6. Priesthood ug mga Yawe sa Priesthood

6.1. Ang priesthood mao ang mahangturong gahum ug awtoridad sa Dios. Pinaagi sa priesthood, gimugna sa Dios ug gidumala ang mga langit ug yuta. Pinaagi niini nga gahum siya motubos ug mohimaya sa Iyang mga anak. Ang priesthood gitugyan ngadto sa takus nga mga lalaki nga miyembro sa Simbahan. Ang panalangin sa priesthood anaa alang sa tanan nga mga anak sa Dios pinaagi sa mga ordinansa ug mga pakigsaad sa ebanghelyo.

6.2. Ang mga yawe sa priesthood mao ang mga katungod sa kapangulohan, o ang gahum nga gihatag sa Dios ngadto sa tawo aron sa pagdumala ug paggiya sa gingharian sa Dios dinhi sa yuta (tan-awa sa Mateo 16:15–19). Ang mga yawe sa priesthood gikinahanglan alang sa pagdumala sa pagsangyaw sa ebanghelyo ug sa pagpangalagad sa mga ordinansa sa kaluwasan.

6.3. Gihuptan ni Jesukristo ang tanang mga yawe sa priesthood nga may kalabutan sa Iyang Simbahan. Iyang gitugyan ngadto sa matag usa sa Iyang mga Apostoles ang tanang mga yawe nga may kalabutan sa gingharian sa Dios dinhi sa yuta. Ang Presidente sa Simbahan mao lang ang bugtong tawo nga gihatagan sa awtoridad nga mogamit sa tanan niana nga mga yawe. Ang mga presidente sa templo, mga presidente sa misyon, mga presidente sa stake, mga bishop, ug mga presidente sa korum naghupot usab sa mga yawe nga magtugot kanila sa pagpangulo ug pagdumala sa buluhaton nga gisugo kanila.

6.4. Ang tanang nagserbisyo sa Simbahan—mga lalaki ug babaye—tawagon ubos sa direksyon sa tawo nga naghupot sa mga yawe sa priesthood (tan-awa sa DP 42:11). Si Elder Dallin H. Oaks sa Korum sa Napulog Duha ka mga Apostoles mitudlo, “Bisan Kinsa nga naglihok diha sa usa ka katungdanan [office] o calling nga nadawat gikan sa usa kinsa naghupot sa yawe sa priesthood naggamit sa awtoridad sa priesthood sa pagpahigayon sa iyang gisangon nga mga katungdanan” (“Mga Yawe ug Awtoridad sa mga Priesthood,” Liahona, Mayo 2014, 51). Ang awtoridad sa Priesthood magamit lamang sa pagkamatarung (tan-awa sa DP 121:36, 41–42).

6.5. Ang mga tawo nga giorden ngadto sa Melchizedek Priesthood mosulod sa panumpa ug pakigsaad sa priesthood. Kon buhaton nila ang ilang calling ug matinud-anong modawat sa Ginoo ug sa Iyang mga sulugoon, maangkon nila ang mga panalangin sa kahimayaan. Ang mga babaye sa samang paagi gisaaran usab sa mga panalangin sa kahimayaan kon sila magmatinud-anon sa mga pakigsaad nga ilang gihimo sa Ginoo.

May kalabutan nga mga pakisayran: Juan 15:16; Mga Taga-Efeso 2:19–20

May kalabutan nga mga hisgutanan: Ang Pagpahiuli; Mga Propeta ug Pagpadayag; Mga Ordinansa ug mga Pakigsaad

Ang Aaronic Priesthood

6.6. Ang Aaronic Priesthood sa kasagaran gitawag og priesthood alang sa pagpangandam. Ang Aaronic Priesthood “naghupot sa mga yawe sa pagpangalagad sa mga anghel, ug sa ebanghelyo sa paghinulsol, ug sa bunyag” (DP 13:1). Pinaagi sa paggamit niini nga priesthood, maandam ang sakrament, mapanalanginanan, ug mapangalagad. Ang mga office sa Aaronic Priesthood mao ang deacon, teacher, priest, ug bishop.

Ang Melchizedek Priesthood

6.7. Ang Melchizedek Priesthood mao ang mas taas, o mas dako nga Priesthood ug “naghupot sa katungod sa kapangulohan,ug adunay gahum ug pagtugot ibabaw sa tanan nga mga buhatan diha sa Simbahan sa tanan nga panahon sa kalibutan, sa pagtugyan sa mga espirituhanon nga mga butang” (DP 107:8). Ang tanang panalangin, mga ordinansa, pakigsaad, ug mga organisasyon sa Simbahan ipangalagad ubos sa awtoridad sa Presidente sa Simbahan, nga mao ang Presidente sa Melchizedek Priesthood. Kini nga priesthood gihatag ngadto ni Adan ug diha na sa yuta dihang ang Ginoo mipadayag sa Iyang ebanghelyo. Diha sa Melchizedek Priesthood ang mga katungdanan mao ang elder, high priest, patriarch, Seventy, ug Apostol.

May kalabutan nga pakisayran: Mga Taga-Efeso 4:11–14