; 2 Nephi 2:27).

2.3. Si Jesukristo ang sentro sa plano sa Langitnong Amahan. Ang plano sa kaluwasan magtugot kanato nga mahimong hingpit, makadawat og kahingpitan sa kalipay, makatagamtam sa atong mga relasyon sa pamilya hangtud sa kahangturan, ug magpuyo sa hangtud sa presensya sa Dios.

May kalabutan nga mga pakisayran: Malaquias 4:5–6; 3 Nephi 12:48; DP 131:1–4

Kinabuhi sa Wala pa dinhi sa Yuta

2.4. Sa wala pa kita matawo dinhi sa yuta, nagpuyo kita sa presensya sa atong Langitnong Amahan isip Iyang espiritu nga mga anak (tan-awa sa Abraham 3:22–23). Niini nga kinabuhi sa wala pa dinhi sa yuta miapil kita sa usa ka konseho uban sa laing espiritu nga mga anak sa Langitnong Amahan. Atol niana nga konseho ang Langitnong Amahan mipresentar sa Iyang plano, ug ang premortal nga si Jesukristo nakigsaad sa pagkahimong Manluluwas.

2.5. Gigamit nato ang atong kabubut-on nga sundon ang plano sa Langitnong Amahan. Kadtong misunod sa Langitnong Amahan ug ni Jesukristo gitugutan nga moanhi sa kalibutan aron makasinati sa pagka-mortal ug mouswag ngadto sa kinabuhing dayon. Si Lucifer, laing espiritu nga anak sa Dios, mirebelde batok sa plano. Nahimo siyang Satanas, ug siya ug ang iyang mga sumusunod gisalikway gikan sa langit ug wala hatagi sa kahigayunan nga makadawat og pisikal nga lawas ug makasinati sa pagka-mortal.

May kalabutan nga mga kasulatan: Jeremias 1:4–5; Mga Hebreohanon 12:9; 2 Nephi 2:27; 3 Nephi 11:10–11

Ang Paglalang

2.6. Si Jesukristo milalang sa langit ug yuta ubos sa direksyon sa Amahan (tan-awa sa DP 76:22–24). Ang Paglalang sa kalibutan importante sa plano sa Dios. Nakahatag kini og dapit diin kita makaangkon og pisikal nga lawas, matestingan ug masulayan, ug makapalambo og balaan nga mga hiyas.

2.7. Si Adan mao ang unang tawo nga gilalang dinhi sa yuta. Ang Dios milalang ni Adan ug Eva sa kaugalingon Niyang panagway. Ang tanan nga mga tawo—lalaki ug babaye—gilalang diha sa panagway sa Dios (tan-awa sa Genesis 1:26–27). Ang pagkalalaki ug pagkababaye usa ka mahinungdanon nga kinaiya sa tagsa-tagsa nga premortal, mortal ug sa mahangturong pagkatawo ug katuyoan.

Ang Pagkapukan

2.8. Didto sa Tanaman sa Eden, ang Dios mihiusa ni Adan ug Eva diha sa kaminyoon. Samtang si Adan ug si Eva didto sa tanaman, didto pa sila sa presensya sa Dios ug mahimo nga magpakabuhi sa hangtud. Nagpuyo sila sa kainosente, ug gihatagan sila sa Dios sa ilang mga gikinahanglan.

2.9. Gihatagan sa Dios si Adan ug si Eva sa ilang kabubut-on samtang didto sila sa Tanaman sa Eden. Iya silang gisugo sa dili pagkaon sa gidili nga bunga—ang bunga sa kahoy sa kahibalo sa maayo ug dautan. Ang pagsunod niini nga sugo nagpasabut nga mahimo silang magpabilin sa tanaman. Hinoon, si Adan ug si Eva wala pa makasabut nga kon magpabilin sila sa tanaman wala silay paglambo pinaagi sa pagsinati og oposisyon dinhi sa pagka-mortal. Dili sila mahibalo unsa ang kalipay tungod kay dili sila makasinati og kasubo ug kasakit. Dugang pa, dili sila manganak.

2.10. Gitintal ni Satanas si Adan ug Eva nga mokaon sa gidili nga bunga, ug gipili nila nga mokaon. Tungod niini nga pagpili, gipalayas sila gikan sa presensya sa Dios ug nahimong tawo nga napukan ug mortal. Ang kalapasan nila ni Adan ug Eva ug ang mga kausaban nga ilang nasinati isip sangputanan, lakip ang espirituhanon ug pisikal nga kamatayon, gitawag og Pagkapukan. Ang espirituhanong kamatayon mao ang pagkabulag gikan sa Dios. Ang pisikal nga kamatayon mao ang pagkabulag sa espiritu gikan sa mortal nga lawas.

2.11. Ang Pagkapukan usa ka mahinungdanong bahin sa plano sa kaluwasan sa Langitnong Amahan. Agig sangputanan sa Pagkapukan, si Adan ug si Eva mahimo nang manganak. Sila ug ang ilang kaliwat makasinati og kalipay ug kasubo, makahibalo sa maayo ug dautan, ug molambo (tan-awa sa 2 Nephi 2:22–25).

