5. Mga Propeta ug Pagpadayag

mga tawo nga nagpaluyo sa ilang mga lider

5.1. Ang propeta mao ang tawo nga gitawag sa Dios nga mamulong para Kaniya (tan-awa sa Jeremias 1:4–5; Amos 3:7; Juan 15:16; DP 1:37–38). Ang mga propeta nagpamatuod kabahin ni Jesukristo ug nagtudlo sa Iyang ebanghelyo. Ilang ipahibalo ang kabubut-on ug tinuod nga kinaiya sa Dios. Ilang sawayon ang pagpakasala, mopasidaan sa mga sangputanan niini, ug motabang nga malikay kita sa pagkalingla (tana-wa sa Ezequiel 3:16–17; Mga Taga-Efeso 4:11–14). Usahay, sila managna sa umaabut nga mga hitabo. Ang mga propeta makahimo niini nga mga responsibilidad tungod kay nadawat nila ang awtoridad ug pagpadayag gikan sa Dios.

5.2. Ang Pagpadayag mao ang komunikasyon gikan sa Dios ngadto sa Iyang mga anak. Kadaghanan sa mga pagpadayag moabut pinaagi sa mga impresyon, hunahuna, ug mga pagbati gikan sa Espiritu Santo. Ang pagpadayag moabut usab pinaagi sa mga panan-awon, mga damgo, ug pagbisita sa mga anghel.

5.3. Atol sa Iyang mortal nga pagpangalagad ug ingon man sa atong panahon, gitukod sa Ginoo ang Iyang Simbahan nga may pundasyon nga mga propeta ug mga apostoles (tan-awa sa Mga Taga-Efeso 2:19–20). Ang Presidente sa Ang Simbahan ni Jesukristo sa mga Santos sa Ulahing mga Adlaw mao ang propeta sa Dios ngadto sa tanang katawhan sa kalibutan karon. Kita mopaluyo sa Presidente sa Simbahan isip propeta, manalagna, ug tigpadayag ug maoy bugtong tawo sa yuta kinsa makadawat og pagpadayag nga mogiya sa tibuok Simbahan. Kon magmatinud-anon kita sa pagdawat ug pagtuman sa mga pagtulun-an sa Presidente sa Simbahan, panalanginan kita sa Dios aron mabuntog ang mga pagpanglingla ug ang dautan (tan-awa sa DP 21:4–6). Ato usab nga gipaluyohan ang mga magtatambag sa Unang Kapangulohan ug ang mga sakop sa Korum sa Napulog Duha ka mga Apostoles isip mga propeta, mga manalagna, ug mga tigpadayag.

5.4. Ang mga kasulatan—ang Biblia, Basahon ni Mormon, Doktrina ug mga Pakigsaad, ug Perlas nga Labing Bililhon—naglangkob og mga pagpadayag nga gihatag pinaagi sa karaan ug sa ulahing adlaw nga mga propeta. Samtang magtuon kita sa pulong sa mga propeta, makat-unan nato ang kamatuoran ug makadawat kita og giya.

5.5. Samtang ang Dios mohatag og pagpadayag pinaagi sa mga propeta sa paggiya sa tanan Niya nga mga anak, ang mga indibidwal makadawat og pagpadayag aron matabangan sila sa piho nilang panginahanglan, responsibilidad, ug mga pangutana ug matabangan nga malig-on ang ilang mga pagpamatuod. Bisan pa, ang personal nga inspirasyon gikan sa Ginoo dili gayud mosukwahi sa pagpadayag nga ihatag sa Dios pinaagi sa Iyang mga propeta.

May kalabutan nga mga pakisayran: Abraham 3:22–23; Mateo 16:15–19; 2 Timoteo 3:15–17; 2 Nephi 32:3; DP 8:2–3; DP 76:22–24

May kalabutan nga mga hisgutanan: Pag-angkon og Espirituhanong Kahibalo; Priesthood ug mga Yawe sa Priesthood