4. Ang Pagpahiuli

4.1. Gipahiuli sa Dios ang Iyang ebanghelyo niining ulahing mga adlaw pinaagi sa pag-establisar og balik sa Iyang mga kamatuoran, awtoridad sa priesthood, ug Simbahan dinhi sa kalibutan. Ang karaang mga propeta nanagna bahin sa ulahing adlaw nga Pagpahiuli sa ebanghelyo (tan-awa sa Isaias 29:13–14; Mga Buhat 3:19–21).

4.2. Nagsugod ang Pagpahiuli niadtong 1820. Ang Dios nga Amahan ug ang Iyang Anak, si Jesukristo, mipakita kang Joseph Smith agig tubag sa pag-ampo ni Joseph, ug Sila mitawag kaniya nga mahimong Propeta sa Pagpahiuli (tan-awa sa Joseph Smith—Kasaysayan 1:15–20).

4.3. Gitawag sa Dios si Joseph Smith nga mahimong ulahing adlaw nga saksi sa buhi nga Kristo. Isip propeta sa Pagpahiuli, gihubad ni Joseph Smith ang Basahon ni Mormon pinaagi sa gasa ug gahum sa Dios (tan-awa sa DP 135:3). Kauban sa Biblia, ang Basahon ni Mormon nagpamatuod kang Jesukristo ug naglangkob sa kahingpitan sa ebanghelyo (tan-awa sa Ezequiel 37:15–17). Ang Basahon ni Mormon usa usab ka saksi sa propetikanhong tawag ug sa katinuod sa Pagpahiuli.

4.4. Isip kabahin sa Pagpahiuli, mipadala ang Dios og mensaherong mga anghel aron mapahiuli ang Priesthood nga Aaronic ug Melchizedek. Dayon Siya misugo nga pagtukod og balik ang Iyang Simbahan dinhi sa kalibutan niadtong Abril 6, 1830. Tungod kay gitukod kini sa Dios Mismo, Ang Simbahan ni Jesukristo sa mga Santos sa Ulahing mga Adlaw “mao lamang ang tinuod ug buhi nga simbahan diha sa ibabaw sa tibuok yuta” (DP 1:30).

May kalabutan nga mga pakisayran: Amos 3:7; Mga Taga-Efeso 2:19–20; Mga Taga-Efeso 4:11–14; DP 13:1; DP 76:22–24; DP 107:8

May kalabutan nga mga hisgutanan: Ang Dios nga Kapangulohan; Mga Propeta ug Pagpadayag

Apostasiya

4.5. Ang panginahanglan sa ulahing adlaw nga Pagpahiuli sa mga kamatuoran sa Dios, awtoridad sa priesthood, ug Simbahan gikinahanglan tungod sa apostasiya. Ang apostasiya mahitabo dihang usa o mas daghang indibidwal motalikod gikan sa mga kamatuoran sa ebanghelyo.

4.6. Human sa paglansang sa Manluluwas ug sa pagkamatay sa Iyang mga Apostoles, daghang tawo ang mitalikod gikan sa mga kamatuoran nga giestablisar sa Manluluwas (tan-awa sa 2 Mga Taga-Tesalonica 2:1–3). Ang mga baruganan sa ebanghelyo ug ubang mga bahin sa balaang mga kasulatan gipang-usab o nawala. Dili awtorisadong mga pag-usab ang gipanghimo mahitungod sa organisasyon sa Simbahan ug sa mga ordinansa sa priesthood. Tungod niining hilabihan nga pagkadautan, ang Ginoo mibawi sa katungod ug mga yawe sa priesthood gikan sa yuta. Bisan og adunay daghang maayo ug matinuorong mga tawo nga nagsimba sa Dios sumala sa kahayag nga ilang nabatunan ug bisan natubag ang ilang mga pag-ampo, ang kalibutan nabiyaan nga walay balaang pagpadayag pinaagi sa buhing mga propeta. Kini nga panahon nailhan isip ang Dakong Apostasiya.

4.7. Uban pang mga kapanahunan sa kinatibuk-ang apostasiya nahitabo sa tibuok kasaysayan sa kalibutan.

May kalabutan nga mga hisgutanan: Mga Propeta ug Pagpadayag; Priesthood ug mga Yawe sa Priesthood; Mga Ordinansa ug mga Pakigsaad

Mga Dispensasyon sa Ebanghelyo

4.8. Dihang ang mga anak sa Dios nahulog ngadto sa kahimtang sa apostasiya, mapinanggaon Siya nga misapnay kanila pinaagi sa pagtawag og mga propeta ug pagbu-bu pag-usab sa mga panalangin sa ebanghelyo pinaagi sa Iyang bag-o nga mga propeta ngadto sa mga katawhan. Ang kapanahunan dihang gipadayag sa Ginoo ang Iyang mga kamatuoran, awtoridad sa priesthood, ug mga ordinansa gitawag og dispensasyon. Usa kini ka panahon diin ang Ginoo adunay labing minos usa ka awtorisado nga sulugoon dinhi sa kalibutan kinsa naghupot sa balaan nga priesthood ug kinsa adunay balaan nga sugo sa pagsangyaw sa ebanghelyo ug sa pagpangalagad sa mga ordinansa niini.

4.9. Ang mga dispensasyon nailhan nga kang Adan, Enoch, Noe, Abraham, Moises, Jesukristo, ug uban pa. Ang ulahing adlaw nga Pagpahiuli sa ebanghelyo, nga gisugdan sa Ginoo pinaagi ni Propeta Joseph Smith, usa ka bahin niini nga sumbanan sa mga dispensasyon.

4.10. Sa matag dispensasyon, ang Ginoo ug ang Iyang mga propeta nagtinguha sa pagtukod og Zion. Ang Zion nag-refer ngadto sa mga tawo sa Ginoo sa pakigsaad kinsa mga putli og kasingkasing, nahiusa sa pagkamatarung, ug pag-amuma sa usag usa (tan-awa sa Moises 7:18). Ang Zion nag-refer usab ngadto sa usa ka dapit diin nanagpuyo ang mga putli og kasingkasing.

4.11. Karon nagpuyo kita sa katapusang dispensasyon—ang dispensasyon sa kahingpitan sa mga panahon. Kini lamang ang dispensasyon nga dili matapos sa apostasiya. Ang Simbahan ni Jesukristo sa mga Santos sa Ulahing mga Adlaw sa katapusan mopuno sa tibuok yuta ug mobarug sa hangtud (tan-awa sa Daniel 2:44).

May kalabutan nga mga hisgutanan: Mga Propeta ug Pagpadayag; Priesthood ug mga Yawe sa Priesthood; Mga Ordinansa ug mga Pakigsaad