2.12. Isip mga kaliwatan ni Adan ug ni Eva, atong napanunod ang napukan nga kahimtang sa panahon sa pagka-mortal. Kita nahimulag gikan sa presensya sa Dios ug mapaubos ngadto sa pisikal nga kamatayon. Kita usab pagasulayan pinaagi sa mga kalisdanan sa mortal nga kinabuhi ug mga pagpanintal sa kaaway. Samtang dili kita ang manubag sa kalapasan ni Adan ug ni Eva, kita ang responsable sa kaugalingon natong mga sala. Pinaagi sa Pag-ula ni Jesukristo, makabuntog kita sa negatibong mga epekto sa Pagkapukan, makadawat og kapasayloan sa atong mga sala, ug sa katapusan makasinati og hingpit nga kalipay.

May kalabutan nga mga pakisayran: Genesis 1:28; Mosiah 3:19; Alma 34:9–10

May kalabutan nga hisgutanan: Ang Pag-ula ni Jesukristo

Mortal nga Kinabuhi

2.13. Ang mortal nga kinabuhi usa ka panahon sa pagkat-on, diin niining panahona atong pamatud-an nga mogamit kita sa atong kabubut-on sa paghimo sa tanang gisugo sa Ginoo ug maandam alang sa kinabuhing dayon pinaagi sa pagpalambo og balaanong mga kinaiya. Mahimo nato kini kon atong gamiton ang hugot nga pagtuo kang Jesukristo ug sa Iyang Pag-ula, maghinulsol, modawat sa makaluwas nga mga ordinansa ug mga pakigsaad sama sa bunyag ug kumpirmasyon, ug matinud-anong paglahutay ngadto sa katapusan sa mortal natong kinabuhi nga magsunod sa ehemplo ni Jesukristo.

2.14. Dinhi sa pagka-mortal ang atong mga espiritu nahiusa sa atong pisikal nga lawas, maghatag kanato og mga kahigayunan sa pagtubo ug pagpalambo sa mga paagi nga dili mahimo sa premortal nga kinabuhi. Tungod kay ang atong Langitnong Amahan dunay mahikap nga lawas nga unod ug bukog, ang atong lawas gikinahanglan aron kita molambo ug mamahimong sama Kaniya. Ang atong lawas sagrado ug kinahanglang tahuron isip gasa gikan sa atong Langitnong Amahan (tan-awa sa 1 Mga Taga-Corinto 6:19–20).

May kalabutan nga mga pakisayran: Josue 24:15; Mateo 22:36–39; Juan 14:15; 2 Nephi 2:27; 3 Nephi 12:48; Moroni 7:45, 47–48; DP 130:22–23

May kalabutan nga mga hisgutanan: Ang Dios nga Kapangulohan; Ang Pag-ula ni Jesukristo; Mga Ordinansa ug mga Pakigsaad; Mga Sugo

Kinabuhi human sa Kamatayon

2.15. Inig kamatay nato, ang atong mga espiritu mosulod sa kalibutan sa espiritu ug maghulat sa Pagkabanhaw. Ang espiritu sa mga matarung dawaton ngadto sa kahimtang sa kalipay, nga gitawag og paraiso. Kadtong mamatay nga wala mahibalo sa kamatuoran ug kadtong mga masinupakon dinhi sa pagka-mortal mosulod sa temporaryong dapit sa postmortal nga kalibutan nga gitawag og bilanggoan sa espiritu.

2.16. Ang matag tawo sa katapusan makabaton og oportunidad sa pagkat-on sa mga baruganan sa ebanghelyo ug makadawat sa mga ordinansa ug mga pakigsaad niini. Daghan sa mga matinud-anon ang mosangyaw sa ebanghelyo ngadto sa naa sa bilanggoan sa espiritu. Kadtong mopili nga modawat sa ebanghelyo, maghinulsol ug modawat sa mga ordinansa sa kaluwasan nga gihimo para kanila sa sulod sa mga templo magpuyo sa paraiso hangtud sa Pagkabanhaw (tan-awa sa 1 Pedro 4:6).

2.17. Ang pagkabanhaw mao ang paghiusa sa atong espiritu nga lawas ngadto sa atong nahingpit na nga lawas nga unod ug bukog. Human sa pagkabanhaw mahimo na kitang imortal—ang atong espiritu ug lawas dili na mabulag pag-usab. Ang matag tawo nga mahimugso dinhi sa yuta mabanhaw tungod kay gibuntog ni Jesukristo ang pisikal nga kamatayon (tan-awa sa 1 Mga Taga-Corinto 15:20–22). Ang matarung mabanhaw og una kay sa dautan ug mobangon sa Unang Pagkabanhaw.

2.18. Ang Katapusang Paghukom mahitabo human sa Pagkabanhaw. Si Jesukristo mohukom sa matag tawo aron sa pagtino sa mahangturon nga himaya nga iyang madawat. Kini nga paghukom ibase sa tinguha sa matag tawo ug sa pagsunod sa mga sugo sa Dios (tan-awa sa Pinadayag 20:12).

2.19. Adunay tulo ka gingharian sa himaya: ang celestial nga gingharian, ang terrestrial nga gingharian ug ang telestial nga gingharian (tan-awa sa 1 Mga Taga-Corinto 15:40–42). Kadtong maisugon sa pagpamatuod ni Jesus ug nagmasulundon sa mga baruganan sa ebanghelyo makapuyo sa presensya sa Dios nga Amahan ug sa Iyang Anak, si Jesukristo sa celestial nga gingharian, ug kauban sa matarung nilang mga sakop sa pamilya.

May kalabutan nga mga pakisayran: Lucas 24:36–39; Juan 17:3; DP 131:1–4

May kalabutan nga mga hisgutanan: Ang Pag-ula ni Jesukristo; Mga Ordinansa ug mga Pakigsaad